ސައުދީގެ މައްކާގައި ހުންނަ މަސްޖިދުލް ހަރަމްގައި، ކޯވިޑް ކާރިސާއަށްފަހު، މިސްކިތުގެ ފުލް ކެޕޭސިޓީގައި ފުރަތަމަ ފަހަރަށް، މިއަދު އީދު ނަމާދު ކޮށްފިއެވެ. އަދި މީގެ އިތުރުން، މިއަދު ވަނީ، މައްކާގެ އެހެން ހުރިހާ މިސްކިތެއްގައިވެސް، މިސްކިތްތަކުގެ ފުލް ކެޕޭސިޓީގައި، ކޯވިޑް ކާރިސާއަށްފަހު ފުރަތަމަ ފަހަރަށް އީދު ނަމާދު ކޮށްފައެވެ.
ސައުދީ އަރަބިއާގައި ފާއިތުވެދިޔަ އަހަރުގެ އޮކްޓޯބަރު މަހުގެ މެދުތެރެއިން ފެށިގެން ވަނީ މިސްކިތްތަކުގައި ޖާގަ ތަންދޭ އެންމެ ބޮޑަކަށް ފުރުސަތު ދީގެން ނަމާދު ކުރަން ފަށާފައެވެ. މިގޮތަށް، އެއްވެސް ހިފެހެއްޓުމަކާނުލާ، ނަމާދު ކުރަން ފަށާފައިވަނީ ސައުދީ އަރަބިއާގައި ޕޮޒިޓިވް ވާމީހުންގެ އަދަދު ދަށްވަމުން ދިއުމާ، އަދި އޭގެ އިތުރުން ސައުދީ އާބާދީގެ ބޮޑުބަޔަކަށް މަދުވެގެން ކޯވިޑް ވެކްސިންގެ 2 ޑޯޒްދީ ފުރިހަމަ ކުރެވުމާއި ގުޅިގެންނެވެ.
ފިތުރު އީދު ނަމާދަކީ، ރޯދަމަހުގެ ރޯދައަށްފަހު، ޝައްވާލްމަހުގެ ހަނދު ފެނުމާއެކު މުސްލިމުން ފާހަގަކުރާ އީދު ފެށިގެންދާ ނަމާދެވެ.
މިއަދު މައްކާގެ އަލް މަސްޖިދުލް ހަރަމްގައި އޮތް އީދު ނަމާދުގައި، ސައުދީ ރަސްގެފާނު ކިންގ ސަލްމާން ބިން އަބުދުލް އަޒީޒާއި، ވަލީ އަހުދު މުހައްމަދު ބިން ސަލްމާވެސް ވަނީ ބައިވެރިވެ ވަޑައިގެންފައެވެ. އަދި އީދު ނަމާދަށްފަހު، ރަސްގެފާނުވަނީ، ސައުދީގެ ޝޭޚުންނާއި އިސް އޮފިޝަލުންނާއި ބައްދަލުކޮށް ޢީދުގެ ތަހުނިޔާ ދަންނަވާފައެވެ.
