ފޯނު ކޯލާއި ޓެކްސްޓް މެސެޖުގެ ޒަރީއާއިން ވަން-ޓައިމް ޕާސްވޯޑް (އޯޓީޕީ) ހޯދައިގެން ހިންގާ ސްކޭމްތައް އިތުރުވަމުންދާތީ، އެއްވެސް ފަރާތަކާ އޯޓީޕީ ނުވަތަ ވެރިފިކޭޝަން ލިންކް ހިއްސާނުކުރުމަށް ދިވެހި ފުލުހުންގެ ހިދުމަތުން އާންމުންނަށް އިލްތިމާސްކޮށްފިއެވެ.
ފުލުހުން ރޭ ބުނީ، ފާއިތުވި މަހު ކުރި ތަހުގީގުތަކުން ދައްކާ ގޮތުގައި، ސްކޭމް ކުރާ ފަރާތްތަކުން މި ކޯޑުތައް ހޯދައިގެން ޝިކާރައަކަށްވާ މީހާގެ ނަންބަރު އީ-ސިމްއަކަށް ބަދަލުކޮށް، ބޭންކް، ޑިޖިޓަލް ވޮލެޓް އަދި ސޯޝަލް މީޑިއާ އެކައުންޓްތައް ކޮމްޕްރޮމައިޒްކުރަމުންދާ ކަމަށެވެ. ނަންބަރު ބަދަލުވުމުން، އެ މީހާއަށް ލިބެންވާ ފޯނު ކޯލްތަކާއި ބޭންކިން އެސްއެމްއެސް އެލާޓްތައް ލިބެނީ ކުށްކުރާ ފަރާތްތަކަށެވެ. އަދި ޝިކާރައަކަށްވާ މީހާގެ ނަމުގައި ހުއްދަނެތި ޑިޖިޓަލް ވޮލެޓް ހަދައި، ބޭންކް އެކައުންޓްތަކުން ފައިސާ ޓްރާންސްފަރ ކުރާ ކަމަށްވެސް ފުލުހުން ބުންޏެވެ.
މިހާރު އެންމެ އާންމުކޮށް ބޭނުންކުރާ އުކުޅަކީ، ގުޅާ މީހާ މިހާރު ބޭނުންކުރާ ނަންބަރަކީ ކުރިން އޭނާ ބޭނުންކުރި ނަންބަރެއް ކަމަށް ބުނެ ކޯޑު ހޯދުމެވެ. މީގެ އިތުރުން، ރާއްޖެއަށް ދާދި ފަހުން އައިސް އުޅޭ ކަމަށާއި ކުރީގެ އީމެއިލް ނުވަތަ ސޯޝަލް މީޑިއާ އެކައުންޓް ރިކަވަރ ކުރަން ބޭނުންވާ ކަމަށް ބުނެވެސް ކޯޑު ހޯދަން މަސައްކަތްކުރާ ކަމަށް ފުލުހުން ބުންޏެވެ.
ސަބަބެއް ނެތި ކުއްލިއަކަށް ސިމް ކާޑުގެ ސިގްނަލް ގެއްލިއްޖެނަމަ ވަގުތުން ޓެލެކޮމް ޕްރޮވައިޑަރާ ގުޅުމަށާއި، ޝައްކުކުރެވޭ ކޯލެއް ނުވަތަ މެސެޖެއް ލިބިއްޖެނަމަ 911 އަށް ރިޕޯޓުކޮށް، އެކައުންޓް ފްރީޒް ކުރުމަށް ބޭންކާ ގުޅުމަށް ފުލުހުން އިލްތިމާސްކޮށްފައިވެއެވެ.
ކޮމެންޓު ފޮނުވާ