2021ވަނަ އަހަރަކީ ރަޝިއާގެ މަސްލަހަތުތައް ވަރުގަދަޔަށް ހިމާޔަތް ކުރެވުނު އަހަރެއް ކަމުގައި، އާއަހަރަށް މަރުޙަބާ ކިއުމުގެ މުނާސަބަތުގައި، ގައުމާ މުޚާތަބްކޮށް ވާހަކަ ދައްކަވަމުން ރަޝިއާގެ ރައީސް ލާޑިމިރް ޕުޓިން ވިދާޅުވެއްޖެއެވެ.
2021ވަނަ އަހަރަކީ، ރަޝިއާގެ މަސްލަތު ޙިމާޔަތް ކުރެވުނު އަހަރެއްކަމުގައި ރަޝިއާގެ ރައީސް ވިދާޅުވި ނަމަވެސް، އެއަހަރު ފާހަގަވެގެން ގޮސްފައިވަނީ، ރަޝިއާގެ އިދިކޮޅު އެތައް ފަރާތެއް އެގައުމުގެ ސަރުކާރުން ހައްޔަރުކޮށް، އިދިކޮޅު މުޒާހިރާތައް ރޫޅާލުމުގައި އެގައުމުގެ ސިފަައިން އާދަޔާ ޚިލާފަށް ބާރުގެ ބޭނުންކޮށް، އަދި ރަޝިއާއާއި ހުޅަނގުގެ ގައުމުތަކާ ދެމެދު އޮތް ގުޅުން އިންތިހާއަށް ހީނަރުވެެގެންދިޔަ އަހަރެއްގެ ގޮތުގައެވެ.
"އަހަރުމެން ވާނީ ސާބިތުކަމާއެކު ގައުމުގެ މަސްލަޙަތު ހިމާޔަތް ކޮށްފަ، އަދި ގައުމާ ރައްޔިތުންގެ ރައްކާތެރިކަން ކަށަވަރު ކޮށްފަ،" ޓީވީ މެދުވެރިކޮށް ގައުމާ މުޚާތަބުކޮށް ވާހަކަ ދައްކަވަމުން ޕުޓިންގ ވިދާޅުވިއެވެ.
ފާއިތުވެދިޔަ އަހަރު ރަޝިއާގެ ސަރުކާރުންވަނީ، އެގައުމުގެ ސަރުކާރަށް ފާޑުކިޔަމުން އައި ގިނަ ޖަމިއްޔާތަކާއި އަދި ވަކިވަކި ފަރުދުންގެ ހަރަކާތްތައްވެސް ހުއްޓުވާފައެވެ. އަދި ފާއިތުވެދިޔަ އަހަރުގެ ފެބްރުއަރީމަހު ޕުޓިންވަނީ އޭނާގެ އެންމެ ވާދަވެރި އިދިކޮޅު ސިޔާސީ ފަރާތް ކަމުގައިވާ އެލެކްސީ ނަވާލްނީ ޖަލައް ލައްވާފައެވެ.
އަދި ޔޫކުރެއިންގެ މައްސަލާގައި، ފާއިތުވެދިޔަ އަހަރު ނިމިގެން ދިޔައިރު، ރަޝިއާއާއި ހުލަނގުގެ ގައުމުތަކާ ދެމެދު އޮތް ގުޅުންވަނީ އިންތިހާއަށް ގޯސްވެގެން ގޮސްފައެވެ. އަދި ޕުޓީންވަނީ އެމެރިކާއާއި އެގައުމާ ދެމެދު އޮތް ގުޅުމާއި ގުޅޭގޮތުން އެމެރިކާގެ ރައީސް ބައިޑްންއާއި، ފާއިތުވި ހަފްތާގެ ބުރާސްފަތި ދުވަހު މަޝްވަރާ ކުރައްވާފައެވެ.
1999 ވަނަ އަހަރުން ފެށިގެން ރަޝިއާގެ ރައީސްކަން ކުރައްވަމުން ގެންދަވާ ޕުޓިންވަނީ، ކޯވިޑް19ގައި އެގައުމުން މަރުވެ ގޮސްފައިވާ މީހުންގެ ހަނދާންތައްވެސް އާ ކުރައްވަފައެވެ. ރަޝިއާއަކީ ކޯވިޑް19ގެ ހާލަތު ދުނިޔޭގައި އެންމެ ގޯސް ގައުމުތަކުގެ ތެރޭގައި ހިމެނޭ އެއް ގައުމެވެ.
"މި ނުރައްކާތެރި ބަލި ވަނީ އަހަރެމެންގެ ތެރެއިން އެތައްބައެއް ފުރާނަ ގެއްލުވާލާފަ،" ޕުޓިން ވިދާޅުވެފައި ވެއެވެ.
ގައުމާ މުޚާތަބް ކުރައްވަމުން ޕުޓިން ވިދާޅުވެފައިވަނީ، ރަޝިއާގެ ސަރުކާރުގެ ހުރިހާވެސް އަމާޒަކީ، "ރައްޔިތުންގެ ހާލަތު ރަގަޅުކޮށް، ރައްޔިތުންގެ ދުޅަހެޔޮކަމަށް އެހީތެރިވެދިނުން" ކަމުގައެވެ.
