ބަންގްލަދޭޝްގެ ބޮޑުވަޒީރު ޝެއިހް ޙަސީނާ ރާއްޖެއަށް ކުރައްވާ ފުރަމާނަ ދަތުރުފުޅާ ގުޅިގެން މާލެ ސިޓީގައި ކުރިއަށް ގެންދާ ހަރަކާތްތަކަށް ސަލާމަތީ ސަބަބުތަކަށްޓަކައި މާދަމާ މާލޭގެ ބައެއް ސަރަޙައްދުތަކުގެ މަގުތަކާއި ޕާކިންގ ޒޯންތައް ބަންދުކުރުމަށް ނިންމައިފިއެވެ.
އެގޮތުން މާދަމާ ހެނދުނު 07:00 އިން ފެށިގެން ރޭގަނޑު 21:00އާ ހަމައަށް އެކި ވަގުތުތަކުގައި ފައިމަގުގައި އުޅޭ މީހުންނާއި ދުއްވާ ތަކެއްޗަށް ނުވަދެވޭ ގޮތަށް މަގުތައް ބަންދުކުރުމަށް ހަމަޖެހިފައިވާކަމަށް ފުލުހުން ވިދާޅުވިއެވެ.
ބަންދުކުރަން ހަމަޖެހިފައިވާ މަގުތަކުގެ ތެރޭގައި ބޮޑު ތަކުރުފާނު މަގު ޗާންދަނީ މަގާ ގުޅުނު ހިސާބުން ފެށިގެން އިރަށް ލޮޓަސް ގޯޅިއާ ހަމައަށް، އަމީރު އަހުމަދު މަގު ޗާންދަނީ މަގާ ގުޅުނު ހިސާބުން ފެށިގެން އިރަށް ފިނިހިޔާ ގޯޅިއާ ހަމައަށް، މެދުޒިޔާރަތްމަގު ޝަހީދު އަބްދުﷲ ޒުހައިރު ހިނގުމާއި ގުޅުނު ހިސާބުން ފެށިގެން ސޯސަން މަގާއި ހަމައަށް އެވަގުތުތަކުގައި ބަންދުވާނެއެވެ. މީގެ އިތުރުން މިމަގުތަކާއި ގުޅިފައިވާ ބައެއް ގޯޅިތައްވެސް ބަންދުކުރުމަށްވަނީ ހަމަޖެހިފައެވެ.
އެސަރަހައްދުތައް ބަންދުކުރުމުގައި ފުލުހުން ހަރަކާތްތެރިވަމުންދާ ތަންތަނަކީ:
ބޮޑުތަކުރުފާނު މަގު އެމް.އެމް.އޭ ކައިރި
އޯކިޑްމަގު/ ޖޫމްހޫރީ މައިދާން ޖަންގްޝަން
ބޮޑުތަކުރުފާނު މަގު/ ބީއެމްއެލް ކައިރިން (ލޮޓަސް ގޯޅި)
ނާދީ ގޯޅި
އަމީރު އަޙްމަދު މަގު/ ފިނިހިޔާ ގޯޅި ކަންމަތި
ސޯސަންމަގު/ މެދުޒިޔާރަތްމަގު ޖަންގްޝަން
އަބަދަށްފެހިމަގު/ ގުލޭނޫރަންމަގު ކަންމަތި
ގުލޭނޫރަންމަގު/ ކަރަންކާމަގު ކަންމަތި
ހިތަށްފިނިވާމަގު/ކަރަންކާމަގު ކަންމަތި
ކަޅުހުރާމަގު/ހަދީބީ މަގު ކަންމަތި
ހުސްނުހީނާމަގު/ ބޮކަރުމާ ގޯޅި ކަންމަތި
ނޫރާނީ ގޯޅި/ ހިތަށްފިނިވާމަގު ކަންމަތި
މެދުޒިޔާރަތްމަގު/ ދަރުމަވަންތަ ސްކޫލު ކަންމަތި
ޝަހީދު އާދަމް ނަސީރު ހިނގުން
ޝަހީދު ޢަބްދުﷲ ޒުހައިރު ހިނގުން
އަދި އެސަރަހައްދުތަކުގެ މަގުތަކުގައި ޕާކިން ޒޯނުގެ ގޮތުގައި ކަނޑައަޅާފައިވާ ބައެއް ސަރަޙައްދުތަކާއި، ކުރީގެ ދަރުމަވަންތަ ސްކޫލް ހުރި ސަރަޙައްދުގައި ހަދާފައިވާ ޕާކިންޒޯނާއި، ބޮޑުތަކުރުފާނު މަގު ޝަހީދު ޙުސައިން އާދަމް ބިލްޑިންގއާ އިންވެގެން އިރަށް ހުންނަ ޕާކިންގ ޒޯނުގައި ހުރި އުޅަނދުތައް މިރޭ 20:00ގެ ކުރިން، ނަގާ ޒޯންތައް ހުސްކޮށްދެއްވުމަށް ފުލުހުންވަނީ އެދިފައެވެ. މަގުތައް ބަންދުކުރަން ނިންމާފައިވާ ވަގުތުތަކުގައި އެސަރަހައްދަށް އެކި ބޭނުންތަކަށް ވަޑައިގަންނަވާ ފަރާތްތަކުން ފުލުހުން އަންގާ ގޮތެއްގެމަތިން އަމަލުކޮށްދެއްވުމަށް ވަނީ ދަންނަވާފައެވެ.
އަދި އެ ވަގުތުގައި މާލޭގެ މުހިއްމު ސަރަހައްދެއް ބަންދުކުރެވުނު ނަމަވެސް ރައްޔިތުންގެ ފަރާތުން ފުރިހަމަ އެހީތެރިކަމާއި އެއްބާރުލުން މިކަމުގައިވެސް ދެއްވުމަކީ ދިވެހި ފުލުހުންގެ ޚިދުމަތުގެ ވަރަށް ބޮޑު އެދުމެއްކަމުގައި ފުލުހުން ވިދާޅުވިއެވެ.
