އިންޑިއާގެ ބޮޑުވަޒީރު ނަރެންދުރަ މޯޑީ، ޖައްމޫ ކަޝްމީރުގެ ސަރަހައްދީ ލީޑަރުންނާ ބައްދަލު ކުރައްވައިފިއެވެ.
މޯޑީ، އިންޑިއާގެ ބާރުގެ ދަށުގައި އޮންނަށް ކަޝްމީރު ސަރަހައްދުގެ ސަރަހައްދީ ލީޑަރުންނާ ބައްދަލު ކުރައްވާފައި މިވަނީ، އެސަރައްހަދުގައި ބޭއްވޭ އިންތިޚާބާއެކު، މި ސަރަހައްދުގައި ފާއިތުވެދިޔަ 3 އަހަރު ވަންދެން ދަމަހައްޓަމުން އަންނަ ސަރުކާރުގެ ސީދާ ނުފޫޒަށް ނިމުމެއް އަންނާނެ ކަމަށް ގިނަބަޔަކުން ބުނަމުންދާ ދަޑިވަޅެއްގައެވެ.
މިއީ، 2019ވަނަ އަހަރު، ޒަމާނުއްސުގެ ކަޝްމީރު ސަރަހައްދަށް އިންޑިއާއިން ދީފަ އޮންނަ ސަރަހައްދީ މިނިވަންކަން މޯޑީގެ ސަރުކާރުން ނިގުޅައިގަތް ފަހުން މޯޑީ މިސަރަހައްދުގެ ވެރިންނާ ބައްދަލު ކުރެއްވި ފުރަތަމަ ފަހަރެވެ.
2018ވަނަ އަހަރު ކަޝްމީރު ސަރަހައްދުގެ ސަރަހައްދީ ޕާޓީއަކާއެކީ އޮތް ކޯލިޝަން ރޫލިގެން ދިއުށްފަހު، މޯޑީގެ ސަރުކާރުން ވަނީ މިސަރަހައްދަށް މަރުކަޒީ ސަރުކާރުގެ ނުފޫޒު ސީދާގޮތުން ފޯރުވަން ފަށާފައެވެ.
ފާއިތުވެދިޔަ އަހަރުތަކުގައި، މުސްލިމް މެޖޯރިޓީއެއް އޮންނަ މި ސަރަހައްދާއި އިންޑިއާ ސަރުކާރާ ދެމެދު އޮތް ގުޅުން ވަނީ ވަރަށްބޮޑަށް ހީނަރު ވެގެން ގޮސްފައެވެ.
2019ވަނަ އަހަރު މި ސަރަހައްދު މަރުކަޒީ ސަރުކާރުގެ ދަށަށް ގެންދިއުމުގެ ކުރިން، ކަޝްމީރު ސަރަހައްދަށް އޮންނީ ސްޓޭޓެއްގެ ދަރަޖަ ދީފައެވެ. ކަޝްމީރުގެ ސަރަހައްދުގެ ލީޑަރުންވަނީ، މި ސަރަހައްދުގައި ސަރަހައްދީ އިންތިޚާބު ބޭއްވުމަށްފަހު، އަލުން ސިޓީއެއްގެ ދަރަޖަ ދިނުމަށް މޯޑީގެ ކިބައިން އެދިފައެވެ.
ބައެއް މީޑިއާތަކުން ރިޕޯޓު ކޮށްފައިވާ ގޮތުގައި، މިހަފްތާގެ ބުރާސްފަތި ދުވަހު މޯޑީއާއެކީ ބޭއްވި މި ބައްދަލުވުމުގައި، މި ސަރަހައްދުގެ ކުރީގެ ޗީފް މިނިސްޓަރުން ކަމުގައިވާ ފާރޫގު އަބުދުﷲއާއި މެހުބޫބާ މުފްތީ ބައިވެރިވެ ވަޑައިގެންނެވިއެވެ.
ޖައްމޫ ކަޝްމީރުގެ ކުރީގެ ޗީފް މިނިސްޓަރެއް ކަމުގައިވާ މެހުބޫބާ މުފްތީ ވަނީ މޯޑީގެ ބައްދަލުވުމުގައި ބައިވެރިވެ ވަޑައިގެންފައިކުރީގެ މި ޗީފް މިނިސްޓަރުންނަކީ، ޖައްމޫ ކަޝްމީރު ޕީޕަލަސް އެލަޔަންސް ފޯރ ގުޕްކާރު ޑެކްލަރޭޝަންގެ ނަމުގައި ހަދާފައިވާ އިންތިހާދުގެ ބައިވެރިންނެވެ. އެތަކެއް ސިޔާސީ ޕާޓީތަކެއްގެ މައްޗަށް އެކުލަވާލާފައިވާ މި އިއްތިހާދަކީ، މި ސަރަހައްދުގައި މޯޑީގެ ސަރުކާރުން ދަމަހައްޓަމުންދާ ހަރުކަށި، އަދި އަސްކަރީ އުސޫލުތަކާއި ވަރަށް ބޮޑަށް ދެކޮޅު އިއްތިހާދެކެވެ.
ފާއިތުވެދިޔަ އަހަރު ބޭއްވުނު މުނިސިޕަލް އިންތިޚާބުގައި އެންމެ ގިނަ ގޮޑިތައް ކާމިޔާބު ކޮށްފައިވަނީ މި އިއްތިހާދުންނެވެ.
އިންޑިއާގެ ގާނޫނު އަސާސީން، އެގައުމުގެ ބާރުގެ ދަށުގައި އޮންނަ ކަޝްމީދު ސަރަހައްދަށް ލިބިދީފައި އޮންނަ ސަރަހައްދީ މިނިވަންކަން މޯޑީގެ ސަރުކާރުން އުވާލުމާގުޅިގެން، ކަޝްމީރު ސަރަހައްދުގައިވަނީ ބޮޑެތި މުޒާހިރާތައްވެސް ބާއްވާފައެވެ.
މި ސަރަހައްދަށް ލިބިދީފައި އޮތް ސަރަހައްދީ މިނިވަންކަން އަބުރާ ގެންދިއުމަށްފަހު މޯޑީގެ ސަރުކާރުންވަނީ، މި ސަރަހައްދުގައި ޓެލެ ކޮމިއުމިކޭޝަންގެ ޚިދުމަތްވެސް ހުއްޓުމަކަށް ގެނެސް، އަދި އިންޓަނެޓްގެ ޚިދުމަތްވެސް މިސަރަހައްދުން ވަނީ ކަނޑާާފައެވެ. އަދި އަބުރާ މި ޚިދުމަތްތައް މި ސަރަހައްދަށް ލިބިދީފައިވަނީ 2020ވަނަ އަހަރުއެވެ.
ތަޖުރިބާކާރުން ބުނާ ގޮތުގައި، ބުރާސްފަތި ދުވަހު މިސަރަހައްދުގެ ލީޑަރުންނާއެކު މޯޑީ މިބޭއްވި ބައްދަލުވުމަކީ، ފާއިތުވެދިޔަ ތަނުގައި މޯޑީއާއި އަދި އޭނާގެ ސަރުކަރުން މި ސަރަހައްދަށް ސިޔާސީ ބަދަލުތައް ގެނައުމަށް ކުރަމުން އައިސްފައިވާ މަސައްކަތްތައް ފެއިލް ވެގެން ގޮސްފައިވަތީ އަމާޒުވަމުންދާ ފާޑިއުންތަކާ ގުޅިގެން ބޭއްވި ބައްދަލުވުމެކެވެ.
އިންޑިއާއާއި ޕާކިސްތާނުންވެސް ކަޝްމީރަކީ ދެގައުމުގެ ސަރަހައްދެއް ކަމުގައި ދައުވާ ކުރެއެވެ. އެހެންނަމަވެސް، ކަޝްމީރު ބެހިފައި އޮންނަނީ ދެގައުމުގެ ދެމެދުގައެވެ.
ނިއުކުލިއަރ ހަތިޔާރު ހުރި މިދެގައިމުން ފާއިތުވެދިޔަ ތަނުގައި ކަޝްމީރުގެ މައްސަލާގައި 2 ހަގުރާމައެއް ކޮށްފައި ވެއެވެ.
