ދީވާލީއާ ގުޅިގެން ވައި ތަޣައްޔަރުވުން އިތުރަށް ގޯސްވެއްޖެނަމަ، ކްލައުޑް ސީޑިން މެދުވެރިކޮށް މަސްނޫޢީ ވާރޭ ވެއްސުމުގެ މަސައްކަތް ފުޅާކުރަން ދިއްލީ ސަރުކާރުން ރާވަމުންދާ ކަމަށް ރިޕޯޓުތަކުން ބުނެފިއެވެ.
ދިއްލީގެ އެއާ ކޮލިޓީ އިންޑެކްސް (އޭކިއުއައި) މިހާރު ހުރީ 367 ގައެވެ. ބައެއް ސަރަހައްދުތަކުގައި މިއީ 459 އަށް އަރާފައިވާއިރު، އެންމެ ގިނައިން ފާހަގަވަނީ ޕީއެމް 2.5 އެވެ. ބޯ ދުމުގެ ސަބަބުން ފެނުން ވަރަށް ދަށްވެ، އިންޑިއާ ގޭޓް ފަދަ ތަންތަން ވެސް ނުފެންނަ ވަރަށް ފޮރުވިފައިވާއިރު، ނޭވާލުމުގެ ދަތިތަކާ ކުރިމަތިލާ ކަމަށް ރައްޔިތުން ބުނެއެވެ.
ފާއިތުވި 15 ދުވަހުގެ ތެރޭގައި ދިއްލީ ސަރުކާރުން ދެ ފަހަރު ކްލައުޑް ސީޑިންގެ ޓެސްޓު ހަދާފައިވާއިރު، އޭގެ ތެރެއިން އެއް ޓެސްޓު ހެދީ ދިއްލީ އެއާޕޯޓު ސަރަހައްދުގައެވެ. ކްލައުޑް ސީޑިން އަކީ ސިލްވާ އައޮޑައިޑާއި ޑްރައި އައިސް ފަދަ މާއްދާތައް ވިލާގަނޑުތަކުގެ ތެރެއަށް ފޮނުވައިގެން ވާރޭ ވެއްސުމުގެ ޕްރޮސެސެކެވެ.
ނަމަވެސް، އެންވައިރޯކެޓަލިސްޓްސްގެ ބާނީ އަދި ލީޑް އެނަލިސްޓް ސުނީލް ދާހިޔާ ވިދާޅުވީ، ވައި ތަޣައްޔަރުވާ އަސްލު ސަބަބުތަކަށް ހައްލެއް ނުހޯދާހާ ހިނދަކު ކްލައުޑް ސީޑިންގެ ސަބަބުން ދިގު މުއްދަތަކަށް ނަތީޖާއެއް ނުލިބޭނެ ކަމަށެވެ. މިއީ ދީވާލީ ފަހުން ފަދަ ކުއްލި ހާލަތްތަކުގައި ބޭނުންކުރެވޭނެ ވަގުތީ ފިޔަވަޅެއް ކަމަށާއި ދާއިމީ ހައްލެއް ނޫން ކަމަށް ވެސް އޭނާ ވިދާޅުވިއެވެ.
ކޮމެންޓު ފޮނުވާ