މަންމަ ނިޔާވުމުގެ ހިތާމަވެރި ޚަބަރާއެކު، ފްރާންސްގެ ގައުމީ ފުޓްބޯޅަ ޓީމުގެ ކޯޗު ޑިޑިއޭ ޑެޝޯން ޓީމުގެ ކޭމްޕް ދޫކޮށް އެނބުރި ފްރާންސަށް ހިނގައްޖެއެވެ.
ކޯޗު ޑެޝޯން ގައުމަށް ދިއުމާ ގުޅިގެން، ވޯލްޑް ކަޕްގެ ގްރޫޕް ސްޓޭޖުގައި ހޮނިހިރު ދުވަހު ނޯވޭއާ ދެކޮޅަށް ފްރާންސް ކުޅޭ ފަހު މެޗުގައި އޭނާ ބެންޗަކުން ނުފެންނާނެއެވެ. މި މެޗުގައި ފްރާންސް ޓީމަށް އިރުޝާދު ދޭނީ އެސިސްޓެންޓް ކޯޗު ސްޓެފަންއެވެ. ފްރާންސްގެ ފުޓްބޯޅަ ފެޑަރޭޝަނުން ބުނެފައިވަނީ، ޑެޝޯންއަށް އާއިލާއާއެކު މި ހިތާމައިގައި ބައިވެރިވެ، މަންމައަށް އެންމެ ފަހުގެ އިޙްތިރާމް އަދާކުރުމަށް ފްރާންސަށް ދިއުމުގެ ހުއްދަ ދިނީ ފެޑަރޭޝަނުގެ ރައީސް ފިލިޕް ޑިއާލޯއާ ބައްދަލުކުރުމަށް ފަހު ކަމަށެވެ.
ޑެޝޯންއަކީ ފްރާންސްގެ ފުޓްބޯޅައިގައި އެންމެ ކާމިޔާބު އަދި އެންމެ ފާހަގަކޮށްލެވޭ އެއް ޝަޚުޞިއްޔަތެވެ. އޭނާގެ ކެޕްޓަންކަމުގައި 1998 ވަނަ އަހަރު ފްރާންސުން ވޯލްޑް ކަޕް ކާމިޔާބުކުރިއިރު، 2018 ވަނަ އަހަރު އެ ޓީމުން ތަށި އުފުލާލީ އޭނާގެ ކޯޗުކަމުގެ ދަށުންނެވެ. މީގެ އިތުރުން އެންމެ ފަހުގެ ވޯލްޑް ކަޕްގެ ފައިނަލަށްވެސް ޓީމު ގެންގޮސްދިނީ އޭނާއެވެ. 2012 ވަނަ އަހަރުން ފެށިގެން ޓީމާ ހަވާލުވެހުރި ޑެޝޯންގެ އިރުޝާދުގެ ދަށުން ފްރާންސުން ވަނީ މިފަހަރުގެ މުބާރާތުގައި މިހާތަނަށް ކުޅުނު ދެ މެޗުވެސް ކާމިޔާބުކޮށްފައެވެ. ކުރިއަށް އޮތް ނޯވޭ މެޗަކީ ފްރާންސް ހިމެނޭ ގްރޫޕްގެ ތަރުތީބު ކަނޑައަޅާނެ މުހިންމު މެޗެކެވެ.
ކޮމެންޓު ފޮނުވާ