ދިވެހިރާއްޖޭގައި ބިދޭސީން ގަވާއިދާ ޚިލާފަށް ހިންގާ ވިޔަފާރިތައް ހުއްޓުވުމަށް ސަރުކާރުން އެޅި ފިޔަވަޅުތަކުގެ ތެރެއިން މިހާތަނަށް 11 ވިޔަފާރިއެއް ވަނީ ބަންދުކޮށްފައެވެ. އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ބުނީ ނޮވެންބަރު 27 ގައި ނެރުނު އިޢުލާނާ ގުޅިގެން މިހާތަނަށް 125 ރިޕޯޓް ލިބިފައިވާ ކަމަށެވެ.
ޤައުމީ ފެންވަރުގައި އެކުލަވާލާފައިވާ ނޭޝަނަލް ޓާސްކްފޯހުން ކުރިއަށް ގެންދާ މި މަސައްކަތުގެ ތެރެއިން 35 ތަނަކަށް އިންސްޕެކްޝަން ހަދާފައިވެއެވެ. މީގެ ތެރޭގައި 20 ކެފޭ، 12 ރީޓެއިލް އައުޓްލެޓް، 2 ގަރާޖާއި 1 ގެސްޓްހައުސް ހިމެނެއެވެ. ވިޔަފާރީގެ ހުއްދަ ނެތުމާއި ދުންފަތުގެ ބާވަތްތައް ވިއްކުމުގެ ހުއްދަ ނެތުން ވިޔަފާރި ބަންދުކުރި މައިގަނޑު ސަބަބުތަކުގެ ތެރޭގައި ހިމެނެއެވެ.
މި މަސައްކަތުގެ މައިގަނޑު ލަނޑުދަނޑިތަކުގެ ތެރޭގައި ދިވެހިން ނިވާފަތްގަނޑަކަށް ހަދައިގެން ބިދޭސީން ހިންގާ ވިޔަފާރިތައް ހުއްޓުވުމާއި، ފޮރިން އިންވެސްޓްމަންޓް ޤާނޫނުގެ ދަށުން ބިދޭސީންނަށް ހުއްދަ ނުދޭ ދާއިރާތަކުގައި ހިންގާ ވިޔަފާރިތައް ހުއްޓުވުން ހިމެނެއެވެ. ވުޒާރާއިން ބުނީ ދިވެހިން ނިވާފަތްގަނޑަކަށް ބޭނުންކޮށްގެން ބިދޭސީން ހިންގާ ވިޔަފާރިތައް ދެނެގަތުމަށް ތަޙުޤީޤީ އިދާރާތަކާއެކު މަސައްކަތް ކުރަމުންދާ ކަމަށެވެ.
ގަވާއިދާ ޚިލާފަށް ވިޔަފާރިކުރާ ބިދޭސީންނާ ގުޅޭ މަޢުލޫމާތު 3333199 އަށް ގުޅުއްވައިގެން ނުވަތަ trade.gov.mv މެދުވެރިކޮށް ރިޕޯޓުކުރެވޭނެއެވެ. ހޮޓްލައިނަކީ ރަސްމީ ބަންދު ނޫން ދުވަސްތަކުގައި ހެނދުނު 8:00 އިން ރޭގަނޑު 8:00 އާ ދެމެދު ހިދުމަތް ދޭ ނަމްބަރެކެވެ. މިނިސްޓްރީން ވަނީ ތަފްސީލާއި ސައްހަ މަޢުލޫމާތު ރިޕޯޓުކުރުމަށް އާންމުންގެ އެއްބާރުލުން އެދިފައެވެ.
ކޮމެންޓު ފޮނުވާ