އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގައި އއ. ރަސްދޫގެ ޑިމޮކްރެޓްސް އަށް ނިސްބަތްވާ ހުރިހާ މެމްބަރުން އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ތާއީދުކޮށްފިއެވެ.
ރަސްދޫގެ ޑިމޮކްރެޓްސްގެ މެންބަރުން ވަނީ މި ސަރުކާރަށް ނޫނެކޭ ބުނެ، މުއިއްޒަށް ތާއީދު އޮތްކަން ހާމަކުރުމަށް "ބަދަލަކަށް" ނަމުގައި މިއަދު ހަވީރު އެރަށުގައި ސައިކަލު ބުރެއް ވެސް ބާއްވާފައެވެ. މި މަހު 9 ވަނަ ދުވަހު ބޭއްވި ރިޔާސީ އިންތިހާބުގައި، ކުރީގެ ރައީސް މުހައްމަދު ނަޝީދުގެ ޑިމޮކްރެޓްސް އަށް ލިބުނީ 15،000 ވޯޓެވެ.
ދެވަނަ ބުރެއްގައި އެހެން ކެންޑިޑޭޓަކަށް ތާއީދުކުރަން ޑިމޮކްރެޓްސް އިން ހުށަހެޅީ އިންތިހާބުގެ ކުރިން ނިޒާމީ ވޯޓެއް ނެގުމެވެ. އެކަމަކު އެގޮތަށް ޕީޕީއެމް އަދި އެމްޑީޕީން ވެސް އެއްބަސް ނުވުމުން ޑިމޮކްރެޓްސް އިން ނިންމީ ދެވަނަ ބުރުގައި އެއްވެސް ކެންޑިޑޭޓެއްގެ ފަހަތަށް ނޭރުމަށެވެ.
އެހެންނަމަވެސް، އަތޮޅުތެރޭ ގިނަ ރަށްރަށުގެ ޑިމޮކްރެޓްސް އަށް ނިސްބަތްވާ މެންބަރުން އަންނަނީ ޑރ. މުއިއްޒަށް ތާއީދު އޮތްކަން ހާމަކުރަމުންނެވެ. އެމީހުން ބޭނުންވަނީ ރައީސް އިބްރާހީމް މުހައްމަދު ސޯލިހު ނޫން ގޮތަކެވެ. ލ. ހިތަދޫ އަށް ނިސްބަތްވާ ޑިމޮކްރެޓްސްގެ ހުރިހާ މެންބަރުންނާއި، ގއ. ކޮލަމާފުށީގެ ޑިމޮކްރެޓްސްއަށް ނިސްބަތްވާ މެންބަރުން ވެސް ރިޔާސީ އިންތިހާބުގެ ދެވަނަ ބުރުގައި ޑރ. މުއިއްޒަށް ތާއީދުކުރަން ވަނީ ނިންމާފަ އެވެ.
މި ދެ ދުވަހު ޑރ. މުއިއްޒު ގއ. އާއި ގދ. އާއި ލ. އަދި އައްޑޫ ސިޓީއަށް ކުރެއްވި ކެމްޕެއިން ދަތުރުފުޅުގައި ވެސް ޑިމޮކްރެޓްސް އަށް ނިސްބަތްވާ ގިނަ ބަޔަކު ވަނީ ޕީޕީއެމްއާ ގުޅިފައެވެ.
