ހުވަދު އަތޮޅު ދެކުނުބުރީ ވެރިކަމަށްކުރާ ރަށް ތިނަދޫ ސިޓީގެ ސާފު މެޖޯރިޓީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ހޯދައި ދެއްވާނެކަމަށް ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ ކުރީގެ މެމްބަރު ސައުދު ވިދާޅުވެއްޖެއެވެ.
ޑރ. މުއިއްޒު ކެމްޕޭނާއި ގުޅުމަށްފަހު ސައުދު ގެންދަނީ ތިނަދޫގެ މެޖޯރިޓީ ހޯދުމަށް ހުއްޓުމެއްނެތި މަސައްކަތް ކުރަމުންނެވެ. ތިނަދޫއިން ވަނީ ފުރަތަމަ ބުރުގައި ޑރ. މުއިއްޒަށް މެޖޯރިޓީ ދެއްވާފައެވެ. ސައުދު ވިދާޅުވީ ދެވަނަ ބުރުގައި މިއަދު މުއިއްޒަށް ތައީދުކޮށް އެމްޑީޕީއާއި، ޑިމޮކްރެޓްސް އިން ގުޅުނު މީހުންނާއި، އަދި މުއިއްޒު އެންޑޯސް ކުރި މީހުންގެ އެއްބާރުލުމާއިއެކު ތިނަދޫގެ ސާފުޔ މެޖޯރިޓީ މުއިއްޒަށް ހޯދައި ދެއްވާނެކަމަށެވެ.
ތިނަދޫ ރައްޔިތުން ތިބީ މިސަރުކާރުން ޖަހާހާ ބެރަކަށް ނަށާ ގޮތަކަށް ނޫންކަމަށާއި، ރައްޔިތުން އެދެނީ ތަރައްޤީީ ގެނުވޭނެ މީހަކު ޤައުމުވެރި ކަމަށް ގެނައުމަށް ކަމަށެވެ. މިއަދު ޤައުމުގެ ހާލަތަށް ބަލާއިރު ރާއްޖޭގެ ވިޔަފާރިވެރިން ވަނީ ވަރަށް ބޮޑަށް ނިކަމެތިކޮށް ސަލާންޖަހާ ހިސާބަށް ގޮސްފައިކަމަށް ސައުދު ވިދާޅުވިއެވެ.
ދައުލަތުގެ ކުންފުނިތަކުގެ ތެރެއިން ރައްޔިތުން ލައްވައި މަސައްކަތް ކުރުމަށްފަހު ފައިސާ ނުދީ އެންމެ ބޮޑު ހިޔާނާތެއް ވެފައިވަނީ ފެނަކަ ކުންފުނިންކަމަށް ސައުދު ވިދާޅުވިއެވެ. ފެނަކައިން ވަނީ އެތައް ކުންފުނިތަކަށް ލަޑުދީ ފައިސާ ހިފަހައްޓައި މަސައްކަތް ކުރުމަށްފަހު ހިޔާނާތް ވެފައިކަމަށް ސައުދު ވިދާޅުވިއެވެ.
މިކަންކަމުން އަރައިގަނެ ދައުލަތުގެ އޮތް ދަރަނިތަކުން އަރައިގަނެވޭނީ އިޤްތިޞާދީ ގޮތުން ޤައުމަށް އެބަދަލު ގެނެވޭނެ މީހަކަށް ކަމަށާއި އެމީހަކީ ޑރ. މުއިއްޒުކަމަށް ސައުދު ވިދާޅުވިއެވެ. ސައުދުވަނީ މިއަދު ތިނަދޫއިން ޕީޕީއެމްއާއި ގުޅުނު ޓީމަކީ ތިނަދޫގެ މަންޒަރު ބަދަލުކޮށްލާނެ ތިނަދޫއަށް ލޯބިހުރު ދަރިންތަކެއް ކަމަށެވެ. އެމީހުންނަކީ އިހުލާސްތެރި ކަމާއިއެކު ރަށާއި، ރަށުގެ ކުރިއެރުމަށް އަބަދުވެސް މަސައްކަތް ކުރެއްވި ބޭފުޅުންތަކެއްކަމަށެވެ.
