ރަޝިއާގެ ރައީސް ލާޑިމިން ޕުޓިންގެ ކުރީގެ އިކޮނޮމިކް އެޑްވައިޒަރު އަންދުރޭ އިލަރިއޮނޯވްއަކީ "ބޭރުގެ އޭޖެންޓެއް" ކަމަށް ކަނޑައަޅާ، ރަޝިއާއިން އެކަށައަޅާ "ބޭރުގެ އޭޖެންޓުން"ގެ ރަޖިސްޓްރީގައި އޭނާގެ ނަން ހިމަނާފައިވާކަމަށް، ރަޝިއާގެ ޖަސްޓިސް މިނިސްޓްރީން ބުނެފިއެވެ.
ރަޝިއާ ސަރުކާރުން އެކުލަވާލާފައި އޮންނަ "ބޭރުގެ އޭޖެންޓުން"ގެ ރަޖިސްޓްރީއަކީ އާންމު ގޮތެއްގައި ޕުޓިންއާއި އިދިކޮޅު ސިޔާސީ ފަރާތްތަކުގެ ނަން ހިމަނާ ރަޖިސްޓްރީއެކެވެ.
މި ރަޖިސްޓްރީގައި ހިމަނާފައި ތިބޭ މީހުންގެ ހަރަކާތްތައް އެގައުމުގެ ސަރުކާރުން ގާތުން ބަލައެވެ. އެގޮތުން، މި ރަޖިސްޓްރީގައި ނަން ހިމެނުމަށްފަހު، އެމީހުންނަށް އާމްދަނީ ލިބޭ ގޮތްތަކާއި، ކުރާ ޚަރަދުތަކާއި އަދި އޭގެ އިތުރުން އެމީހުން ހިންގާ ހަރަތާތްކުގެ މައުލޫމާތު ސަރުކާރަށް ދޭން ޖެހެއެވެ. އެކަންކަން ފުރިހަމަ ނުކޮށްފިނަމަ، އެމީހުންގެ މައްޗަށް ދައުވާ އުފުލުމުގެ ނުރައްކަލާއި ކުރިމަތިލާން ޖެހެއެވެ.
އިލަރިއޮނޯވް ކްރެމްލިންގެ ވަޒީފާއިން އިސްތިއުފާ ދީފައިވަނީ 2005 ވަނަ އަހަރުއެވެ. އެއަށްފަހު އޭނާވަނީ އެމެރިކާއަށް ހިޖުރަ ކޮށްފައެވެ. އޭނާއަކީ ރަޝިއާއިން މިހާރު ޔޫކުރެއިންގައި ކުރަމުންދާ ހަނގުރާމައާއި ވަރަށް ދެކޮޅު ފަރާތެއްވެސް މެއެވެ. އަދި ރަޝިއާގެ ސިޔާސަތުތައް ފަހަކަށް އައިސް އޭނާ ސިފަކޮށްފައިވަނީ "މުސީބާތެއްގެ" ގޮތުގައެވެ.
ރަޝިއާގެ ޖަސްޓިސް މިނިސްޓްރީން ބުނެފައިވަނީ، އިލަރިއޮނޯވް ރަޝިއާގެ ސަރުކާރުގެ މުވައްސަސާތަކާއި ގުޅޭގޮތުން ރަގަޅު ނޫން މައުލޫމާތު ފަތުރާފައިވާކަމުގައެވެ.
މި ތުހުމަތުތަކާއި ގުޅޭގޮތުން އިލަރިއޮނޯވް މިހާތަނަށް އެއްވެސް ކޮމެންޓެއް ކޮށްފައެއް ނުވެއެވެ.
