ކީރިތި ޤުރުއާންއަކީ މާތް ފޮތެއް ކަމަށާއި، ރަޝިއާގައި ޤުރުއާން އަންދާލުމަކީ ގާނޫނުން އަދަބު ލިބޭނެ ކުށެއްކަމުގައި ރަޝިއާގެ ރައީސް ލާޑިމިރު ޕުޓިން ވިދާޅުވެއްޖެއެވެ.
ޕުޓިން މިހެން ވިދާޅުވީ ރަޝިއާގެ ހުރި އެންމެ ދުވަސްވީ މިސްކިތް ކަމަށްބުނާ ޑަގެސްޓާންގެ ޑާރބެންގައި ހުންނަ ޖުމާ މިސްކިތަށް ކުރެއްވި ޒިޔާރަތެއްގައި އެ މިސްކިތުން އޭނާއަށް މުސްޙަފެއް ހަދިޔާއަކަށް އެރުވުމާއި ގުޅިގެން، މުސްޙަފު ހިފައިގެން ހުރެ ވާހަކަ ދައްކަވަމުންނެވެ.
ޕުޓިން އެ މިސްކިތަށް ޒިޔާރަތް ކުރެއްވީ މިއަހަރުގެ ހައްޖުގެ އަޅުކަމަށްފަހު މުސްލިމުން ފާހަގަކުރި އަޟުހާ އީދުގެ ފުރަތަމަ ދުވަހުއެވެ.
މިސްކިތަށް ޒިޔާރަތް ކުރުމަށްފަހު، މުސްހަފު އަތުގައި ވާއްބާ ވާހަކަ ދައްކަވަމުން ޕުޓިން ވިދާޅުވެފައިވަނީ ކީރިތި ޤުރުއާންއަކީ މުސްލިމުންނަށް މާތް ފޮތަކަށް ވާފަދައިން އެހެން މީހުންނަށްވެސް އެ ފޮތަކީ މާތް ފޮތެއް ކަމުގައެވެ.
އަހަރެމެންނަށް އެގޭ އެހެން ގައުމުތަކުގައި އަމަލު ކުރަމުންދަނީ ތަފާތުކޮށްކަން. އެމީހުން އެހެން މީހުންގެ ދީނީ އިހުސާސްތަކަށް އިހުތިރާމެއް ނުކުރޭ. އަދި އެމީހުން ބުނޭ އެއީ ކުށެއް ނޫންކަމަށް. އަހަރެމެންގެ ގައުމުގެ އެއީ ކުށެއް. ގާނޫނު އަސާސީންނާއި ގާނުލް އުގޫބާތުގެ 282 ވަނަ މާއްދާގެ ދަށުން.
ޕުޓިން ވިދާޅުވެފައި ވެއެވެ.
ޤުރުއާން އަންދާލުމަކީ ކުށެއްކަމަށް ޕުޓިން ވިދާޅުވެފައިވާއިރު، ސުވިޑްންގެގެ ސްޓޮކްހޮމްގައި ހުންނަ އެންމެ ބޮޑު މިސްކިތުގެ ބޭރުގައި، އިހުތިޖާޖު ކުރުމުގެ ގޮތުން ގުރުއާން އަންދާލުމުގެ ހުއްދަ، އިހުތިޖާޖު ކުރާ ފަރާތްކަށް އަނެއްކާވެސް ސްވިޑްންގެ ފުލުހުން ވަނީ ދޫކޮށްފައެވެ.
ސުވިޑްންގެ ފުލުހުން ލިޔުމުން ހާމަ ކޮށްފައިވާ ގޮތުގައި ގުރުއާން އަންދާލުމުގެ ސަބަބުން އުފެދިދާނެ ސަލާމަތީ މައްސަލަތަކަކީ، ގުރުއާން އަންދާލުމަށް ހުއްދަ ނުދިނުމަށް، އެގައުމުގެ ހެދިފައި ހުރި ގާނޫނުތަކުން އޮތް ހުއްޖަތެއް ކަމުގައި ބަލައި ނުގަނެވޭ ކަމުގައެވެ.
މިއަހަރުގެ ޖެނުއަރީމަހުވެސް، ސްވިޑްންގައި ހުންނަ ތުރުކީގެ އެމްބަސީ ކައިރީގައި ގުރުއާން އަންދާލުމުގެ ސަބަބުން ތުރުކީގައާއި ސްޓޮކްހޯމްގައިވެސް އެތައް ހަފްތާއެއް ވަންދެން މުސްލިމުން މުޒާހިރާ ކޮށްފައި ވެއެވެ.
