ސައުދީ ވަލީ އަހުދު މުހައްމަދު ބިން ސަލްމާން، ކިންގް ސަލްމާންގެ ފަރާތުން މިނާއަށް ވަޑައިގެން ހައްޖާޖީންނަށް އެގައުމުގެ ސަރުކާރުން ފޯރު ކޮށްދެމުންދާ ޚިދުމަތްތައް ބައްލަވާލައްވައިފިއެވެ.
ސައުދީ އަރަބިއާގައި ހައްޖުގެ އަޅުކަން ފަށާފައިވަނީ މި ހަފްތާގެ ހޯމަ ދުވަހުއެވެ. އެއީ ޒުލްހިއްޖާ މަހުގެ 8 ވަނަ ދުވަހެވެ. މިއީ ކޯވިޑް19 އަށްފަހު، އާންމުކޮށް ހުޅުވާލައިގެން ހައްޖުގެ އަޅުކަން އަދާކުރުމުގެ ފުރުސަތު ސައުދީ ސަރުކާރުން ހުޅުވާލި ފުރަތަމަ ފަހަރެވެ.
އަންގާރަ ދުވަހުގެ ހެދުނު ހައްޖާޖީންވަނީ އަރަފާތު ބިމަށް މިސްރާބު ޖަހާ، އެދުވަހުގެ އިރު އޮއްސެންދެން އަރަފާތު ބިމުގައި ވަގުތު ހޭދަ ކޮށްފައެވެ. އެއީ ހައްޖުގެ އަޅުކަމުގައި ހިމެނޭ އެންމެ މުހިންމު ރުކުނެވެ. އަފަރާތު ބިމަށް ހާޒި ނުވެވޭ މީހާއަށް ހައްޖު ނުލިބޭނެއެވެ.
2020 ވަނަ އަހަރުން ފެށިގެން ދުނިޔެއަށް ކުރިމަތިވި ކޯވިޑް ކާރިސާއާއި ދެކޮޅަށް އަޅާފައިވާ ފިޔަވަޅުތަކަށް ލުއި ދީފައި ވުމާއެކު، މިއަހަރު 2.5 މުސްލިމުން ހައްޖުގެ އަޅުކަން ފުރިހަމަ ކުރާނެކަމަށް ވަނީ އަންދާޒާ ކުރެވިފައެވެ.
2020 ވަނަ އަހަރު ހައްޖުގެ އަޅުކަން އަދާކުރުމުގެ ފުރުސަތު ދީފައިވަނީ އެންމެ 10،000 މީހުންނަށެވެ. ޖެހިގެން އައި 2021 ވަނަ އަހަރު 59،000 މީހުންނަށް ހައްޖުގެ އަޅުކަން އަދާކުރުމުގެ ފުރުސަތު ދީފައިވާއިރު، 2022 ވަނަ އަހަރު ފުރުސަތު ދީފައިވަނީ 1 މީހުންނަށެވެ.
ހައްޖާޖީން ވަނީ އާދީއްތަ ދުވަހުގެ ހަވީރު މިނާއަށް ދަތުރު ފަށާފައެވެ. އެއީ މައްކާގައި ހުންނަ އަލް މަސްޖިދުން ހަރަމްއިން ފެށިގެން 8 ކިލޯ މީޓަރުގެ ދަތުރެކެވެ. މިނާއަށްފަހު ދެން ހައްޖާޖީން ދަތުރު ކުރާނީ އަރަފާތު ބިމަށެވެ.
މިއަހަރުގެ ހައްޖުގެ އަޅުކަން އަދާކުރާއިރު ހޫނުމިން ހުންނާނީ 45 ޑިގްރީގައެވެ. ސައުދީ އަރަބިއާގެ މުވައްސަސާތަކުން ބުނެފައިވަނީ ހޫނު ގަދަވުމުގެ ސަބަބުން ކުރިމަތިވާ ހާލަތްތަކަށް ތައްޔާރަށް 32،000 ހެލްތު ވާރކަރުންނާއި އެތައް ހާސް އެމްބިއުލާންސެއް ވަނީ ތައްޔާރީ ހާލަތަކަށް ގެނެސްފައެވެ.
