މާލެސަރަހައްދުން ގޯތިދޫކުރުމަށް ސަރުކާރުން ނިންމައި ކޮމިޓީ އެކުލަވާލިއިރު މާލޭ ސިޓީ ކައުންސިލްގެ ދައުރެއް ނެތްކަމަށްބުނެ މާލޭ ސިޓީ ކައުންސިލްގެ މެމްބަރު އިބްރާހީމް ސުޖާއު ކަންބޮޑުވުން ފާޅުކުރައްވައިފިއެވެ.
މިކަމާމެދު ކަންބޮޑުވުން ފާޅުކުރައްވައި ކުރެއްވި ޓްވީޓެއްގައި ސުޖާއު ވިދާޅުވީ މި ކޮމިޓީގައި މާލެ ސިޓީ ކައުންސލްގެ އެއްވެސް ދައުރެއް ނެތުމަކީ ޤާނޫނު ނަމްބަރ:7/2010 ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ބާރުކަނޑުވާލުމާއި ޤާނޫނު އޮޅާލުން ކަމުގައި ދެކޭކަމަށެވެ.
އަދި ރާއްޖޭގެ ހުރިހާ ކައުންސިލްތަކުން ގޯތި ދޫކުރަމުން ގެންދަނީ ކައުންސިލްތަކުންކަމަށާ، މާލޭގެ ރައްޔިތުންނަށް ގޯތި މިދޫކުރަނީ މައި ސަރުކާރުންކަން ސުޖާއު ފާހަގަކުރެއްވިއެވެ. މާލެ ރައްޔިތުން އިންތިހާބު ކުރި ކައުންސިލްގެ ދައުރެއްނެތި މިކަން ކުރުމުގެ މާނައަކީ "ރަށު އޮފީހުގެ ބޭނުމެއް ނެތޭ. ޤާނޫނު އޮތީ އަސްލަންޓޭ ކަބަޑުތެރޭގަ." ކަމުގައިވެސް ސުޖާއު ވިދާޅުވިއެވެ.
މާލެސަރަހައްދުން ގޯތިދޫކުރުމަށް ސަރުކާރުން ނިންމައި ކޮމިޓީ އެކުލަވާލިއިރު @MaleCitymv ގެ އެއްވެސް ދައުރެއް ނެތުމަކީ ޤާނޫނު ނަމްބަރ:7/2010 ގެ ބާރުކަނޑުވާލުމާއި ޤާނޫނު އޮޅާލުން ކަމުގައި އަޅުގަނޑު ދެކެން.1/2 https://t.co/HWGmFYoyTC
— Ibrahim Shujau (@IbrahimShujaau) February 22, 2023
ސަރުކާރުގެ ގެދޮރުވެރިން ޕްރޮގްރާމުގެ ދަށުން ހިންގާ ބިންވެރިޔާ އަދި ގެދޮރުވެރިޔާ ސްކީމުގެ ކަންކަން ބެލެހެއްޓުމަށް "ގެދޮރުވެރިންގެ ކޮމިޓީ" އުފައްދައި ސަރުކާރުންވަނީ އެކަން ހާމަކުރައްވާފައެވެ.
ޕްލޭނިން މިނިސްޓްރީން މިއަދު ބުނެފައިވަނީ ސަރުކާރުގެ ގެދޮރުވެރިން ޕްރޮގްރާމުގެ ދަށުން ހިންގާ ބިންވެރިޔާ އަދި ގެދޮރުވެރިޔާ ސްކީމަށް ކުރިމަތިލާފައިވާ ފަރާތްތައް އިވެލުއޭޓްކޮށް، ބިމާއި ފްލެޓް ދޭނެ ފަރާތްތައް ކަނޑައެޅުމަށްޓަކައި "ގެދޮރުވެރިންގެ ކޮމިޓީ" ގެ ނަމުގައި ކޮމިޓީއެއް ވަނީ އުފައްދަވާފައި ކަމަށެވެ.
ސަރުކާރުން މާލެ ސަރަޙައްދުން ދިނުމަށް ނިންމި 5000 ގޯތީގެ ތެރެއިން 3000 ގޯއްޗަށް ކުރިމަތިލުމުގެ ފުރުސަތު ހުޅުވާލީ މިދިޔަ އަހަރު ޖޫންމަހުގައެވެ. އޭގެތެރޭގައި ހިމެނެނީ ހުޅުމާލެއިން ދޫކުރާ 1000 ގޯއްޗާއި، ގުޅީފަޅުން ދޫކުރާ 2000 ގޯއްޗެވެ. ދެން ހިމެނެނީ މާލެ އަތޮޅު ގިރާވަރު ފަޅު ހިއްކާ އެތަނުން ދޫކުރުމަށް ނިންމާފައިވާ 2000 ގޯއްޗެވެ.
މާލޭގެ ބޯހިޔާވަހިކަމަށް ހުޅުވާލި ފުރުޞަތުގައި ފްލެޓަށް އެދި 20697 އެޕްލިކޭޝަންވަނީ ހުށައަޅާފައެވެ. އަދި ގޯއްޗަށް އެދި 15164 އެޕްލިކޭޝަން ވަނީ ހުށައަޅާފައެވެ.
ކޮމެޓީގައި ތިއްބަވާ މެމްބަރުން:
1. އަކްރަމް ކަމާލުއްދީން، މއ. އެވަރެސްޓް (ޗެއަރޕަރސަން)
2. އަލްއުސްތާޛު އަނަސް އަބްދުއްސައްތާރު، މ. ބަޑިކުޅިމާގެ (ކޯ-ޗެއަރޕަރސަން)
3. މަރިޔަމް ނާޒިމާ، މއ. އެރިޒޯނާ
4. އައިޝަތު ރަޝީދާ، ހ. ރެޖީނާ ހައުސް
5. މުހައްމަދު އާރިފް، ހއ. އިހަވަންދޫ ނެދުންގެ
މާލެ ސަރަހައްދުގައި ދިރިއުޅޭ މީހުންނަށް ބޯހިޔާވަހިކަން ހޯދައިދިނުމަށް މި ސަރުކާރުން ހިންގާ "ބިންވެރިޔާ" އަދި "ގެދޮރުވެރިޔާ" ސްކީމްގެ ދަށުން މިހާތަނަށް އިއުލާނުކޮށްފައި ވަނީ ޖުމްލަ 5،000 ގޯތި ދޫކުރުމަށެވެ. ނަމަވެސް އެއަދަދު އިތުރު ކުރާނެ ކަމަށް މިއަހަރުގެ ރިޔާސީ ބަޔާނުގައި ރައީސް ސޯލިހް ވަނީ ވިދާޅުވެފައެވެ
