ރަޝިއާއަށް އަތުވެދާނެ ނިއުކުލިއަރ ހަމަލާއަކުން އެގައުމު ދިފާޢު ކުރުމަށް ތައްޔާރަށް އޮންނަ ނިއުކުލިއަރ ފައުޖު (ސްޓްރަޓީޖިކް ޑެޓަރެންޓް ފޯރސެސް)އިން ބޭއްވި ތަމްރީންތައް އެގައުމުގެ ރައީސް ލާޑީމިރު ޕުޓިން ބައްލަވާލައްވައިފިއެވެ.
ރަޝިއާގެ އަސްކަރިއްޔާގެ ސްޓްރަޓީޖިކް ޑެޓަރެންޓް ފޯރސެސްއަކީ ނިއުކުކިއަރ ހަގުރާމައެއް ފެށި، އެފަދަ ހަނގުރާމައަކުން ރަޝިއާގެ ސަލާމަތަށް ނުރައްކާވެއްޖެ ހާލަތެއްގައި އެގައުމުގެ ސަލާމަތަށް ތައްޔާރަށް އޮންނަ ފައުޖެކެވެ.
"ރައީސް ޕުޓިންގެ ލީޑަރޝިޕްގައި، އެއްގަމާއި، ކަނޑާއި އަދި ވައިގެ ސަރަަހައްދުގައިވަނީ ސްޓްރަޓީޖިކް ޑެޓަރެންޓް ފޯރސެސްގެ ތަމްރީން ސެޝަންތަކެއް ބޭއްވިފައި. މި ތަމްރީންތަކުގައި، ބެލެސްޓިކް އަދި ކުރޫޒް މިސައިލްތައް އަމަލީގޮތުން ވަނީ ލޯންޗް ކުރެވިފައި،" ކްރެމްލިންއިން ނެރެފައިވާ ބަޔާނެއްގައި ވިދާޅުވެފައި ވެއެވެ.
ރަޝިއާގެ ސްޓޭޓް ޓެލެވިޒްންއިން ވަނީ، ކޮންޓްރޯލް ރޫމްގައި އިންނަވައިގެން ޕުޓިން މި ތަމްރީންތައް ބެއްލެވި މަންޒަރުތައް ދުރަށް ދައްކަވާފައެވެ.
މިޑްރިލްތަކުގައި ވަނީ، ރަޝިއާގެ އެންމެ އިރުމަތީގެ ކަމްޗްޓަކާ ޕެނިންސޫލާއިން އެންޓާކްޓިކްގެ ބެރެންޓްސް ކަނޑަށް ޓެސްޓް މިސައިލްތައް އުދުއްސާލާފައެވެ.
މި ތަމްރީންތަކުގައި Tu-95 މަރުކާގެ ދުރު ރާސްތާއަށް ދަތުރުކާ އެއަރކްރާފްޓްތައް ބޭނުން ކުރެެވިފައިވާ ކަމަށްވެސް ކްރެމްލިންގެ ބަޔާނުގައި ވިދާޅުވެފައި ވެއެވެ.
"ސްޓްރަޓީޖިކް ޑެޓަރެންޓް ފޯރސެސްގެ މި ތަމްރީންތަކުގައި އުދުއްސާލެވުނު މިސައިލްތައް ވަނީ އޭގެ އަމާޒަށް ވާޒިލްވެފަ. އަދި ތަމްރީންތައް ވަނީ ކާމިޔާބު ކަމާއެކު ފުރިހަމަ ކުރެވިފަ،" ކްރެމްލިން އިން ބުނެފައި ވެއެވެ.
ރަޝިއާގެ ސްޓްރަޓީޖިކް ޑެޓަރެންޓް ފޯރސެސްއަކީ އަތުވެދާނެ ނިއުކުލިއަރ ރައްދު ދޭން ރައްދު ދޭން އުފައްދާފައިވާ އަސްކަރީ ބާރެކެވެ.
މި ފައުޖުގައި އިންޓަރކޮންޓިނެންޓަލް (ބައްރުތައް ހުރަސްކޮށް ދަތުރު ކުރާ) ބެލެސްޓިކް މިސައިލްތައް ހުންނައިރު، ދުރު ރާސްތާއަށް ދަތުރުކުރާ ބޮން އަޅާ ބޯޓުތަކާއި، ސަބްމެރިންތަކާއި، ކަނޑުމަތީ މަނަވަރުތަކާއި، ނޭވަލް އޭވިއޭޝަންއެއްވެސް ހުރެއެވެ.
މި ތަމްރީންތައް ބާއްވާފައި މިވަނީ ރަޝިއާއިން ޔޫކުރެއިންގައި ކުރަމުންދާ ހަނގުރާމާގައި ނިއުކުލިއަރ ހަތިޔާރުގެ ބޭނުން ކޮށްފާނެކަމުގެ އިންޒާރު އެގައުމުން ތަކުރާރުކޮށް ދީފައި ވަނިކޮށެވެ.
