މަސްވެރިންގެ އަތުން މަސް ގަންނަ އަގު މިފްކޯއިން މިއަހަރުގެ މާރޗްމަހުން ފެށިގެން ބޮޑު ކުރުމާއި ގުޅިގެން، މިއަހަރުގެ ތެރޭގައި ބަޖެޓް ކުރެވިފައި ނުވާ ޚަރަދެއްގެ ގޮތުގައި، މިފްކޯއަށް 650 މިލިއަން ރުފިޔާ ކެޕިޓަލްގެ ގޮތުގައި ދޫކުރަންޖެހޭނެ ކަމަށް އަންދާާ ކުރެވޭ ކަމަށް ފިނޭންސް މިނިސްޓްރީން އާންމު ކޮށްފައިވާ "ފިސްކަން ސްޓްރަޓެޖީ އަންގައިދޭ ބަޔާން 2023-2025″ ގައި ބުނެފިއެވެ.

ފިނޭންސް މިނިސްޓްރީން އާންމު ކޮށްފައިވާ މި ބަޔާނުގައި ފާހަގަ ކޮށްފައިވާ ގޮތުން، މިއަހަރު ސަރުކާރުގެ ޚަރަދު ބޮޑުވާން މެދުވެރިވި އެއް ސަބަބެއްގެ ގޮތުގައި ފާހަގަކޮށްފައިވަނީ ސަރުކާރ ހިއްސާވާ ކުންފުނިތަކަށް ދޫކުރާ ކެޕިޓަލްއެވެ. މީގެ ތެރޭގައި ފާހަގަ ކޮށްފައިވަނީ މިއަހަރުގެ ތެރޭގައި ބަޖެޓުގައި ހިމަނައިފައިނުވާ ސަރުކާރު ހިއްސާވާ ދެ ކުންފުންޏަކަށް މިހާރު ދޫކުރާން ޖެހިފައިވާ ކެޕިޓަލްއެވެ. އެއީ އެޗްޑީސީއަށާއި މިފްކޯއަށެވެ.

މި ބަޔާނުގައި ވާގޮތުން، މި އަހަރުގެ ފެބުރުވަރީ މަހު މިފްކޯއިން މަސް ގަންނަ އަގު މަތިކުރުމަށް ނިންމުމާ ގުޅިގެން، މިފްކޯގެ ކޭޝްފްލޯ ހަމަޖެއްސުމަށް އެ ކުންފުންޏަށް ކެޕިޓަލްގެ ގޮތުގައި މި އަހަރު 650 މިލިއަން ރުފިޔާ ދޫކުރަންޖެހޭނެކަމަށް މިހާރު އަންދާޒާ ކުރެވެއެވެ.

ފާއިތުވެދިޔަ މާރވްމަހުގެ 1 ވަނަ ދުވަހުން ފެށިގެން މަސްގަންނަ އަގު ބޮޑު ކުރުމަށްފަހު، މިފްކޯއިން ބުނީ އެދުވަހުން ފެށިގެން މިފްކޯގެ ސެންޓަރުތަކުން މަސްވެރިންގެ އަތުން މަސް ގަންނަމުންދާނީ ކިލޯއެއް 17 ރުފިޔާއަށް ކަމަށެވެ.

މަސްވެރިންގެ އަތުން މަސް ގަންނަ އަގު މިފްކޯއިން ބޮޑުކޮށްފައިވަނީ، މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު، މިއަހަރުގެ މާޗް މަހުގެ ފުރަތަމަ ހަފްތާއިން ފެށިގެން މިފްކޯއަށް މަސްގަންނަ އަގު ބޮޑުވާނެކަމަށް ވިދާޅުވެ ވަވަޑައިގެންނެވި ވައުދު ފުއްދުމުގެ ގޮތުންނެވެ. އެ ޖަލްސާގައި ރައީސް ސާލިހު ވިދާޅުވެފައިވަނީ ދެން މިފްކޯއިން މަސް ގަންނާނީ ދުނިޔޭގެ ބާޒާރުގައި މަހުގެ އަގަށް އަންނަ ބަދަލާ އެއްގޮތަށްކަމަށެވެ.