ސައުދީ އަރަބިއާގެ މަދީނާގައި ހުންނަ މަޝްހޫރު ޤުބާ މިސްކިތް ބޮޑު ކުރުމުގެ ބޮޑު މަޝްރޫޢެއް، ސައުދީ ވަލީއަހުދު މުހައްމަދު ބިން ސަލްމާން އިއުލާން ކުރައްވައިފިއެވެ. މިއީ ސައުދީ އަރަބިއާގެ ތާރީޚުގައިވެސް، އިސްލާމީ ތާރީޚާއި ވަރަށް ބޮޑަށް ގުޅިފައިވާ މިމިސްކިތް ބޮޑު ކުރުމަށްޓަކާ ހިންގޭ އެންމެ ބޮޑު މަޝްރޫޢެވެ.
މަދީނާގެ ރަށް ބޭރުގައި ހުންނަ ގުބާ މިސްކިތަކީ ރަސޫލާ އެންމެ ފުރަތަމަ ބިނާ ކުރެއްވި މިސްކިތެވެ. މި މިސްކިތް މިހާރު ހުންނަނީ، 5,035 އަކަ މީޓަރުގެ ސަރަހައްދެއްގައެވެ.
ސައުދީ އަރަބިއާގެ SPA ނޫސް އޭޖެންސީން ރިޕޯޓު ކޮށްފައިވާ ގޮތުގައި، ޤުބާ މިސްކިތް ބޮޑު ކުރުމަށްޓަކާ މި ހިންގޭ ބޮޑު މަޝްރޫޢުގެ ދަށުން، މި މިސްކިތުގެ ބޮޑުމިން 50،000 އަކަ މީޓަރަށް ބޮޑުވެގެން ދާނެއެވެ. މިއީ މިހާރުގެ ސައިޒުގެ 10 ގުނަ ބޮޑު މިންވަރެކެވެ. އަދި މިސްކިތް ބޮޑު ކުރެވިގެން ދިއުމާއެކު، މިސްކިތުގެ ސަރަހައްދުގައި 66,000 މީހުންނަށް އެއްފަހަރާ ނަމާދު ކުރުމުގެ ފުރުސަތު ތަނަވަސް ވެގެންދާނެއެވެ.
ޤުބާ މިސްކިތް ބޮޑު ކުރުމަށްޓަކާ ސައުދީ އަރަބިއާއިން އިއުލާންކުރި މި ޕޮރޮޖެކްޓަކީ، މި މިސްކިތުގެ ތާރީޚުގައިވެސް، މިސްކިތް ބޮޑު ކުރުމަށްޓަކާ ހިންގޭ އެންމެ ބޮޑު މަޝްރޫޢެވެ.
މިސްކިތް ބޮޑު ކުރުމުގެ މި މަޝްރޫއަކީ، މިސްކިތަށް ޒިޔާރަތްކުރާ މީހުންގެ އަދަދު އިންތިހާއަށް އިތުރުވެގެން ދިއުމާއި، އަދި ސައުދީ ރަސްކަމުގެ 2030ގެ ތަސައްވުރުގެ ލަނޑުދަނޑިތައް ހާސިލް ކުރުމަށް އަމާޒު ކޮށްގެން ހިންގޭ މަޝްރޫޢެކެވެ. ސައުދީ ރަސްކަމުން ކަނޑައަޅާފައިވާ 2030ގެ ތަސައްވުރުގެ މައިގަޑު އެއް އަމާޒަކީ ދިރިއުޅުމުގެ ހާލަތު ކުރިއެރުވުމާއި، ދީނީ އަޅުކަންތަކަށް އެގައުމަށް ޒިޔާރަތްކުރާ މީހުންނަށް ފޯރުކޮށްދޭ ޚިދުމަތްތައް ތަރައްގީކުރުމަށް އަމާޒުކޮށްގެން ޕްރޮގްރާމްތައް ހިންގުމެވެ.
މީގެތެރޭގައި ދީނީ އަޅުކަންތައް އަދާ މީހުންނަށް ލުއިފަސޭހަކަން ގާއިމް ކޮށްދިނުމުގެ ގޮތުން، ސައުދީ އަރަބިއާގެ ރޯޑު ނެޓްވާކްތައް ތަރައްގީ ކުރުމާއި، މީހުންގެ ސަލާމަތަށްޓަކާ ސެކިއުރިޓީ ސިސްޓަމްތައް ޑިޒައިން ކުރުންވެސް ހިމެނެއެވެ. އަދި 2030ގެ ތަސައްވުރުގެ ދަށުން މިސްކިތްތައް ބޮޑު ކުރުމުގެ އިތުރުން، ތާރީޚީ 57 ތަނެއް ހިމާޔަތްކޮށް ތަރައްގީ ކުރުންވެސް ހިމެނެއެވެ. މީގެ ތެރޭގައި ތާރީޚީ ވަޅުތަކާއި، ދަނޑުބިންތަކާއި، ރަސުލާ ދަތުރުކުރެއްވި މަގުތައްވެސް ހިމެނެއެވެ.
