ކުރީގެ ރައީސް ޔާމީން އިސްކޮށް ހުންވައިގެން ހިންގަމުންދާ އިންޑިއާ އައުޓް ހަރަކާތަކީ ވެރިކަމުގެ އުންމީދުގައި ހިންގަވާ ވަރަށް ނުރައްކާތެރި ހަރަކާތެއް ކަމުގައި ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކުރެންދޫ ދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެނޑިޑޭޓްގެ ކެމްޕެއިންގައި ވާހަކަ ދައްކަވަމުން ރައީސް ނަޝީދު ވިދާޅުވީ، ރައީސް ޔާމީން އިންޑިއާ އައުޓް ކިޔުއްވާފައި އެކުރައްވަނީ ވަރަށް ހުތުރު ކަމެއް ކަމަށެވެ. އަދި އެހާމެ ނުރައްކާތެރި ކަމެއްކަމަށެވެ.
ރާއްޖޭގެ މިނިވަންކަމާއި ސިޔާދަތާއި އިސްތިގުލާލަށް މިއަށްވުރެ ބޮޑު ގެއްލުމެއް ވަކި ނުދެވޭނެ. މިއީ ވަރަށް ވަރަށް ނުރައްކާތެރި ހަރަކާތެއް. ރައީސް ޔާމީންގެ ބޭނުމަކީ ބޮޑެތި ގައުމަތާއި ރާއްޖެއާއި މައްސަލަ އުފެއްދުން. ނަފްރަތު އުފެއްދުން. އެޤައުމުތަކުގެ ވެރިންނާއި ރައްޔިތުންގެ ހިތްބަރު ކުރުން.
– ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ބޭރު ގައުމުތަކުގެ ރުހުމުގެ ލޮލަކުން ނުބެލުނީމާ ލިބޭނެ ނިކަމެތި ކަމަކީ ރާއްޖޭގެ ތާރީހު ދަންނަ އެއްވެސް ބަޔަކަށް އޮޅޭނެ ކަމެއްނޫން ކަމަށެވެ. ރާއްޖެއަކީ އަވަށްޓެރި ޤައުމުތަކާއި ވަރަށް ގުޅިގެން އެކުވެރި ކަމާއިއެކު މަސައްކަތް ކުރާ ގައުމެއް ކަމަށާއި، ދޭދޭ ގައުމުތަކާއި އޮތް ގުޅުމަށް ބުރޫއަރާފަދަ ހަރަކާތްތައް ހިންގުމަކީ އެއްވެސް ގޮތަކަށް ޖާގަ ދެވިގެންވާނެ ކަމެއް ނޫންކަމަށް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ރައީސް ޔާމީންގެ މިހަރާތުގެ ބޭނުމަކީވެސް އަދި ވެރިކަމަށް އައުމުގެ އުންމީދުގައި ކުރައްވާ ކަންތައްތަކެއް ކަމަށެވެ. ރައީސް ޔާމީންގެ އަމާޒު ހުންނެވީ ކޮންމެ ފަދަ ކަމެއްކޮށްގެންވެސް ވެރިކަމަށް އައުންކަމަށާއި، ނަމަވެސް ދިވެހިންނަށް ގެއްލުން ލިބޭނެ ގޮތަކަށް އެކަން ކުރުމަކީ އެއްވެސް ގޮތަކަށް ރަނގަޅު ކަމެއް ނޫންކަމަށް ނަޝީދު ވިދާޅުވިއެވެ.
ރައީސް ޔާމީން މިކަން ކުރަނީ ވެރިކަމުގެ ބޭނުމުގައި، ވެރިކަމުގެ ދަހިވެތި ކަމުގައި. ވަރަށް އިހުލާސްތެރި ކަމާއިއެކު ޕީޕީއެމްގެ ހުރިހާ މެމްބަރުންނަށް ދަންނަވާލަން ބޭނުން، ޔާމީނާއި، ޕީޕީއެމްއަށް ތާއީދުކުރުން އެއީ ވަކި ކަމެއް. ނަމަވެސް ދިވެހި ރާއްޖެއަށް ގެއްލުންވާނެ އެއްވެސް ކަމެއް އެއްވެސް މީހަކު ބައިވެރިވުމަކީ ބުއްދިވެރި ކަމެއްނޫން.
– ނަޝީދު ވިދާޅުވިއެވެ.
ރައީސް ނަޝީދު އިންޑިއާ އައުޓާއި ދެކޮޅަށް އެކި ޖަލްސާތަކުގައި ދަނީ ވާހަކަ ދައްކަވަމުންނެވެ. ނަމަވެސް މާދަމާވެސް ރައީސް ޔާމީން ބައިވެރިވާ "އިންޑިއާ އައުޓް" ހަރަކާތެއް ޅ.ނައިފަރުގައި ބޭއްވުމަށް ވަނީ ހަމަޖެހިފައެވެ. ރައީސް ޔާމީން ވިދާޅުވެފައިވަނީ އިންޑިއާ އަކީ މިއަދު ދިވެހިނަށް ޖެހިފައިވާ ނޮހޮރޮއްޕާނެއްކަމަށެވެ. އަދި އިންޑިއާ އައުޓް ހަރަކާތް ހުއްޓާލާނީ އިންޑިއާގެ ސިފައިން ރާއްޖެއިން ބޭލުމުންކަމަށެވެ.
