ޝިޕް ޓްރެކިން ޑާޓާތައް ދައްކާގޮތުން، ޔޫރަޕުން ދަތިކުރުމުގެ ފިޔަވަޅު އަޅާފައިވާ، ރަޝިއާގެ މަދުވެގެން 5 ބިލިއަނަރެއްގެ ސުޕަރ ޔޮޓު، މިހާރު ދަތުރު ކުރަމުން ދަނީ، ނުވަތަ އެންކަރު ކޮށްފައިއޮތީ "އިންޑިއާ ކަނޑުގެ ޖަޒީރާ ގައުމެއް ކަމުގައިވާ ދިވެހި ރާއްޖޭގައި" ކަމަށް އަލްޖަޒީރާ ނިއުސް ނެޓްވާކުން ރިޕޯޓު ކޮށްފިއެވެ.
އަލްޖަޒީރާއިން ރިޕޯޓު ކޮށްފައިވާ ގޮތުގައި، ދިވެހިރާއްޖެއަކީ އެމެރިކާއާއެކީ އެކްސްޓްރޑިޝަން ޓްރީޓީއެއްގައި ސޮއި ކޮށްފައިވާ ގައުމެއް ނޫނެވެ.
ރަޝިއާއިން ޔޫކުރެއިންއަށް އަރާ އެގައުމަށް ދެމުންދާ އުދުވާނީ ހަމަލާތަކާއި ގުޅިގެން ދުނިޔޭގެ ގިނަ ގައުމުތަކުން، ޕުޓިންގެ ގާތް، ރަޝިއާގެ ބިލިއަރުންނާއި ދެކޮޅަށް ދަތި ކުރުމުގެ ފިޔަވަޅު އަޅާފައި ވާއިރު، ފޯބްސް މައްޖައްލާއިން ރިޕޯޓު ކޮށްފައިވާ ގޮތުގައި ރަޝިއާގެ ބިލިއަނަރެއް ކަމުގައިވާ އަލީޝާރ އުސްމަނޯވްގެ މެގަ ސުޕަރ ޔޮޓު ޖާރމަނީގެ ހަމްބާރގު ޝިޕް ޔާރޑުން މިހާރުވަނީ ހިފަހައްޓާފައެވެ.
އުސްމަނޯވްއަކީ ޔޫރަޕިއަން ޔޫނިއަންއިން ދަތިކުރުމުގެ ފިޔަވަޅުތައް އަޅާފައިވާ ރަޝިއާގެ ބިލިއަނަރުންގެ ލިސްޓުގައި ހިމަނާފައިވާ މަހުޖަނެކެވެ. ޔޮޓު އިންޑަސްޓްރީގެ ތިން ފަރާތަކާއި ހަވާލާދީ ފޯރބްސްއިން ރިޕޯޓު ކޮށްފައިވާ ގޮތުގައި، 600 މިލިއަން ޑޮލަރުގެ އަގުހުރި، 512 ފޫޓު ބޮޑު، ދިލްބާރު ނަމަކަށް ކިޔާ މި ޔޮޓު ހިފަހައްޓާފައިވަނީ ޖާރމަނީގެ އޮތޯރިޓީތަކުގެ އެންގުމަށެވެ.
ޝިޕް ޓްރެކިންގ ޑާޓާތައް ދައްކާގޮތުން، ޔުރަޕުން ދަތިކުރުމުގެ ފިޔަވަޅު އަޅާގައިވާ، ރަޝިއާގެ 3 ބިލިއަނަރެއްގެ ޔޮޓެއް މިހާރު ދަނީ ރާއްޖޭގެ ސަރަހައްދުގައި ދަތުރު ކުރަމުންނެވެ. މީގެ ތެރޭގައި، ރަޝިއާގެ އެންމެ މުއްސަދި މަހުޖަނު ކަމުގައިވާ، ލާޑިމިރ ޕޮޓަނިންގެ 288 ފޫޓުގެ އަގުބޮޑު ސުޕަރ ޔޮޓު ހިމެނޭކަމަށްވެސް ބައިނަލްއަގުވާމީ މީޑިއަތަކުން ވަނީ ރިޕޯޓު ކޮށްފައެވެ.
ރަޝިއާއިން ޔޫކުރެއިންއަށް އަރާ އެގައުމަށް އުދުވާނީ ހަމަލާތައް ދޭން ފެށުމާއި ގުޅިގެން، ހުޅަނގާއި ޔޫރަޕްގެ ގިނަ ގައުމުތަކުން އެގައުމާ ދެކޮޅަށް އަޅަމުންދާ ދަތިކުރުކުރުމުގެ ފިޔަވަޅުތައް ވަނީ ޕުޓިންގެ ގާތް، ރަޝިއާގެ ބައެއް މަހުޖަނުންނަށްވެސް އަމާޒު ކޮށްފައެވެ. މި ފިޔަވަޅުތަކުގެ ނަތީޖާއެއްގެ ގޮތުން މުޅި ޔޫރަޕް ބައްރުގެ ކަނޑާއި ވައިގެ ސަރަހައްދު ވަނީ ރަޝީއާގެ ފްލައިޓްތަކަށާއި އަދި ކަނޑު އުޅަނދުފަހަރަށް ބަންދު ކުރެވިފައެވެ.
އަދި މިފިޔަވަޅުތަކުގެ ނަތީޖާއެއްގެ ގޮތުން ރަޝިއާގެ އިގްތިސާދަށް ނޭދެވޭ އަސަރުކޮށް، އެގައުމުގެ ފައިސާގެ އަގުވަނީ މިއިން ޒަމާނަކުވެސް ނުވެއްޓޭ މިންވަރަށް ވެއްޓިފައެވެ.
ހުޅަނގާއި ޔޫރަޕުން ދަތިކުރުމުގެ ފިޔަވަޅު އަޅާފައިވާ ރަޝިއާގެ މަހުޖަނުންގެ ސުޕަރ ޔޮޓުތައް ރާއްޖެއަށް އަންނަމުންދާއިރު، މި ކަމާ ގުޅޭގޮތުން ސަރުކާރުން އަދި އެއްވެސް މައުލުމާތެއް ހާމަކޮށްފައެއް ނުވެއެވެ. އެހެންނަމަވެސް، ރަޝިއާގެ މަހުޖަނުންނާއި ދެކޮޅަށް ދުނިޔެއިން އަޅަމުންދާ ފިޔަވަޅުތަކުން ރެކޭ ސަރަހައްދެއްގެ ގޮތުގައި ރާއްޖޭގެ ބޭނުން ކުރަން ފަށައިފިނަމަ، ރާއްޖޭގެ އިގުތިސާދަށާއި އަދި އެހެން ބައެއް ގައުމުތަކާއެކީ ރާއްޖެއިން ދަމަހައްޓަކުންދާ ގުޅުންތަކަށް ނޭދެވޭ އަސަރުތަކެއް ކޮށްފާނެ ކަމަށް ބެލެވެއެވެ.
ބޭރުގެ ބައެއް މީޑިއާތަކުން ރިޕޯޓު ކޮށްފައިވާ ގޮތުގައި މި ޔޮޓުތައް ރާއްޖެ ވަންނަމުން ދާދިއުމާ ގުޅޭގޮތުން މައުލޫމާތު ހޯދުމަށް ކުރި މަސައްކަތްތަކަށް ރައީސް އޮފީހުގެ ތަރުޖަމާން ޖަވާބު ދެއްވާފައެއް ނުވެއެވެ.
