ކޯވިޑް19ގެ ހާލަތު އިނގިރޭސިވިލާތުގައި ގޯސްވެ އެގައުމު ލޮކްޑައުން ކޮށްފައި ވަނިކޮށް، އިނގިރޭސި ބޮޑުވަޒީރުގެ ރަސްމީ ގެކޮޅު، ޑައުނިންގ ސްޓްރީޓުގައި ބާއްވާފައިވާ ޕާޓިތަކާއި ގުޅުންހުރި ތަހުގީގު ލަންޑަންގެ މެޓްރޯޕޮލިޓަން ފުލުހުން ފަށާފައިވާކަން ފުލުހުންގެ ފަރާތުން ހާމަ ކޮށްފިއެވެ.
ލަންޑަން އެސެމްބްލީގެ ޕޮލިސް އެންޑް ކްރައިމް ކޮމިޓީއަށް އަންގާރަ ދުވަހު މެޓްރޯޕޮލިޓަން ޕޮލިސް ކޮމިޝަނަރ ކްރެއްސިޑާ ޑިކް ވިދާޅުވެފައިވާ ގޮތުގައި، ރަސްމީ ގެކޮޅުގައި ބާއްވާފައިވާ ޕާޓީތަކުގެ މައްސަލަ ތަހުގީގު ކުރަމުން ދިޔަ ޓީމުން ފުލުހުންނަށް ދިފައިވާ މައުލުމާތުތަކުގެ މައްޗަށް ބިނާކޮށް ކޯވިޑްގެ ގަވާއިދުތަކާއި ޚިލާފްވެފައިވާ ކަމަށް ބެލެވޭ މައްސަލަތައް ފުލުސް އޮފިސަރުން މިހާރު ދަނީ ބަލަމުންނެވެ.
"އެންމެ ފުރަތަމަ ކެބިނެޓް އޮފީސް އިންކުއަރީ ޓީމުންނާއި، ދެވަނައަށް އަހަރެންގެ އޮފިސަރުންގެ އަމިއްލަ އެސެސްމަންޓްތަކުގެ މައްޗަށް ބަރޯސާކޮށް ޔަގީންކޮށް ދެވިދާނެ، ޑައުނިންގ ސްޓްރީޓްއާއި ވައިޓްހޯލްގައި ބާއްވާފައިވާ އެތައް އިވެންޓެއްގައި ކޯވިޑް19 ރެގިއުލޭޝަންތަކާއި ޚިލާފް ވެފައިވާކަމަށް ޝައްކުރެވޭ މައްސަލަތަކުގެ ތަހުގީގު މިހާރު ކުރިޔަށް ދާކަމަށް،" އޭނާ ވިދާޅުވެފައި ވެއެވެ.
އިނގިރޭސިވިލާތުގައި ކޯވިޑް19ގެ ހާލަތު ގޯސްވެ، އެގައުމުގައި ވަރަށް ހަރުކަށި ލޮކްޑައުން ތަންފީޒު ކުރަމުން ދަނިކޮށް، ބޮޑުވަޒީރުގެ ރަސްމީ ގެކޮޅުގައި ސަމަރ ގާޑެން ޕާޓީތަކާއި ކްރިސްމަސް އެއްވުންތައް ބާއްވާފައިވާ މައްސަލާގައި އެގައުމުގެ ބޮޑުވަޒީރު ބޮރިސް ޖޯންސަން އިސްތިއުފާއަށް ގާނޫނުހަދާ މަޖިލީހުގައި އެތައް މެމްބަރުންނެއް ދަނީ ގޮވަމުންނެވެ.
މީގެ ތިން ހަފްތާކުރިން އާންމު ވެގެންގޮސްފައިވާ މައުލުމާތުތަކުން އެގިގެން ގޮސްފައިވާ ގޮތުގައި، ބޮރިސް ޖޯންސަންގެ ޕްރަައިވެޓް ސެކެޓްރީ މާރޓިން ރޭނީލްޑްސް ވަނީ، 2020 އަހަރުގެ މޭމަހުގެ 20ވަނަ ޑައުނިން ސްޓްރީޓްގެ ބަގީޗާއެއްގައި، "ގައި ދުރުކޮށް" ބޭއްވޭ ޕާޓީއަކަށް ޑައުނިންގ ސްޓްރީޓުގައި މަސައްކަތް ކުރާ 100 ވަރަކަށް މުވަޒިފުންނަށް އީމެއިލް މެދުވެރިކޮށް ދައުވަތު ފޮނުވާފައެވެ.
ބޮޑުވަޒީރުގެ ގެކޮޅުގައި މި ޕާޓީ ބާއްވާފައިވަނީ މުޅި ދުނިޔޭގައިވެސް ކޯވިޑްގެ ހާލަތު ގޯސްވެ، އިނގިރޭސިވިލާތްވެސް ވަރަށް ވަރުގަދަޔަށް ލޮކްޑައުން ކޮށްފައި އޮއްވައެވެ. އަދި މި ދުވަސްވަރަކީ އިނގިރޭސިވިލާތުގައި ގެއިން ބޭރުގައި އެކަކަށްވުރެ ގިނައިން އެއްތަނަކަށް ޖަމާނުވުމަށް އަންގާ، މިއެންގުމާ ޚިލާފަށް އަމަލްކުރާ ފަރާތްތަކާ ދެކޮޅަށް ގާނޫނީ ފިޔަވަޅު އަޅާނެކަންވެސް އާންމުކޮށް އިއުލާން ކޮށްފައިވާ ދުވަސްވަރެކެވެ.
މީގެކުރިން ޖޯންސަންވަނީ އޭނާއާއި އަދި އޭނާގެ އަނބިކަބަލުން ކެރީ ޖޯންސަން މި ޕާޓީއަށް ހާޒިރުވިކަން ދޮގު ކުރައްވަން އިންކާރު ކުރައްވާފައެވެ. އަދި އޭނާވަނީ، ޑައުނިންގ ސްޓީޓްގައި ބޭއްވުނު ޕާޓީތަކާބެހޭ ތަހުގީގެއް ކުރިޔަށް ދަތީ، މި މައްސަލައާއި ގުޅޭގޮތުން އިތުރަށް ކޮމެންޓް ކުރައްވަންވެސް ދެކޮޅު ހައްދަވާފައެވެ.
އިގިރޭސި ސަރުކާރުގެ ވަޒީރަކު، މިނިސްޓީރިއަލް ކޯޑާއި ޚިލާފް ވެއްޖެނަމަ މަގާމުން އިސްތިއުފާ ދެއްވަން ޖެހިވަޑައި ގަންނަވައެވެ. ޖޯންސަންގެ އަމިއްލަފުޅު ޕާޓީގެ ބައެއް މެމްބަރުންވެސް ވަނީ، ބޮޑުވަޒީރު ޖޯންސަން މި ޕާޓީއަށް ވަޑައިގެންނެވިކަން ސާބިތުވެއްޖެނަމަ އިސްތިއުފާ ދެއްވަން ޖެހިވަަޑައިގަންނަވާނޭކަަމަށް ވިދާޅުވެފައެވެ.
