އިނގިރޭސި ބޮޑުވަޒީރު ބޮރިސް ޖޯންސަންގެ ކޮންޒަވޭޓިވް ސަރުކާރުގެ ވަޒީރުކަމުން އޭނާ ވަކި ކޮށްފައިވަނީ އޭނާއަކީ މުސްލިމަކަށް ވާތީ އެކީގައި މަސައްކަތް ކުރާ މީހުންނަށް އުދަގޫވެގެން ކަމުގައި، ގާނޫނުހަދާ މަޖިލިހުގެ މެމްބަރު ނުސްރަތު ޢަނީ ވިދާޅު ވެއްޖެއެވެ.
އުމުރުން 49 އަހަރުގެ ނުސްރަތު ޢަނީ ޖޯންސަންގެ ކޮންޒަވޭޓިވް ސަރުކާރުގެ ޖޫނިއަރ ޓްރާންސްޕޯޓު މިނިސްޓަރުކަމުން ވަކި ކޮށްފައިވަނީ 2020ވަނަ އަހަރުގެ ފެބްރުއަރީމަހުއެވެ.
އޭނާއާއި ހަވާލާދީ ސަންޑޭ ޓައިމްސްއިން ރިޕޯޓު ކޮށްފައިވާ ގޮތުގައި، ޕާލަމެންޓްރީ ކަންކަމުގައި އެންމެ އިސްކޮށް ހުންނަވާ ވިޕް، އޭނާއަކީ މުސްލިމަކަށް ވާތީ އެއީ މައްސަލައެއްގެ ގޮތުގައި ބެލެވިފައިވާކަން އޭނާއަށް އަގާފައި ވެއެވެ.
"ޑައުނިންގ ސްޓްރީޓްގައި ބޭއްވުނު ރީޝަފުލް ބައްދަލުވުމުގައި އަހަރެންނަށް އަންގާފައިވަނީ، އަހަރެންނަކީ މުސްލިމަކަށް ވާތީ އެއީ މައްސަލައެއްގެ ގޮތުގައި ފާހަގަ ކޮށްފައި ވާކަމަށް، އަހަރެންނަކީ މުސްލިމް މިނިސްޓަރަކަށް ވާތީ އެކީ މަސައްކަތް ކުރާ މީހުންނަށް އުދަގޫ ވާކަމަށް،" އިނގިރޭސިވިލާތުގެ އެންމެ ފުރަތަމަ މުސްލިމް މިނިސްޓަރ ކަމުގައިވާ ޢަނީއާއި ހަވާލާދީ ނޫހުގައި ރިޕޯޓު ކޮށްފައި ވެއެވެ.
"އަހަރެން އެއްގޮތަކަށްވެސް ފޮރުވާކަށް ނެތިން، މީގެ ސަބަބުން އަަހަރެންގެ ހިތުގައި ޕާޓީއާއިމެދު އޮތް އިތުބާރަށް އަސަރު ކޮށްފައިވާކަން، އަދި އަހަރެން ވަނީ ގާނޫނީ ހަދާ މަޖިލިހުގެ މެމްބަރެއްގެ ގޮތުގައި ހުރުމާމެދުވެސް ސީރިއަސްކޮށް ވިސްނާފަ."
ނުސްރަތު ޢަނީގެ މި ވާހަކަތަކަށް ބޮޑުވަޒީރުގެ އޮފީހުން މިހާތަނަށް އެއްވެސް ކޮމެންޓެއް ކޮށްފައެއް ނުވެއެވެ. އެހެންނަމަވެސް ސަރުކާރުގެ ޗީފް ވިޕް މާރކް ސްޕެންސަރ ވިދާޅުވެފައިވާ ގޮތުގައި ޢަނީ ކުރައްވާ ތުހުމަތު އެންމެ ބޮޑަށް އަމާޒުވަނީ އޭނާއަށް ކަމުގައެވެ.
"މި ކުރަމުންދާ ތުހުމަތުތަކަކީ ކަޑައެޅިގެން ދޮގު، އަދި އަހަރެން ދެކެނީ މިއީ އަހަރެންގެ އަބުރަށް އަރައިގަތުން ކަމުގައި،" އޭނާ ޓުވީޓު ކުރައްވާފައި ވެއެވެ. "އަހަރެންނަށް ނިސްބަތްކޮށް ދައްކާފައިވާ އެއްވެސް ވާހަކަތަކަކީ އަހަރެން ދެއްކި ވާހަކަތަކެއް ނޫން."
ނުސްތަރު ޢަނީ ޖޯންސަންގެ ސަރުކާރުގެ މައްޗަށް މިތުހުމަތު ކޮށްފައިވަނީ، އޭނާގެ އެކުވެރި ކޮންޒަރވޭޓިވް މެމްބަރެއް ކަމުގައިވާ ވިލިއަމް ރެގް، އިގިރޭސިވިލާތް ލޮކްޑައުންގައި ވަނިކޮށް، ޖޯންސަން ޕާޓިތަކަށް ވަޑައިގެންފައިވާ މައްސަލާގައި އޭނާ މަގާމުން ދުރުކުރުމަށް މަސައްކަތް ކުރަމުންދާ މެމްބަރުން ބްލެކްމެއިލް ކުރުމަށް ސަރުކާރުގެ ވިޕުން މަސައްކަތް ކުރަމުންދާކަމަށް ތުހުމަތު ކޮށްފައިވަނިކޮށެވެ.
