އެމެރިކާއިން ދިން ޑްރޯން ހަމަލާއެއްގައި އަވަހާރަ ކޮށްލާފައިވާ އިރާނުގެ ޖެނެރަލް ގައްސާމް ސުލައިމާނީގެ މަރުގެ ބަދަލު ހިފުމަށް ގޮވާލާ، ޓްރަމްޕް މަރާލުމަށް ޑްރޯން ހަމަލާ ދޭ މަންޒަރު ދައްކުވައިދޭ ވޯޑިއޯ އާންމުކުރި، އިރާނުގެ ރޫޙާނީ ލީޑަރާއި ގުޅުންހުރި ޓުވިޓަރ އެކައުންޓު ދާއިމީ ގޮތެއްގައި ސަސްޕެންޑް ކޮށްފައިވާ ކަމުގައި ޓުވިޓަރއިން ބުނެފިއެވެ.
"ބުނެވިދިޔަ އެކައުންޓުވަނީ، އަހަރެމެންގެ އުސޫލުތަކާއި ޚިލާފްވުމުން ދައިމީ ގޮތެއްގައި ސަސްޕެންޑް ކުރެވިފައި،" ޓުވިޓަރގެ ތަރުޖަމާން އޭއެފްޕީއަށް މައުލުމާތު ދެމުން ވިދާޅުވެފައި ވެއެވެ.
@KhameneiSite ގެ ނަމުގައި އޮޕަރޭޓް ކުރަމުން އައި މި އެކައުންޓުންވަނީ، ރިމޯޓު ކޮންޓްރޯލުން އޮޕަރޭޓްކުރާ ރޮބަޓެއް ބޭނުން ކޮށްގެން، ޓްރަމްޕް މަރާލުމަށް ޑްރޯން ހަމަލާއެއް ދޭ މަންޒަރު ދައްކުވައި ދީފައެވެ.
އިރާނުގެ ރޫޙާނީ ލީޑަރު އާޔަތުﷲ ޚާމަނައިގެ އޮފީހުގެ ވެބްސައިޓުގައިވެސް އާންމު ކޮށްފައިވާ މި ވީޑިއޯއިން ފެންނަނީ، ޑޮނަލްޑް ޓަރަމްޕް ފްލޮރިޑާގައި އޮންނަ އޭނާގެ މާރަލާގޯގެ ގޯލްފް ކޯރސްގައި ހުންނަވަނިކޮށް، އޭނާ މަރާލުމަށްޓަކާ ރިމޯޓް ކޮންޓްރޯލުން އޮޕަރޭޓްކުރާ ރޮބަޓެއްގެ އެހީގައި، ޑްރޯން ހަމަލާއެއް ދޭތަނެވެ. އަދި މީގެ އިތުރުން، ގައްސާމް ސުލައިމާނީގެ މަރުގެ ޒިންމާ ޑްރޯން ހަމަލާ ދިން މީހުންގެ އިތުރުން އެ ހަމަލާގެ އޯޑަރު ދިން މީހުންވެސް އުފުލަން ޖެހޭނެ ކަމަށާއި އޭގެ އަގު އަދާ ކުރަންޖެހޭނަކަމަށް ލިޔެފައިވާ މެސެޖު ތަކުރާރުކޮށް މި ވީޑިއޯއިން ފެންނާން ހުރެއެވެ.
މި ވީޑިއޯއަކީ، އެމެރިކާއިން އިރާނުގެ އިސްލާމިކް ރޮވޮލިއުޝަނަރީ ގާރޑްސް ކޯޕް (IRGC)ގެ ކޮމާންޑަރު ގައްސާމް ސުލައިމާނީ ޑްރޯން ހަމަލާއެއްގައި އަވަހާރަ ކޮށްލިތާ 2 އަހަރު ފުރުމުގެ މުނާސަބަތާއި ގުޅުވައިގެން ބޭއްވި މުބާރާތަކަށް ތައްޔާރު ކޮށްފައިވާ އެނިމޭޓެޑް ވީޑިއޯއެކެވެ.
އިރާނުގެ ރޫޙާނީ ލީޑަރުގެ އެތައް ބަހަކުން އޮޕަރޭޓްކުރާ އަމިއްލަފުޅު އެކައުންޓް އަދިވެސް ހުރީ އެކްޓިވް ކޮންނެވެ. ފާއިތުވެދިޔަ އަހަރުވެސް، ރޫޙާނީ ލީޑަރަށް ނިސްބަތްވާ ހަމަ މިބާތުގެ އެކައުންޓެއް، ޓްރަމްޕްގެ ކިބައިން ބަދަލު ހިފާނެކަމުގެ އިންޒާރު ދިނުމާއި ގުޅިގެން ޓުވިޓަރއިން ވަނީ ސަސްޕެންޑް ކޮށްފައެވެ.
"ހަމަ ކަށަވަރުންވެސް ބަދަލު ހިފާނަން" މި ނަމުގައި އެންމެ ފަހުން އާންމުކުރު ވީޑިއޯވަނީ ޚާމަނެއިގެ ރަސްމީ ވެބްސައިޓުގައިވެސް އާންމު ކޮށްފައެވެ.
ޓުވިޓަރއިން ބުނެފައިވަނި އެ ކުންފުނީގެ އެންމެ މުހިންމު އަމާޒަކީ ފަރުދުންގެ ރައްކާތެރިކަމާއި، އަދި އެ ޕްލެޓްފޯމުގައި ދެކެވޭ ވާހަކަތަކަކީ ރައްކާތެެރި ދުޅަހެޔޮ ވާހަކަތަކަކަށް ހެދުން ކަމުގައެވެ. އަދި ބުނެފައިވަނީ، ބިރުދެއްކުމާއި ނާޖާއިޒު ގޮތުގައި އެ ޕްލެޓްފޯމް ބޭނުން ކުރުމާއި ދެކޮޅަށް އެ ކުންފުނިން އެކުލަވާލާފައިވާ ސިޔާސަތު ވަރަށް ސާފުކޮށް ފެންނާން ހުންނާނެ ކަމަށާއި، މި ސިޔާސަތުތަކާއި ޚިލާފްވާ ހުރިހާ އެކައުންޓަކާއި ދެކޮޅަށްވެސް ފިޔަވަޅު އަޅަމުން ގެންދާނެ ކަމަށެވެ.
ޓްރަމްޕްގެ އޯޑަރަށް، އެމެރިކާއިން ދިން ޑްރޯން ހަމަލާއެއްގައި ގައްސާމް ސުލައިމާނީ އަވަހާރަ ކޮށްލާފައިވަނީ، 2020ވަނަ އަހަރުގެ ޖެނުއަރީމަހުގެ 3 ވަނަ ދުވަހު، އިރާގުގެ ބަޢުދާދު އެއަރޕޯޓު ކައިރިންނެވެ.
މިމަހު ކުރީކޮޅު އިރާނުގެ މިހާރުގެ ރައީސް އިބުރާހިމް ރައީސީވަނީ، ސުލައިމާނީގެ މަރުގެ ބަދަލު ހިފުމުގެ ގޮތުން އެމެރިކާގެ ކުރީގެ ރައީސްގެ މައްޗަށް ޝަރީއަތް ހިންގާ، އަދި އޭނާގެ މައްޗަށް މަރުގެ ހުކުމް ތަންފީޒުކުރަން ޖެހޭނެ ކަމަށް ބުނެފައެވެ.
"އެހެން ނޫންކަމަށް ވާނަމަ އަހަރެން އެމެރިކާއަށް ހަނދާން ކޮށްދެން، ޝައްކު ނުކުރާތި.. އުއްމަތުގެ އަތްތަކުން ބަދަލު ހިފާނެ،" ދުނިޔޭގެ ހުރިހާ މުސްލިމުންނަށް އިޝާރާތް ކުރައްވާ ރައިސީ ވިދާޅުވެފައި ވެއެވެ.
