ރާއްޖެއިން އިތުރު 65 މީހަކު ކޯވިޑް-19އަށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ވިދާޅުވީ ހޮނިހިރުދުވަހުގެ 18:00އިން ފެށިގެން އާދީއްތަ ދުވަހުގެ 18:00އާ ހަމައަށް ރާއްޖެއިން އަލަށް ޕޮޒިޓިވްވި 65 މީހުންގެތެރޭގައި ހިމެނެނީ މާލެ ސަރަޙައްދުން ޕޮޒިޓިވްވި 54 މީހަކާއި އަތޮޅުތަކުން ޕޮޒިޓިވްވި 11މީހުން ކަމަށެވެ. މިއާއެކު މިހާތަނަށް ރާއްޖެއިން ކޯވިޑް-19އަށް ޕޮޒިޓިވްވި މީހުންގެ ޖުމުލަ ޢަދަދަކީ 10530 އެވެ.
ރާއްޖެއިން ކޯވިޑް-19އަށް ޕޮޒިޓިވްވި މީހުންގެ ތެރެއިން އަލަށް ބަލިން ރަނގަޅުވެފައި ވަނީ 54 މީހުންނެވެ. މިހާތަނަށް ބަލިން ރަނގަޅުވި މީހުންގެ ޢަދަދު ވަނީ 9364އަށް އަރާފައެވެ. ކޯވިޑް-19 ޖެހުނު މީހުންގެ ތެރެއިން 27 ދިވެހިންނާއި، 7 ބިދޭސީއަކު ހިމެނޭހެން މިހާތަނަށް ރާއްޖެއިން 34 މީހަކު ވަނީ މި ބަލީގައި ނިޔާވެފައެވެ.
މިވަގުތު މާލޭގެ އިތުރުން އަތޮޅުތެރެއިން ކޮވިޑް-19 އަށް ޕޮޒިޓިވްވާ ގިނަ މީހުންނަކީ، މާލެއިން ރަށްރަށަށް ދަތުރުކޮށް ކަރަންޓީނަށް ފޮނުވާފައިވާ މީހުންނެވެ. މުޖުތަމަޢުގެ ތެރެއިން އެންމެ ބޮޑަށް ބަލި ފެތުރެމުން ދަނީ ވެސް މާލޭގައެވެ.
އެޗްޕީއޭއިން ވިދާޅުވީ މިވަގުތު ރާއްޖޭގެ 21 ރަށެއްގައި އާއި 20 ރިސޯޓެއްގައި ކޮވިޑް-19 ވޭދަނަތައް ހުރި ކަމަށެވެ. ރިސޯޓުތަކުން މި ބައްޔަށް ޕޮޒިޓިވްވި މީހުންގެ ތެރޭގައި މިވަގުތު ފަރުވާ ހޯދާ 10 ފަތުރުވެރިޔަކާއި 16 މުވައްޒަފަކު އެބަތިއްބެވެ.
ކޮމެންޓު ފޮނުވާ