ނަފްރަތު އުފެދޭގޮތަށް މުސްލިމަކާ ދިމާއަށް ކާފަރެކޭ ބުނުން ކުށަކަށް ހަދަން ހުށައެޅިެ ބިލާއި ދީނަށް ފުރައްސާރަކުރުމަކީ ކުށެއްކަމަށް ކަނޑައަޅަން ހުށައެޅި ބިލު އެއްކޮށްލައިގެން ރައްޔިތުންގެ މަޖިލީހުގެ ޖުޑީޝަރީ ކޮމިޓީން ދިރާސާކޮށް ބިލުގެ ރިޕޯޓް ނިންމައިފިއެވެ.
ނަފުރަތުގެ ބިލު އެންމެ ފުރަތަމަ އޮތް ގޮތަށް ފާސްކުރުމަށް އެމްޑީޕީގެ ރައީސް މުހައްމަދު ނަޝީދު މަސައްކަތް ކުރިނަމަވެސް ރާއްޖޭގެ ގިނަ ދީނީ އިލްމުވެރިންނާއި، ކޯލިޝަން ބައިވެރިން ދެކޮޅު ހެދުމުން އެންމެ ފަހުން ސަރުކާރުންވަނީ މިބިލް އޮތްގޮތަށް ފާސްކުރުމަށް ދެކޮޅު ހައްދަވާފައެވެ.
އާއްމު ތަނެއްގައި މުސްލިމަކަށް ކާފަރެއްގެ ގޮތުގައި ސިފަކުރުން ފަދަ ނަފްރަތުގެ ޢަމަލު، ޖިނާއީ ކުށަކަށް ހެދުމަށް ސަރުކާރުން ޤާނޫނުލް ޢުޤޫބާތަށް ހުށައެޅި އިޞްލާހާއި ގުޅޭގޮތުން ރައީސް ވިދާޅުވީ، އެބިލު ފޮނުވުމަށްފަހު އެ ބިލަށް އިސްލާހްތަކެއް ގެންނަން ޖެހޭކަމަށް ގަބޫލުފުޅު ކުރެވިގެން ސަރުކާރުގެ ފަރާތުން އިސްލާހްތަކެއް ހުށަހަޅާފައިވާނެކަމަށެވެ. އަދި ކޮމިޓީ މަރުހަލާގައި ސަރުކާރުން ހުށަހެޅި ބައެއް އިސްލާހްތައް ހިމަނާފައިވާކަން ފާހަގަކުރައްވާ ރައީސް ވަނީ އެބިލު ފާސްވެގެން އަންނައިރު ހުށަހެޅިފައިވާ އިސްލާހުތަކާއެކު ފާސްވެގެން އައުމަކީ އުއްމީދެއްކަމަށެވެ.
އެބިލު މަޖިލީހުގެ ކޮމިޓީން ފާސްކޮށް ތަޅުމަށް ފޮނުވުމުން އަލުން ދިރާސާކުރުމަށް ބިލު އަނބުރާ ކޮމިޓީއަށް ފޮނުވާފައިވެއެވެ.
އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުންފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހެދުމަށް ގާނޫނުލްއުގޫބާތަށް ތުޅާދޫ ދާއިރާގެ މެމްބަރު ހިސާން ހުސެއިން ހުށައަޅައްވާފައިވާ ބިލަކީ، އެތައް ގޮތަކުން ގިނަ ބައެއްގެ ޚިޔާލުތަފާތުވުން އެބިލަކާ ގުޅޭގޮތުން ދިވެހި މުޖުތަމައުގެ ތެރޭގައި އުފެދިގެން ގޮސްފައިވާ ބިލެކެވެ.
އަދި މި ބިލް ވެގެން ދިޔައީ ފަހަކަށް އައިސް، މި ބިލާގުޅޭގޮތުން މުޅި މުޖުތަމަޢުގެ ގިނަ ބައެއްގެ ފާޑިކިއުން މިބިލަށް އަމާޒުވެ، ގިނަ އަދަދެއްގެ ކައުންސިލްތަކާއި، ޖަމިއްޔާ ޖަމާއަތްތަކާއި، ދިނީ އިލްމުވެރިންނާއި އަދި މީގެ އިތުރުން އެމްޑީޕީ ފިޔަވާ ރާއްޖޭގެ އެހެން ހުރިހާ ސިޔާސީ ޕާޓިތަކުންވެސް އެބިލަކާ ދެކޮޅަށް ފާޅުގައި ތެދުވި ބިލެއްކަމުގައެވެ.
ހަމަ އެފަދައިން، މުޖަތަމަޢުގެ އެތައް ގިންތިއަކުން މިބިލާ ދެކޮޅު ހަދަމުންދިޔައިރު، އެންމެ ބޮޑަށް ފާހަގަވާން އޮތް އަނެއްކަމަކީ، ރައްޔިތުންގެ މަޖިލީހުގެ ގިނަ އަދަދެއްގެ މެމްބަރުންވެސް މިބިލާ ފެށުނީއްސުރެ ދެކޮޅު ހައްދަވަމުން ގެންދަވާފައި ވާކަމެވެ. މީގެތެރޭގައި އެމްޑީޕީގެ ބައެއް މެމްބަރުންވެސް ހިމެނި ވަޑައިގަންނަވައެވެ.
މި ބިލާމެދު އާންމުންނާއި ދީނީ އިލްމުވެރިންގެ އެންމެ ބޮޑު ކަންބޮޑުވުމަށްވީ އޭގައި ނަފްރަތުގެ އަމަލަކަށްވާ ސަބަބު ތަސްސީލްވެފައި ނެތުމެއްވެ. އެހެންކަމުން ކޮމިޓީން މިހާރުވަނީ އެކަން ތަފްސީލްކޮށްދީފައެވެ. އެގޮތުން އިސްލާމްދީނުގެ އުސޫލުތައް ބަޔާންކޮށްދިނުމަކީ ކުށަކަށް ނުވާނެކަން، ސާފުކޮށް ބަޔާންކުރާ މާއްދާއެއް ބިލަށް އިތުރުކޮށްފައިވެއެވެ. މި ބިލު ތަފްސީލްކުރުމުގެ ގޮތުން ކޮމިޓީން ވަނީ ތަކްފީރުކުރުމަކީ ކޮބައިކަން އިތުރަށް ތަފްސީލުކޮށްދީފައެވެ. އެގޮތުން ބިލުގައިވާ އިބާރާތް، ކޮމިޓީން ވަނީ ވަރަށް ބޮޑަށް ބަދަލުކޮށްފައެވެ. އޭގައި މިހާރު އޮތްގޮތުން ޖިނާއީ ކުށަަކަށް ވާނީ ވަކި ޝަރުތުތަކެއް ހަމަނުވާ ހާލަތްތަކުގައި ކުރާ ތުހުމަތަށްކަމަށް ބަޔާންކޮށްފައިވެއެވެ.
މިގޮތުން އޭގެ ފުރަތަމަ ހާލަތަކީ ދީނީ އިލްމުވެރިންގެ މެދުގައި ރައުޔު ތަފާތުވެފައިވާ މައްސަލަައެއްގައި، އޭގެ ތެރެއިން އަހުލުއް ސުންނާ ވަލް ޖަމާއާގެ މުއުތަބަރު ރައުޔަކާ ޚިލާފު ނުވާ ގޮތަށް ދައްކާ ވާހަަކައަކާ ގުޅުވައި، ތުހުމަތު ކުރާ ހާލަތްކަމަށާއި، އެ ހާލަތުގައި އެމީހާ ދެއްކި ވާހަކަޔާ ގުޅުވައި، އޭނާއަކީ އިސްލާމްދީނާ ޚިލާފަށް، އުޅޭ މީހެއް ކަމަށް ނުވަތަ ދީނާ ދެކޮޅު މީހެއް ކަމަށް އާއްްމު ތަނެއްގައި ސިފަކުރުމަކީ ކުށެއްކަމަށް ބަޔާންކޮށްފައިވެއެވެ.
އަދި ދެވަނަ ހާާލަތަކީ ކަނޑައެޅިގެން ކުފުރުގެ އަމަލެއް ނުކުރާހާ ހިނދަކު ނުވަތަ ކުފުރުގެ ބަހެއް ފާޅުނުކުރާހާ ހިނދަކު ނުވަތަ ފާޅުގައި ދީނުން ބޭރުވެ މުރުތައްދު ނުވާހާ ހިނދަކު ކާފަރެއް ނުވަތަ މުރުތައްދެއްގެ ގޮތުގައި ސިފަކުރާ ހާލަތްކަމަށްވެސް ބުނެފައިވެއެވެ.
އެބިލަށް އަޟާޒުވ ފަޑުކިޔުންތަކާއެކު ދީނަށް ފުރައްސާރަކުރުމަކީ ކުށެއްކަމަށް ކަނޑައަޅަން ނިންމައި އިތުރު އިސްލާހެއް ޤާނޫނުލް އުޤޫބާތަށް ސަރުކާރުން ހުށައަޅާފައިވާއިރު އެ އިޞްލާހުގެ ބިލުވެސް ވަނީ އިތުރަށް ތަފްސީލްކޮށްދީފައެވެ.
މިގޮތުން ކޮމިޓީ ރިޕޯޓްގައިވާގޮތުން އިސްލާމްދީނަށް ތައުހީނުކުރުމުގެ ކުށް މިހާރު މާނަކޮށްފައި އޮތީ "މުއާސަލާތީ ވަސީލަތެއް ބޭނުންކޮށްގެން ނުވަތަ އެ ނޫންވެސް ގޮތަކަށް އިސްލާމްދީނަށް ތައުހީނުކުރުމުގެ ނިޔަތުގައި ބަހުން ނުވަތަ އަމަލުން މާތް ﷲ އާއި މެދު ނުވަތަ ކީރިތި ރަސޫލާގެ ސުންނާތާ މެދު ނުވަތަ އިސްލާމްދީނާ މެދު ދޮގު މައުލޫމާތެއް ފެތުރުން ނުވަތަ އެފަދަ އަމަލެއްގައި ބައިވެރިވުން ތަފްސީލްކޮށްދެމުން ބަޔާންކޮށްފައިވެއެވެ.
ކޮމިޓީ ރިޕޯޓް ކޮމިޓީން ތައްޔާރުކޯށް ފާސްކޮށް މިހާރު ވަނީ މަޖިލީހުގެ ތަޅުމަށް އެޖެންޑާކުރުމަށް ފޮނުވާފައެވެ.
