މާލޭ ސިޓީގައި އާންމު ތަންތާންގައި ދުންފަތުގެ އިސްތިއުމާލުކުރުން މަނާކޮށް އެކަން ހުއްދަކުރެވޭ ހާއްސަ ޖާގަތަކެއް އެކަށައެޅުމާމެދު މާލޭ ސިޓީ ރަށްވެހިންގެ ހިޔާލަށް ހުޅުވާލައިފިއެވެ.
މާލެ ސިޓީ ކައުންސިލުން ބުނެފައިވަނީ މިނިސްޓްރީ އޮފް ހެލްތާއި، ޓޮބޭކޯ ކޮންޓްރޯލް ބޯޑް އޮފް މޯލްޑިވްސްގެ ފަންނީ ލަފާގެ މައްޗަށް، މާލޭގެ ޢާންމު ތަންތާނގައި ދުންފަތުގެ އިސްތިޢުމާލުކުރުން މަނާކުރުމަށް އަޅާ ފިޔަވަޅާއި ގުޅޭ ސަރވޭގެ ބޭނުމަކީ މާލޭ ސިޓީގައި ހުރިހާ ޢާންމު ތަންތާންގައި ދުންފަތުގެ އިސްތިޢުމާލުކުރުން މަނާކޮށް، އެކަން ހުއްދަކުރެވޭ ޚާއްސަ ޖާގަތަކެއް އެކަށައެޅުމާމެދު މާލޭ ސިޓީ ރަށްވެހިންގެ ޚިޔާލު ހޯދުން ކަމަށެވެ. މިސާވޭގެ ބައިވެރިންނަކީ ކާކުކަން އެއްވެސް ފަރާތަކަށް ނުފެންނާނެއެވެ. އަދި، ދެއްވާ ޖަވާބުތައް ސިއްރު ކުރެވޭނެކަމަށް މާލެ ސިޓީ ކައުންސިލުން ވަނީ ބުނެފައެވެ.
ސިއްޙަތު ސަލާމަތުން ބެހެއްޓުމަކީ ކޮންމެ އިންސާނަކަށް ލިބިގެންވާ ޙައްޤެކެވެ. ސިއްޙަތު ފަސާދަކުރުވަނިވި ނުރައްކާތަކުން ރައްޔިތުން ސަލާމަތްކޮށް، ދުޅަހެޔޮކަމުގައި ދެމިހުރުމުގެ އިންސާނީ ޙައްޤު ކަށަވަރުކުރުމަކީ ދައުލަތުގެ މައްޗަށް ލާޒިމުކަމެކެވެ.
ޒަމާނީ ސައަންސުގެ ޢިލްމުން ދައްކާ ގޮތުގައި، ދުންފަތާއި ދުންފަތުގެ އިސްތިޢުމާލުކުރުމުން އަރާ ވިހަ ދުމުގައި ހިމެނޭ ނުރައްކާތެރި މާއްދާތަކުގެ ސަބަބުން ފުރާނައަށް ނުރައްކާތެރިކުރުވާ ބަލިތައް ޖެހެއެވެ. އަދި ޢާންމު ތަންތާންގައާއި، މަސައްކަތުގެ މާހައުލުތަކުގައި ދުންފަތުގެ އިސްތިޢުމާލުކުރުން މަނާކުރުމުން ދުންފަތާއި، އޭގެ ނުސީދާ ދުމުގެ ސަބަބުން ނުރައްކާތެރި ބަލިތައް ޖެހޭ މިންވަރާއި، މީހުން މަރުވާ މިންވަރު މަދުކުރެވިފައިވެއެވެ. ވީހާވެސް ގިނަ އާއްމު ތަންތާންގައި ދުންފަތުގެ އިސްތިޢުމާލުކުރުން މަނާކޮށް ޤަވާއިދުތައް ރަނގަޅަށް ތަންފީޒު ކުރުމުން ދުންފަތުގެ އިސްތިޢުމާލުކުރާ ފަރާތްތަކަށް އެކަން ހުއްޓާލުމަށް ހިތްވަރު ލިބެގެންދެއެވެ.
މިގޮތުން، ދުންފަތުގެ ވިހަ ދުމުން ސަލާމަތްވެ، ދުންފަތުގެ އިސްތިޢުމާލުނުކުރާ، އަދި ކުރާ އެއްމެނަށް ވެސް މަގުތަކާއި، ޢާންމު ތަންތާންގައި ރައްކާތެރިކަމާއި އެކުގައި ހަރަކާތްތެރިވެ އުޅެވޭނެ މާޙައުލެއް ޤާއިމުކުރުމުގެ ގޮތުން، ކަނޑައެޅިފައިވާ ވަކިވަކި ޖާގަތަކުގައި މެނުވީ ދުންފަތުގެ އިސްތިޢުމާލުކުރުން މަނާކުރެވޭނެއެވެ.
މިދެންނެވި މަޤްސަދު ހާޞިލްކުރުމްއްޓަކާއި މާލޭގައި ދުންފަތުގެ އިސްތިޢުމާލުކުރުން މަނާ ސަރަހައްދުތައް ސާފުކޮށް އެނގެން ހުންނާނެ ގޮތަށް މަނާކަން އަންގައިދޭ ބޯޑު ހަރުކުރެވޭނެއެވެ. އަދި، އެކި ސަރަޙައްދުތަކުގައި ދުންފަތުގެ އިސްތިޢުމާލުކުރުން ހުއްދަކުރެވޭ ތަންތަން ކަނޑައަޅައި، ފާހަގަކުރެވޭނެކަމަށް ސިޓީ ކައުންސިލުން ބުނެފައިވެއެވެ.
