ހޮނިހިރު ދުވަހު ބައްވާ އެމްޑީޕީގެ ޤައުމީ މަޖިލިސް އިންތިޚާބުގައި އެމްއެމްޕީއާރުސީގެ ޚިޔާނާތުގެ މައްސަލަ ބަލަން ހިތްވަރުހުރި މެމްބަރުން ހޮވިއްޖެނަމަ، މިމައްސަލަ ކޮޅެއްގައި ޖެހެންދެން މަގުމަތީގައި މުޒާރާކުރަން އެމްޑީޕީގެ ޤައުމީ މަޖިލީހުން ފާސްކުރާނެކަމަށް ރައްޔިތުންގެ މަޖިލީހުގެ ބިލެއްދޫ ދާއިރާގެ މެމްބަރު އަހުމަދު ހަލީމް (ދޮންބިލޭ) ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ހަލީމް ވިދާޅުވީ އެމްއެމްޕީއާރުސީގެ ޚިޔާނާތުގެ މައްސަލަ ނުބެލި އެމްޑީޕީއަށާއި، މިސަރުކާރަށް އޮތް އިތުބާރާއިމެދު ރައްޔިތުން ސުވާލު އުފައްދާ ކަމަށެވެ. އެމްޑީޕީގެ އާންމު މެމްބަރުންގެ އެންމެ ބޮޑު އެދުމަކީ މިކަން ބަލައި ރައްޔިތުންގެ ފައިސާ ހޯދުންކަމަށްވާއިރު، މިމައްސަލަ އެމްޑީޕީ ނޫންބަޔަކަށް ނުބެލޭނެކަމަށް އޭނާ ވިދާޅުވިއެވެ.
ހަލީމް ވިދާޅުވީ އެމްއެމްޕީއާރުސީގެ ޚިޔާނާތުގެ ފައިސާގައި ޖެހުނު މީހުންގެ ތެރެއިން ބައެއް މީހުން މިއިންތިޚާބުގައި ވާދަ ކުރާކަމަށެވެ. ނަމަވެސް އެމްޑީޕީގެ މެމްބަރުން ވޯޓު ދެއްވާއިރު ބަލަންވީ މިމައްސަލަ ބަލަންކެރޭ މީހުން އިންތިޚާބު ކުރުމަށް ކަމަށެވެ. މިކަމުގައި ބައިވެރިވެފައިވާ މާލެ ސިޓީއަށް ކުރިމަތިލާފައިވާ އަކްރަމް ކަމާލުއްދީންފަދަ ބޭފުޅުން ހޮވައިގެން ކުރެވޭނެ އެއްވެސް ކަމެއް ނޯންނާނެކަމަށް ދޮންބިލޭ ވިދާޅުވިއެވެ.
އެމްޑީޕީ ޤައުމީ މަޖިލީހަކީ ވަރަށް ހީނުކުރާ ކަންތައްތައް ވުޖޫދު ކުރުވި ބައެއް. ހިތްވަރާއެކީ މަސައްކަތް ކުރި ބައެއް. އަޅުގަނޑު މިގޮވާލަނީ އެމްޑީޕީގެ ޤައުމީ މަޖިލީހަށް މިފަހަރު އެމްއެމްޕީއާރުސީގެ މައްސަލަ ބަލާނެ ހިތްވަރުހުރި މެމްބަރުން ހޮވިއްޖެކަމަށް ވަންޏާ، އަޅުގަނޑުމެން އިރާދަކުރެއްވިއްޔާ މަގުމައްޗަށް ނިކުމެ، އެމްއެމްޕީއާރުސީގެ މައްސަލައަށް އިންސާފު ލިބެންދެން ޤައުމީ މަޖިލީހުން އަޅުގަނޑުމެން ފާކުރާނަން ޤައުމީ މަޖިލީހުން އަބަދު މުޒާހަރާގައި މަގުމަތީގައި ތިބެން.
– ދޮންބިލޭ ވިދާޅުވިއެވެ.
ހޮނިހިރު ދުވަހު ބޭއްވުމަށް ހަމަޖެހިފައިވާ، އެމްޑީޕީގެ އެތެރޭގެ އިންތިޚާބުގައި 733 ކެނޑިޑޭޓުން ވާދަކުރެއެވެ. މީގެ ތެރެއިން 165 ކެނޑިޑޭޓަކު ވަނީ ވޯޓަކާއި ނުލައި އިންތިޚާބު ވެފައެވެ. އެމްޑީޕީގެ އިންތިޚާބާބެހޭ ޤަވާއިދު ބުނާގޮތުން ޤައުމީ މަޖިލިސް އިންތިޚާބުގައި ކުރިމަތިލާ ދާއިރާތަކަށް ހޮވަންޖެހޭ ޢަދަދަށް ކުރިމަތިލައިފިނަމަ އެކެނޑިޑޭޓަކު ވޯޓަކާއި ނުލައި އިންތިޚާބުވާނެއެވެ.
