މާލެ ސިޓީގައި އައްޔަންކުރާ ބުލޮކް ވެރިޔާއަށް ކުރިމަތިލުމަށް އެދި ފޯމް ހުށަހެޅުމުގެ މުއްދަތު އިތުރުކޮށްފިއެވެ.
ސިޓީ ކައުންސިލުން ބުނެފައިވަނީ ފޯމް ހުށައެޅުމުގެ މުއްދަތު އިތުރުކޮށްދީފައިވަނީ ގިނަ ފަރާތްތަކެއްގެ އެދުމުގެ މަތިންކަމަށެވެ. ކޮންމެ ބްލްކޮއަކަށް ވެރިއަކު އައްޔަން ކުރުމަށް ސިޓީ ކައުންސިލުން ނިންމަވާފައިވަނީ ސިޓީ ކައުންސިލުގެ މަސައްކަތްތައް ރައްޔިތުންނާ ވީހާ ވެސް ގާތުން ކުރިއަށް ގެންދިއުމުގެ ބޭނުމުގައިއެވެ. ކޮންމެ ބްލޮކަކަށް ވެރިން އިންތަޚާބުކުރުމަށް ނިންމާފައިވަނީ އަންނަމަހުގެ ތެރޭގައެވެ. ކުރިން ފޯމް ހުށައެޅުމުގެ މުއްދަތު މިމަހުގެ 16 އަށް އޮތްނަމަވެސް މިހާރު އެ މުއްދަތު ވަނީ އަންނަމަހުގެ 17ވަނަ ދުވަހަށް އިތުރުކޮށްދީފައެވެ.
ބްލޮކް ވެރިޔާގެ މަސްއޫލުލިއްޔަތުތަކުގެތެރޭގައި ބުލޮކުގައި ދިރިއުޅޭ ހުރިހާ ފަރާތްތަކެއްގެ ދިރިއުޅުމުގެ ހާލަތު އެނގުމާއި، ކައުންސިލުން އެދިއްޖެ ކޮންމެ ފަހަރަކު އެ މައުލޫމާތު ހިއްސާކުރުމާއި، ބުލޮކުގައި ދިރިއުޅޭ ފަރާތްތައް، ދިރިއުޅެމުންދާ ތަންތަނުގެ ފުރިހަމަ މައުލޫމާތު އެނގުމާއި، ބުލޮކުގައި ދިރިއުޅޭ ފަރާތްތަކަށް ދިމާވާ މައްސަލަތައް ހޯދައި އެކަން ހައްލު ކުރުމަށް އެކަމުގެ މައުލޫމާތާއި، އެކަން ހައްލުކުރުމަށް ކުރެވިދާނެ ކަންތައްތަކަކީ ކޮބައިކަން ކައުންސިލަށް ހުށަހެޅުން ހިމެނެއެވެ.
އަދި ބުލޮކުގައި ދިރިއުޅޭ ފަރާތްތަކުގެ މައުލޫމާތު ސިޓީ ކައުންސިލުން ކަނޑައަޅާ ގޮތެއްގެމަތިން ކައުންސިލާއި ހިއްސާކުރުމާއި، ބުލޮކުގައި ދިރިއުޅޭ ފަރާތްތަކުގެ ތަރައްޤީއާއި ކުރިއެރުމަށް ކައުންސިލުން ހަވާލުކުރާ މަސައްކަތްކުރުމާއި، ކައުންސިލުން ކުރިއަށްގެންދަން ބޭނުންވާ ޚިޔާލު ހޯދުމުގެ ސަރވޭތައް ކުރުމުގައި އިސްވެ އެފަދަ ކަންކަމުގައި ހަރަކާތްތެރިވެ އެހީތެރިކަން ފޯރުކޮށް ދިނުމަކީވެސް ބްލޮކް ވެރިޔާގެ މަސްއޫލިއްޔަތެކެވެ.
މީގެ އިތުރުން ބުލޮކުގައި ދިރިއުޅޭ ރައްޔިތުންގެ ލާބައާއި މަންފާއަށް މޭޔަރ އާއި ކައުންސިލަރުން އެދޭ ކަންކަމުގައި އެހީތެރިވެދިނުމާއި، މާލޭ ސިޓީގެ ތަރައްޤީއަށް ކައުންސިލުން ކުރާ ކަންކަމުގައި ބުލޮކުގެ ބައިވެރިވުން ފޯރުކޮށްދިނުމުގައި އިސްވެ މަސައްކަތްކުރުމާއި، ކައުންސިލްގެ ސްޓްރެޓެޖިކް އެކްޝަން ޕްލޭން ތަންފީޒުކުރުމުގައި ކައުންސިލަށް އެހީތެރިކަން ފޯރުކޮށްދިނުމާއި، ބުލޮކުގައި އިމަޖެންސީ ހާލަތެއް ދިމާވެއްޖެނަމަ އެކަމުގައި ކައުންސިލަށް އެހީތެރިކަން ދިނުމަކީވެސް ބްލޮކްވެރިޔާގެ މަސްއޫލިއްޔަތެއް ކަމަށް ސިޓީކައުންސިލުން ބުނެއެވެ.
