ވެމްކޯ ސައިޓްގެ ދޮރުމައްޗަށް ސިޓީ ކައުންސިލްގެ ކުނި ލޮރީ އަޅާލި މައްސަލާގައި، މާލެ ސިޓީ ކައުންސިލްގެ ކުރީގެ މެންބަރު އަދި މިހާރު މައްޗަންގޮޅި އުތުރު ދާއިރާގެ މެންބަރު މުޙައްމަދު ރަޝީދު (ބޯދިގު) ފާޑުވިދާޅުވެއްޖެއެވެ.

މާލޭގައި ރަޖިސްޓްރީނުކޮށް ހުރި ގެތަކުން ކުނިނެގުން ވެމްކޯއިން ހުއްޓާލުމާއި ގުޅިގެން މާލޭގެ އެކި ސަރަހައްދުތަކުގައި ހުރި ކުނިތައް ސިޓީ ކައުންސިލުން ނެގުމަށްފަހު އިންޑަސްޓްރިއަލް ޒޯން ސަރަހައްދުގައި ހުންނަ ވެމްކޯގެ ސައިޓު ދޮރުމައްޗަށް އިއްޔެ ވަނީ ކުނި އަޅާފައެވެ.

މިކަމަށް ފާޑުވިދާޅުވެ ބޯދިގު ވަނީ އެއީ ވަރަށް ދަށު ދަރަޖައިގެ ޢަމަލެއްކަމަށް ސިފަކުރައްވާފއެވެ. އަދި ރައީސް ޔާމީންގެ ވެރިކަމުގައި ސިޓީކައުންސިލަށް މާބޮޑެތި ދަތިތައް ލުރިމަތިކުރުވިއިރުވެސް އެފަދަ ދަށު ދަރަޖައިގެ ކަމެއް ނުހިންގާކަމަށް އޭނާ ވިދާޅުވިއެވެ. އޭނާ ވަނީ  އެ އަމަލު ބަލައި ނުގަނެވޭނެކަމަށް ވިދާޅުވެ ފިނޑި އަމަލެއްގެ ގޮތުގައި ސިފަކުރައްވާފައެވެ.

ވަރަށްވެސް ދަށުދަރަޖައިގެ ޢަމަލެއް. ޔާމީންގެ ވެރިކަމުގައި މާލެ ސިޓީ ކައުންސިލް އުޅެންޖެހުނީ މާބޮޑަށްވެސް ދަތީގަ، ކެނޑިނޭޅި ޖެއްސުން ނޫންކަމެއް ނުކުރޭ، އެހެނަސް މިފަދަ ހުތުރު ކަމެއް ހިނގާފައެއް ނޯންނާނެ.

– މެންބަރު މުޙައްމަދު ރަޝީދު

Varah ves dhashu dharajaige amaleh. #Yameen ge verikamugai MCC ulhenjehunee maabodahves dhatheega, kendineylhi jessun noon kameh nukurey ehenas mifadha huthuru kameh higaafaeh noannane.#Balaehnuganeveyne #FindiAmaleh https://t.co/Z4KFzS1yAM

— Mohamed Rasheed (@boadhigu) September 16, 2021

މާލޭގެ ކުނީގެ މައްސަލަ ހައްލުކުރުމަށް ކުރީ ސަރުކާރުގައި އުފެއްދި ވެމްކޯއާއި ސިޓީ ކައުންސިލާ ދެމެދު ވަނީ ވަރަށް ބޮޑަށް ޚިޔާލުތަފާތުވެފައެވެ. ކޯވިޑް-19އާއި ގުޅިގެން ގޭބީސީތަކުން ކުނިނަގަމުން އައީ އެ ގެއެއްގެ ދިރުމަތިންނެވެ. ނަމަވެސް މިމަހު 15 އިން ފެށިގެން ގޭބީސީތަކުން ކުނިނަގަމުންދާނެކަމަށާއި، ރަޖިސްޓްރީނުކޮށް ހުރި ގޭބީސީތަކުގެ ކުނި ނުނަގާނެކަމުގެ އިންޒާރު ވެމްކޯއިން ދީފައިވެއެވެ. އަދި ރޭ ވަރަށް ގިނަ ގޭގެއިން ދޮރުމައްޗަށް ކުނިތައް ނެރެފައި ހުއްޓެވެ. ނަމަވެސް ވެމްކޯއިން އެކުނިތައް ނަގާފައިނުވުމުން، މާލެ ސާފުކޮށް، އެކުނިތައް ނެގުމަށް ނުކުތީ ސިޓީ ކައުންސިލުންނެވެ.

ސިޓީ ކައުންސިލުން މާލޭގެ އެކިސަރަހައްދުތަކުން ކުނި ނެގުމަށްފަހު ވެމްކޯ ސައިޓަށް ގެންދިއުމުން ބާޖަށް ކުނި އެޅުމަށް ފުރުޞަތު ދިނެވެ. މިގޮތުން އެއްލޮރީގެ ކުނި ބާޖަށް އެޅުމަށްފަހު ދެވަނަ ލޮރީ ވެމްކޯގެ ސައިޓަށް ވަނުމަށް ހުއްދަ ދީފައިނުވާކަމަށް ސިޓީ ކައުންސިލުން ބުންޏެވެ. މިކަމާއި ގުޅިގެން ސިޓީ ކައުންސިލްގެ ކުނި ލޮރީވަނީ ވެމްކޯ ސައިޓް ދޮރުމައްޗަށް އަޅާލާފައެވެ. މި ވީޑިއޯ އަންނަނީ ސޯޝަލް މީޑިއާގައި ދައުރުވަމުންނެވެ.

So @MaleCitymv dropped off all waste in-front of @WAMCOmv gate. Very professional communication between the two I see …. ? pic.twitter.com/L7AUMTJic2

— Mauman (@mauman707) September 16, 2021

ކޯވިޑާއި ގުޅިގެން ގޭގެއިން ކުނި ނެގުން މެދު ކަނޑާލުމަށްފަހު އިއްޔެއިން ފެށިގެން ވެމްކޯއިން ބުނެފައިވަނީ ކުނި ނަގާނީ ގޭގެއަށް ވަދެކަމަށެވެ. ނަމަވެސް އިއްޔެ ގިނަ ގޭގޭގެ މަގުތަކުގައި ކުނި ނުނަގައި ހުރުމުން ގިނަ ބައެއްގެ ފާޑުކިޔުންވަނީ މާލެ ސިޓީ ކައުންސިލަށް އަމާޒުވެފައެވެ.

މިކަމާއިގުޅިގެން ޑރ.މުއިއްޒު ވިދާޅުވީ މާލެ ސިޓީ ކައުންސިލަށް ޖެއްސުން ކުރުމަށްޓަކައި، މާލެތެރޭގައި ކުނި ނުނަގައި، މާލެ ގޮޑަކަށް ހެދުމުގެ ފުރުސަތު ވެމްކޯއަށް ނުދެއްވާނެކަމަށެވެ. މިކަމުގައި މާލެ ސިޓީ ކައުންސިލުން އަޅަންޖެހޭ ކޮންމެ ފިޔަވަޅެއް އެޅުމަށް ސިޓީ ކައުންސިލުން ފަސް ނުޖެހޭނެކަމަށް ޑރ.މުއިއްޒު ވަނީ ވިދާޅުވެފައެވެ.

މުއިއްޒު ވަނީ މީގެ ކުރިންވެސް ވެމްކޯއަށް ސިޓީ ކައުންސިލުން ބޮޑު ބަޖެޓެއް ދީގެން ކުނި ނެގުމުގެ ކަންކަން ކުރާއިރުވެސް އެކަން ވެމްކޯއިން ނުކުރާކަން ފާހަގަކޮށްފައެވެ. ވެމްކޯއިން އިއްޔެ ކުނި ނެގުމަށް ގެނައި ބަދަލާއިއެކު ކުނި ނަގާނެ ގަޑިތަކެއްގެ ގޮތުގައި ވެމްކޯއިން ހަމަޖައްސާފައިވަނީ ކޮންމެ ދުވަހެއްގެ އިރުއޮއްސި 6 ކުން ފެށިގެން ރޭގަނޑުގެ 11 ޖެހުމާހަމައަށެވެ.

އިއްޔެއިން ފެށިގެން ކޮންމެ ގޭބިސީއެއްގެ ކޮންމެ ފަންގިފިލާއަކުން ކުނި ނެގުމުގެ މަސައްކަތްކުރުމަށް ހަމަޖެހިފައިނަމަވެސް މިމަސައްކަތް އަދި މާ ރަނގަޅަކަށް ނުދާކަމަށް ގިނަ ބަޔަކު ދަނީ ބުނަމުންނެވެ.