ސަރުކާރުން ތަރައްޤީގެ މަޝްރޫޢުތައް ހިންގަވާއިރު، ހުރިހާ ދާއިރާއަކަށްވެސް ހަމަހަމަ ކަމާއި އިންސާފުވެރިކަމާއިއެކު ކަންކަން ކޮށްދެއްވުމަށް، ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު އަހުމަދު ހަލީމް (ދޮންބިލޭ) ގޮވާލައްވައިފިއެވެ.
އަލިފުށީގައި އެއާޕޯޓެއް އެޅުމަށް ނިންމި ނިންމާއި ގުޅިގެން އިއްޔެ އޮތް ރައްޔިތުންގެ މަޖިލީހުގެ ޖަލްސާގައި ދެކެވުނު ވާހަތަކަށް ތާއީދު ކުރައްވައި ހަލީމް ވިދާޅުވީ އެއްވެސް ދާއިރާއެއް ތަފާތު ކުރުމަކީ ބަލައި ގަނެވޭނެކަމެއް ނޫންކަމަށެވެ. ކޮންމެ ދާއިރާއެއްގެވެސް ރައްޔިތުން ބޭނުންވަނީ ތަރައްޤީ ކަމަށާއި، އަދުލުވެރިކަމާއި އިންސާފާއިއެކު ކަންކަން ނުކުރެވޭނަމަ، އެކަމުގެ ކަންބޮޑުވުން އޮންނާނެކަމަށް ހަލީމް ވިދާޅުވިއެވެ.
އަޅުގަނޑު ގޮވާލަން ސަރުކާރަށް ހަމަހަމަ ކަމާއި އިންސާފުވެރިކަމާއިއެކީގައި ހުރިހާ ދާއިރާއަކަށްވެސް ކަންކަން ކުރުމަކީ މުހިންމުކަމެއް. މާލޭގެ ރައްޔިތުންނަށް ބޯހިޔާވަހިކަންލިބި ވެށި ފަހި ޕްރޮގްރާމް މިހާރުން މިހާރަށް ފެއްޓުމަށް ގޮވާލަން.
– ހަލީމް ވިދާޅުވިއެވެ.
އޭނާ ވިދާޅުވީ ބިލެއްދޫ ދާއިރާގައިވެސް ތަރައްޤީގެ ގިނަކަންތައްތަކެއް ބަޖެޓް ކުރެވިފައި ވީނަމަވެސް އެކަންކަން ކުރިއަށް ނުދާތީ ރައްޔިތުންގެ ގިނަ ކަންބޮޑުވުންތަކެއް ލިބެމުންދާކަމަށެވެ. ބެޖެޓުގައި ނުވެސް ނެތްކަމެއް ކުއްލިއަކަށް ވުޖޫދުވެ، ބޮޑެތި ބިޔަަ މަޝްރޫޢުތައް ހިންގުމަކީ އެހެން ދާއިރާތަކަށް ވެވޭ ބޭއިންސާފެއްކަމަށް ހަލީމް ވިދާޅުވިއެވެ. އަދި މިއީ ކޮންމެ މެމްބަރަކުވެސް ޖަވާބުދާރީވާންޖެހޭ ކަމަކަށްވާއިރު މިކަމަށް ޖަވާބުދާރީ ވެވޭނެ ގޮތަކަށް ސަރުކާރުން ކަންކަން ކުރުމަށް ހަލީމް ގޮވާލެއްވިއެވެ.
ކުއްލިއަކަށް ބަޖެޓުގައި ނުވެސް ހުންނަކަންކަން ރާސްލާފަ އެހެން ނިންމަމުންދާތީ އަޅުގަނޑުމެންގެ ދާއިރާއިންވެސް އެބަޝަކުވާކުރޭ. ކޮބައިތޯ ކީއްވެތޯ އަޅުގަނޑުމެންގެ ދާއިރާގައި ބަޖެޓްކުރެވިފައިވާ ކަންކަން ސޮއި ނުކުރެވި ނުނިމި މި އޮންނަނީ. ކުއްލިއަކަށް ބެޖެޓުގައި ނުވެސްނެތް، ދުވަހަކު ނުވެސް އިވޭ އަޑުތަކެއް، ރާއްލާފައި ސޮއިކޮށް ބޮޑެތި އަދަދުތައް ހުށަހެޅިގެން މިދަނީ. މިޔަށް ޖަވާބުދާރީވާން އަޅުގަނޑުމެންޖެހޭ.
– ހަލީމް ވިދާޅުވިއެވެ.
މެމްބަރުންގެ ވާހަތަކާއި ގުޅިގެން ރޭ އަލިފުށީގައި ބޭއްވި ޖަލްސާގައި ވާހަކަ ދައްކަވަމުން ބިގޭ ވިދާޅުވެފައިވަނީ ރައްޔިތުންގެ މަޖިލީހުގެ އިންތިޚާބުގައި އޭނާގެ އެންމެ ބޮޑު ވައުދަކަށް ވެސް އޮތް އެއް ކަމަކީ އަލިފުށީގެ ދަތުރުފަތުރުގެ އިންތިޒާމުތައް ވަރުގަދަ ކުރުން ކަމަށެވެ. އެ ގޮތުން އެއާޕޯޓް މަޝްރޫއު ވާނީ އަލިފުށި ރައްޔިތުންނަށް ނުހަނު މުހިއްމު މަޝްރޫއަކަށް ކަމަށް އޭނާ ވިދާޅުވިއެވެ.
އަލިފުށީގައި އެއާޕޯޓެއް އެޅުމުގެ މަސައްކަތް ހަވާލުކޮށްގެން އަމާޒުވަމުންދާ ފާޑުކިއުންތަކަށް ރައްދު ދެއްވައި ބިގޭ ވިދާޅުވީ މި ކަމާ ގުޅިގެން ބަޔަކު އޭނާއާއި އަލިފުއްޓާއި ވެސް ޒާތީ ގޮތުން ދިމާ ކުރަމުންދާ ކަމަށާއި އެއީ އޭނާ ނުހަނު ކަންބޮޑުވާ މައްސަލައެއް ކަމަށެވެ. އަލިފުށީ އެއާޕޯޓް މަޝްރޫޢުއަކީ 451.6 މިލިއަނަށްވުރެ ގިނަ ރުފިޔާގެ މަޝްރޫޢުއެކެވެ.
