ކުރިއަށް އޮތް 2023 ވަނަ އަހަރުގެ ރިޔާސީ އިންތިޚާބުގައި ވެރިކަމަށް އައުމަށް އެކި ބޭފުޅުން ކުރައްވާ މަސައްކަތުގައި މާލޭގެ ރައްޔިތުންގެ ހުށަހެޅުމަކީ "ނޯގޯތި، ނޯވޯޓު" ކަމުގައި މާލެ ސިޓީގެ ބައެއް ރައްޔިތުން ބުނެފިއެވެ.
މާލެ ސިޓީ ކައުންސިލުން މާލޭގެ ރައްޔިތުންގެ ބޯހިޔާވަހިކަމާއި ގުޅޭގޮތުން ބޭއްވި ބައްދަލުވުމުގައި މާލޭގެ ގިނަ ރައްޔިތުން ތަކެއް ވަނީ އެބޭފުޅުންގެ ޝުޢޫރުތައް ފާޅު ކުރައްވާފައެވެ. މި ބައްދަލުވުމުގައި ގޯތިގެދޮރާބެހޭގޮތުން ވަކާލާތުކުރުމަށް އުފެދިފައިވާ ޖަމިއްޔާތަކާ ޖަމާޢަތްތަކުންވެސް ވަނީ ބައިވެރިވެ އެބޭފުޅުންގެ ޝުއޢޫރުތައްވެސް ފާޅުކޮށްފައެވެ.
މިބައްދަލުވުމުގައި ވާހަކަ ދެއްކެވި މެމްބަރުންގެ ތެރެއިން މެމްބަރަކު ވިދާޅުވީ މާލޭގެ ރައްޔިތުންނަށް މިވީ 15 ވަރަކަށް އަހަރުގެ ތެރޭގައި އައި ކޮންމެ ވެރިކަމެއްގައިވެސް ދެއްކެވީ ދަޅަކަމަށެވެ. ހުސްވައުދުތަކެއްވެ ރައްޔިތުންނަށް ކުލަ ހުވަފެން ދެއްކުމަށްފަހު މާލޭގެ ރައްޔިތުން ގެއްލޭކަމަށެވެ. ރާއްޖޭގެ ވެރިކަމަށް އަންނަން ބޭނުންވާ ކޮންމެ މީހެއްގެވެސް އެންމެ ގިނަ ވޯޓު ހޯދަންޖެހޭ އެއްތަނަކީ މާލެކަމަށްވާއިރު، ކުރިއަށް އޮތް ރިޔާސީ އިންތިޚާބުގައި ރައްޔިތުން ތިބީ ގޯތި ނުލިބޭނަމަ ވޯޓު ނުދޭން ނިންމައިގެން ކަމަށެވެ.
މިހާތަނަށް ރައްޔިތުން ކުރި ތަޖުރިބާގެ އަލީގައި ގޯތި ދޭނެކަމުގެ ވައުދާއިއެކު ރައްޔިތުންނަށް އެކަން ކުރެވޭނެ ކަމުގެ ޔަގީންކަމާއި، ވައުދު ފުއްދާނެ ގޮތާއި ހުރިހާ ކަމެއް ރައްޔިތުންނަށް ހުށަހަޅަންޖެހޭކަމަށް ވާހަކަ ދެއްކެވި ބޭފުޅުން ވިދާޅުވިއެވެ.
މާލޭގެ ބައެއް ރައްޔިތުން ބުނެފައިވަނީ މާލޭގައި ދިރިއުޅެމުންދަނީ އަތޮޅު ތެރޭގެ ރައްޔިތުންނަށްވުރެއް މާ ހާލުގައި ކަމަށެވެ. މާލޭގެ ރައްޔިތުންނަށްވީތީވެ ރާއްޖޭގެ އެހެން އެއްވެސް ރަށަކުން ބިންކޮޅެއްވެސް ނުލިބޭގޮތަށް ލާމަރުކަޒީ ޤާނޫނު ބައްޓަންކޮށްފައިވާކަމީވެސް އޮތް ބޮޑު ކަންބޮޑުވުމެއްކަމަށެވެ. އަދި ހުޅުމާލެއަކީވެސް މުއްސަދި މަހުޖަނުންނަށް އޮތް ޝަހަރަކަށް ހަދައި، ވެރިންގެ އަތްމަތި ތަނަވަސްވާ ގޮތަށް ކަންކަން ކުރަމުްދާކަމީ ފެންނަމުންދާ މަންޒަރުކަމަށް ވާހަކަ ދެއްކެވި ބޭފުޅުން ވަނީ ވިދާޅުވެފައެވެ.
