ކުއްޔަށް ދޫކުރާ ޕާކިންގ ސްލޮޓްތައް ވެހިކަލްގެ ގަރާޖްގެ ގޮތުގައި ކަނޑައަޅައި ރަޖިސްޓްރީ ކުރެވޭނެ އިންތިޒާމް ހަމަޖެއްސުމަށް ސިޓީ ކައުންސިލުން ނިންމައިފިއެވެ.
މާލެ ސިޓީ ކައުންސިލުން މިއަދު ބޭއްވި ނޫސްވެރިންގެ ބައްދަލުވުމެއްގައި މާލޭގެ މޭޔަރު ޑރ. މުޙައްމަދު މުއިއްޒު ވިދާޅުވީ ހަތަރު ފުރޮޅުލީ އުޅަނދު ޕާކުކުރުމަށް ސިޓީކައުންސިލުން ކުއްޔަށް ދޫކުރާ ސްލޮޓްތަކަކީ ވެހިކަލް ރަޖިސްޓްރީ ކުރުމަށް ކަނޑައަޅާ ގަރާޖުކަމަށް ކައުންސިލާއި އެކު ހަދާ އެއްބަސްވުމެއްގެ ދަށުން ހަމަޖެއްސޭނެ އިންތިޒާމް ކައުންސިލުން މިހާރު ހަމަޖައްސާފައި ވާކަމަށެވެ. އަދި މިއަދުގެ ނިޔަލަށް މާލެ އެތެރެކޮށް ގަރާޖް ނުދެއްކުމުގެ ސަބަބުން ރަޖިސްޓްރީ ނުވާ އުޅަނދު ތަކަށް ރަޖިސްޓްރީ ކުރުމަށް އެ ސްލޮޓްތައް ބޭނުން ކުރެވޭނެ ކަމަށާއި، އެ އުޅަނދެއްގެ އުމުރު ހަމަވަންދެން އެ ސްލޮޓަކީ އެއުޅަނދުގެ ގަރާޖްގެ ގޮތުގައި އޮންނާނެ ކަމަށްވެސް މޭޔަރ ވިދާޅުވިއެވެ.
މޭޔަރ ޑރ. މުއިއްޒު ވިދާޅުވީ މިހާރު ހަތަރު ފުރޮޅުލީ ވެހިކަލް އެތެރެ ކުރުމަށް ގަރާޖު ސިޓީ ހޯދަނީ 80،000 ވަރަކަށް ރުފިޔާ ގޭގޭއަށް ދައްކައިގެން ގަރާޖު ސިޓީ ހޯދައިގެން ކަމަށެވެ. އެގޮތަށް ސިޓީ ހޯދިޔަސް ވެހިކަލް ޕާކް ކުރާނެ ތަނެއް ނޯންނަ ކަމަށް މޭޔަރ ވިދާޅުވި އެވެ.
ގަރާޖުގެ ގޮތުގައި ޕާކިން ސްލޮޓްތައް ވިއްކާނީ އަހަރަކަށް 25،000 ރުފިޔާގެ ރޭޓުން ކަމަށް ސިޓީ ކައުންސިލުން ވަނީ ކަނޑައަޅާފައެވެ.
ގަރާޖުގެ ގޮތުގައި ޕާކިން ސްލޮޓް ދޫކުރުމަށްޓަކައި މާލޭގައި ހުރި 20 ފޫޓަށް ވުރެ ފުޅާ މަގުތަކުން ޖާގަ ނަގާނެކަން ފާހަގަކުރައްވަމުން މުއިއްޒު ވިދާޅުވީ އަމީނީ މަގުގެ ދެކުނަށް ހުރި ޖާގައިގެ ތަނަވަސްކަން ހުރި ތަންތަން މިހާރުވެސް ބަލަމުންދާ ކަމަށެވެ. އަދި މި ސްލޮޓްތައް ކަނޑައަޅައި އެތަންތަން ކުރެހުމަށްފަހު ސްލޮޓްތައް ބޭނުންވާ ފަަރާތްތަކަށް ފުރުސަތު ހުޅުވާލާނެ ކަމަށް މުއިއްޒު ވިދާޅުވިއެވެ.
ގަރާޖެއްގެ ގޮތުގައި ރަޖިސްޓްރީ ކުރަން ބޭނުން ނުވާ ފަރާތްތަކަށް ވެސް ޕާކިން ސްލޮޓްތަކަށް އެދުމުގެ ފުރުސަތު ސިޓީކައުންސިލުން ވަނީ ހުޅުވާލާފައެވެ. މިގޮތަށް ސްލޮޓް ހޯދުމަށްވެސް އެދެވޭނީ މިއަދުގެ ނިޔަލަށް މާލެއަށް އެތެރެކޮށްފައިވާ ވެހިކަލް ތަކަށް އެކަނި ކަމަށް ސިޓީކައުންސިލުން ބުނެއެވެ.
