މުސްލިމަކު ކާފަރެއްގެ ގޮތުގައި ސިފަކުރުން ފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހެދުމަށް ޤާނޫނުލް އުގޫބާތަށް ހުށާހެޅި އިސްލާހު ފުރަތަމަ ހުށަހެޅިގޮތަށް ފާސްކުރަން އެދިވަޑައި ނުގަންނަވާކަމަށް ރައިސުްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވުމާއި ގުޅިގެން، އެމްޑީޕީގެ ސީނިއަރ މެންބަރެއްކަމަށްވާ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ސަރުކާރަށް ފާޑުވިދާޅުވެއްޖެއެވެ.

އިންތި ވިދާޅުވީ، މުސްލިމަކަށް ކާފަރަކަށް ނުވަތަ މުރުތައްދެއްކަމަށް ގޮވުމުގެ ނަތީޖާއެއްގެ ގޮތުން، އެ މީހަކު މަރާތީ، އެގޮތަށް ގޮވުން ހުއްޓުވުމަށް ސަރުކާރުން އަމިއްލައަށް ބިލެއް ހުށަހެޅުމަށްފަހު، އެ ބިލު އަލުން އިޞްލާހުކުރުމަށް ފުރުޞަތު ދިނުމަކީ އަމާޒު ވިއްސިވިހާލިވެ އަމާޒު ލާހޫރުންކަމަށެވެ.

މުސްލިމަކަށް ކާފަރަކަށް ނުވަތަ މުރުތައްދެއްކަމަށް ގޮވުމުގެ ނަތީޖާއެއްގެ ގޮތުން،އެ މީހަކު މަރާތީ، އެގޮތަށް ގޮވުން ހުއްޓުވުމަށް ސަރުކާރުން އަމިއްލައަށް ބިލެއް ހުށަހެޅުމަށްފަހު، އަނެއްކާ އަލުން އެގޮތަށް ގޮވުމުގެ ފުރުސަތު ދިނުމަށް ދީއްލައިލުމަކީ "އަމާޒު ވިއްސިިވިހާލި،އަމާޒު ލާހޫރޭ"

— ???????? ????? (@Imthiyazfahmy) August 12, 2021

އިންތި މިހެން ވިދާޅުވެފައިވާއިރު، މެއި 6ގެ ހަމަލާއާއި ގުޅިގެން އެމްޑީޕީގެ ބައެއް މެންބަރުން ގެންދަނީ ރައީސް އިބްރާހީމް މުޙައްމަދު ޞާލިޙަށާއި، ސަރުކާރަށް ފާޑުވިދާޅުވަމުންނެވެ.

ރައީސުލްޖުމްހޫރިއްޔާގެ އޮފީހުގައި މިދިޔަ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ ސަރުކާރުން މަޖިލީހަށް ފޮނުވާ ކޮންމެ ބިލަކީ އެ ފޮނުވި ގޮތަށް ފާސްކުރަން ޖެހޭ ބިލެއް ނޫން ކަމަށާއި، އެބިލަށްވެސް ގެންނަންޖެހޭ ގިނަ އިސްލާހްތަކެއް ހުރިކަމަށް ގަބޫލުކުރައްވާ ކަމަށެވެ.

” ބައެއް ބިލް އަޅުގަނޑުމެން ހުންނާނެ ފޮނުވާފަ އަނބުރާ ގެނެސްފަވެސް، އެއީ މިހާރު އެކަނި ކުރާ ކަމެއް ނޫން”

– ރައީސް

ރައީސް ވިދާޅުވީ ނަފްރަތުގެ ބިލު މަޖިލީހަށް ފޮނުވުމަށްފަހު އެއާމެދު ވިސްނިއިރު، އާންމުންގެ ޚިޔާލުތަކާއިއެކު އެ ބިލަށް އިސްލާހްތަކެއް ގެންނަން ޖެހޭކަމަށް ގަބޫލުކުރެވިގެން ސަރުކާރުގެ ފަރާތުން އިސްލާހްތަކެއް ހުށަހަޅާފައި ވާނެކަމަށެވެ. އަދި ކޮމިޓީ މަރުހަލާގައި ސަރުކާރުން ހުށަހެޅި ބައެއް އިސްލާހްތައް ހިމަނާފައި ވާކަންވެސް ރައީސް ފާހަގަކުރެއްވި އެވެ.

އެހެންކަމުން މިހާރު އެދެނީ އެބިލް ފާސްވެގެން އަންނައިރު އޭގައި ހުރި މައްސަލަތައް ހައްލުވެ، ހުށަހެޅިފައިވާ އިސްލާހުތަކާއެކު ފާސްވެގެން އައުން ކަމަށް ރައީސް ވިދާޅުވިއެވެ.

ޤާނޫނުލް އުގޫބާތަށް ސަރުކާރުގެ ފަރާތުން ތުޅާދޫ ދާއިރާގެ މެމްބަރު ޙިސާން ހުސައިން ހުށައެޅުއްވި އިޞްލާހާއި ގުޅިގެން ވެރިކަން ކުރާ ކޯލިޝަންގެ ތެރޭގައި ވަނީ “ނަފްރަތު” އިންތިހާއަށް އުފެދި، ބޮޑު ބައިބައިވުންތަކެއް އުފެދިފައެވެ. ކޯލިޝަންގެ ތެރޭގައި ހިނެނޭ މައިޕާޓީގެ ރައީސް، މުޙައްމަދު ނަޝީދާއި، ރައީސް ޞާލިހާއި އޮތް ސިޔާސީ ގުޅުންވެސް ވަނީ މިބިލާއި ގުޅިގެން ކަޑާލާފައެވެ. އަދި ކޯލިޝަންގައި ހިމެނޭ އަދާލަތު ޕާޓީއަށް ރައީސް ނަޝީދާއި، ނަޝީދަށް ތާއީދު ކުރައްވާ ބޭފުޅުންދަނީ ހޫނު ރައްދު ތަކެއް ދެއްވަމުންނެވެ.

މި ބިލާމެދުގައި ބޮޑެތި ޚިޔާލު ތަފާތުވުންތަކެއް އުފެދުމުން އަލުން ދިރާސާކޮށް ގޮތެއް ނިންމަން ޖުޑިޝަރީ ކޮމެޓީއަށް ބިލު ވަނީ ފޮނުވާފައެވެ. ފުރަތަމަ މަސައްކަތް ކުރީ ނިމިދިޔަ ދައުރުގެ އެންމެ ފަހު ޖަލްސާގައި ބިލު ފާސްކުރުމަށެވެ. ނަމަވެސް އެމްޑީޕީ ތެރެއިން މިބިލާއި ދެކޮޅަށް މަސައްކަތް ފަށާއި، އިސްލާހުތަކެއް ވަނީ ހުށަހަޅާފައެވެ.

ސަރުކާރުގެ ފަރާތުން މަޖިލީހަށް ހުށަހަޅާފައިވާ ނަފްރަތުގެ ބިލަށް މިސަރުކާރުން ތާއީދު ނުކުރާނަމަ، މިސަރުކާރަށް ތާއީދު ނުކުރާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މީގެކުރިން ވަނީ ވިދާޅުވެފައެވެ.