ޖޭމްސް ބޮންޑް ފިލްމު ސީރީޒްގެ 25 ވަނަ ފިލްމު "ނޯ ޓައިމް ޓު ޑައި" އަޅުވާ ތާރީހް ދެވަނަ ފަހަރަށް ފަސްކޮށްފިއެވެ.
ދިވެހިންގެ ތެރޭގައިވެސް މަޤްބޫލު އެކްޝަން ފިލްމު ސީރީޒް ޖޭމްސް ބޮންޑްގެ އެންމެފަހުގެ ފިލްމު، މީގެކުރިން ސިނަމާ ތަކުގައި އަޅުވަން ކަނޑައަޅާފައި އޮތީ މި އަހަރުގެ އޭޕްރީލް މަހުއެވެ. ނަމަވެސް ކޯވިޑް-19ގެ ބަލިމަޑުކަމުގެ ސަބަބުން މުޅި ދުނިޔޭގަވެސް ސިނަމާތަށް ބަންދުކޮަށް، ފިލްމުބެލުންފަދަ ގިނަބަޔަކު އެއްވެގެން ހިންގާ ހަރަކާތްތައް ހުއްޓާލުމާއި ގުޅިގެން، މި އަހަރުގެ ނޮވެމްބަރު މަހަށް ފިލްމު ރިލީޒްކުރުން ވަނީ ފަސްކޮށްލާފައެވެ.
ދެވަނަ ފަހަރަށް ފިލްމުއަޅުވާ ތާރީހް ބަދަލުކޮށްފައި މިވަނީ އެމެރިކާގައި ކޮވިޑްގެ ހާލަތު އިތުރަށް ގޯސްވަމުން ދާތީ އާއި ޔޫރަޕުގައި ކޮވިޑުގެ ދެވަނަ ރާޅެއްގެ ބިރުވެރިކަން ފެތުރިފައި ވާތީ އެކަންކަމަށް ރިއާޔަތް ކޮށްފައެވެ. އަދި އެމެރިކާގެ ރައީސްގެ ދެކަނބަލުންވެސް ކޯވިޑް-19އަށް ޕޮޒިޓިން ވީކަން އިއުލާނު ކޮށްފައިވާ ދަނޑިވަޅެއްގައެވެ.
"ނޯޓައިމް ޓު ޑައި" ސިނަމާތަކަށް އަންނާނެކަމަށް މިހާރު އިއުލާންކޮށްފައިވާ ތާރީޚަކީ އަންނަ އަހަރުގެ އޭޕްރީލް މަހުގެ 2 ވަނަ ދުވަހެވެ. މިއީ ގާތްގަނޑަކަށް މި ފިލްމު ރިލީޒްކުރަން ފުރަތަމަ އޮތް ތާރީޚަށްވުރެ 1 އަހަރު ލަސް ތާރީހެކެވެ. މިއީ ކޯވިޑް-19ގެ ސަބަބުން އެޅުވުން ފަސްކުރި މިވަރުގެ ބޮޑު، ފުރަތަމަ ފިލްމެވެ.
ޖޭމްސް ބޮންޑް ސީރީޒްގެ ފިލްމުތަކަކީ ކާމިޔާބު ފިލްމު ތަކަކަށް ވާއިރު، 250 މިލިއަން ޑޮލަރުގެ ބަޖެޓަކުން ހަދާފައިވާ މި ފިލްމަށް ވެސް ގާތްގަނޑަކަށް 5 ބިލިއަން ޑޮލަރުގެ އާމްދަނީއެއް ލިބޭނެކަމަށް ލަފާކޮށްފައިވެއެވެ.
ކޯވިޑް-19ގެ ސަބަބުން ފިލްމުތައް އެޅުވުން ފަސްކުރުމުގެ އިތުރުން، ސިނަމާގައި ފިލްމުއެޅުވުމުގެ ބަދަލުގައި ޕްރޮޑަކްޝަން ހައުސްތަކުން އިސްކަންދެނީ އޮންލައިން ޕްލެޓްފޯމެއްގައި ފިލްމު ނެރުމަށެވެ. ނަމަވެސް "ނޯޓައިމް ޓު ޑައި"ގެ ޕްރޮޑަކްޝަން ޓީމުން ބުނީ މި ފިލްމަކީ ތިއޭޓަރުގައި ބަލަން ތައްޔާރުކޮށްފައިވާ ފިލްމަކަށް ވުމުން ފިލްމު އަޅުވަން ބޭނުންވަނީ ހަމަ ސިނަމާ ތަކުގައި ކަމަށެވެ.
"ނޯ ޓައިމް ޓު ޑައި" އަކީ މިހާރުގެ ޖޭމްސް ބޮންޑް، ޑެނިއަލް ކްރެއިގް ބޮންޑްގެ ރޯލުން ފެންނާނެ އެންމެ ފަހު ފިލްމެވެ. ކެރީ ޖޯޖީ ފުކުންގާ ޑައިރެކްޓްކޮށްފައިވާ މި ފިލްމުގެ ކާސްޓުންގެ ތެރޭގައި ރަމީ މާލިކް، ލިއާ ސިޑޫ، ލަޝާނާ ލީންޗް، ނިއޯމީ ހެރިސް، ކްރިސްޓޮފާ ވޯލްޒް، ރާފް، ފިއެނެސް އާއި ޖެފްރީ ރައިޓް ފަދަ ތަރިން ހިމެނެއެވެ.
