ނަފްރަތުގެ ޢަމަލުތައް ހުއްޓުވުމުގެ ނަމުގައި ޤާނޫނުލް އުޤޫބާތުގެ 123 ވަނަ މާއްދާގެ ފަހަތަށް މާއްދާއެއް އިތުރުކުރަން މަޖިލީހަށް ހުށަހެޅިފައިވާ ބިލު ވެގެން މިދިޔައީ ހައްޤާއި ބާތިލް ވަކި ކުރި އެއްޗަކަށް ކަމަށް ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
މި ބިލާއި ގުޅިގެން މިހާތަނަށް އެންމެ ބޮޑަށް މިކަމާއި ދެކޮޅު ހައްދަވަމުންދާ އެއްބޭފުޅާ ކަމަށްވާ ޝައިޚު ޒައިދު ވިދާޅުވީ ނުބައި މަޤްޞަދެއްގައި ލާފައިވާ، ނުބައިކޮށް އޮތް ނަފްރަތުގެ ބިލް ވެގެން މިދިޔައީ ހައްޤާއި ބާތިލް ވަކި ކުރި އެއްޗަކަށް ކަމަށެވެ. އަދި މިފަދަ ނުބަޔަކުން ގައުމު ސަލާމަތްކުރެއްވީތީ ﷲ އަށް ޙަމްދު ކުރާކަމަށް ޒައިދު ވަނީ ވިދާޅުވެފަ އެވެ.
"ސެކިއުލާ ރާއްޖެއަކަށް ހަދަން ބަޔަކު މަސައްކަތްތަކެއް ކުރޭ! އެކަން ވިޔަކަ ނުދޭނަން އިންޝާ ﷲ!"
– ޝައިޚު އަލީ ޒައިދު
ސަރުކާރުގެ ފަރާތުން މި ބިލް މަޖިލީހަށް ހުށަހަޅާފައި ވަނީ ދީން ހަތިޔާރަކަށް ބޭނުންކޮށްގެން، މުސްލިމުންގެ ބޮލުގައި ދީނާއި ގުޅުވައި ތަފާތު ލޭބަލްތައް އަޅުވައި، މުޖުތަމައުގައި ވަކިވަކި ފަރުދުންނާއިމެދު ނަފްރަތު އުފައްދައި، އާޚިރު ނަތީޖާއެއްގެ ގޮތުން، އެމީހުންގެ ލޭ ހުއްދަކަމަށް ބަޔަކަށް ޤަބޫލުކުރެވި، އެމީހުން މަރައި އަދި، ގެއްލުވާލުމުގެ ހާދިސާތަކެއް ދިވެހިރާއްޖޭގައި ހިނގާފައިވާތީ، ނަފްރަތުގެ އަމަލުތަކަކީ ޖިނާއީ ކުށެއްގެ ގޮތުގައި ކަނޑައެޅުމުގެ ބޭނުމުގައި ކަމަށް އެމްޑީޕީން ވަނީ ބުނެފައެވެ.
އެ ޕާޓީން އެދެނީ ވީހާވެސް އަވަހަކަށް މި ބިލު ރައްޔިތުންގެ މަޖިލީހުން ފާސްކޮށް، ދީނާއި ގުޅުވައިގެން، މުޖުތަމައުގައި ވަކިވަކި ފަރުދުންނާމެދު ނަފްރަތު އުފެއްދުމުގެ އަމަލުތަކަށް ނިމުމެއް އައުން ކަމަށްވެސް އެމްޑީޕީން ވަނީ ބުނެފައެވެ. އަދި މަޖިލީހުން މިބިލް އޮތް ގޮތަށް ފާސްކުރުމަށް މަޖިލިސް ރައީސް މުހައްމަދު ނަޝީދު ގެންދަވަނީ ވަރަށް ބޮޑަށް ވަކާލާތު ކުރައްވަމުންނެވެ.
އެހެންނަމަވެސް، މިބިލް މަޖިލީހުން ފާސްކުރުމާ ދެކޮޅަށް، މަޖިލީހުގެ ބައެއް މެމްބަރުގެ އިތުރުން، ގިނަ އަދަދެއްގެ ދިނީ ޢިލްމުވެރިންނާއި، ކައުންސިލްތަކުންނާއި އަދި ގިނައަދަދެއްގެ ރައްޔިތުންވެސް ދަނީ ޝުއޫރު ފާޅުކުރަމުންނެވެ. މީގެ އިތުރުން، އެމްޑިޕީ ފިޔަވާ ރާއްޖޭގެ އެހެން ހުރިހާ ސިޔާސީ ޕާޓީއަކުންވެސް ވަނީ މިބިލާ ދެކޮޅު ހައްދަވާފައެވެ. މިއާއެކު ބިލްގެ މަސައްކަތް މަޖިލީސްތެރޭގައި ވެސް ކޮންމެވެސް ވަރަކަށް ވަނީ މަޑުޖެހިފަ އެވެ
