ރައްޔިތުންގެ މަޖުލިހުގެ ތުޅާދޫ ދާއިރާގެ މެމްބަރު ހިސާން ހުސެއިން ރައްޔިތުންގެ މަޖިލިހަށް ހުށަހަޅުއްވާފައިވާ، ދިވެހިރާއްޖޭގެ ގާނޫނުލް އުގޫބާތަށް އިސްލާހު ގެނައުމުގެ ބިލް (ނަފްރަތުގެ ބިލް) މަޖިލިހުގެ ޖުޑިޝަރީ ކޮމިޓީން ފާސްކޮށްފައިވަނީ ކަމާ ގުޅުންހުރި ފަރާތްތަކުގެ މަޝްވަރާ އެކަށިގެންވާ ގޮތެއްގައި ނުހޯދާ ކަމަށާއި، އަދި ވަކީން ޚާއްސަކޮށް އިސްލާމިކް މިނިސްޓްރީއާއި، ހިއުމަންރައިޓްސް ކޮމިޝަން ފަދަ އިދާރާތަކުން މިބިލަށް ހުށަހަޅުއްވާފައިވާ އިސްލާހުތައް ބިލުގައި ހިމަނުއްވާފައި ނުވާކަމަށް ވިދާޅުވެ، ޖުޑިޝަރީ ކޮމިޓީން އިސްލާހު ކުރިގޮތަށް މިބިލް މަޖިލީހުގެ ތަޅުމުން ފާސްނުކުރުމަށް ރައްޔިތުންގެ މަޖިލިހުގެ 10 މެމްބަރަކު އިލްތިމާސް ކޮށްފިއެވެ.
މަޖިލީހުގެ 10 މެމްބަރަކު ސޮއިކުރައްވާ ނެރުއްވި ބަޔާނުގައި ވިދާޅުވެފައިވަނީ، އިސްލަމްދީނުގެ އަސްލުތަކާ ރައްޔިތުންގެ ހައްގުތަކާ ގުޅޭ މިފަދަ މުހިންމު ބިލުތަކަކީ ވީހާވެސް ބޮޑަށް ރައްޔިތުންނާއި ދީނީ އިލްމުވެރިންނާއި، އަދި ކަމާ ގުޅުންހުރި އެހެނިހެން ފަރާތްތަކުގެ މަޝްވަރާއާއި ލަފަޔާއެކު، ޑްރާފްޓް ކުރެވި، ފާސްކުރަންޖެހޭ ބިލްތަކެއް ކަމުގައެވެ.
މި ބަޔާނުގައި 10 މެމްބަރުން އިތުރަށް ވިދާޅުވެފައިވަނީ، މި ބިލް ރައްޔިތުންގެ މަޖިލިހަށް ހުށަހެޅި، ރައްޔިތުންގެ މަޖިލިހުގެ ޖުޑިޝަރީ ކޮމިޓީން ގެނެސްފައިވާ އިސްލާހުތަކަށް ބަލާއިރު، މިއީ ނަފްރަތުގެ އަމަލްތައް ހުއްޓުވުމަށް އޮތް ހައްލަކަށްވުމުގެ ބަދަލުގައި މި ބިލުގެ ސަބަބުން މިމައްސަލަ އިތުރަށް ގޯސްވެގެންދާނެ ގަބޫލު ކުރެއްވޭ ކަމަށެވެ.
އަދި މީގެ އިތުރުން މި ބިލްގެ ސަބަބުން ދިވެހިންގެ މެދުގައި އޮތް ދީނީ އެއްބައިވަންތަކަން ގެއްލިގޮސް ރައްޔިތުންގެ މެދުގައި ހަމަނުޖެހުން އިތުރުވުމުގެ ފުރުސަތު އޮތްކަމަށް ގަބޫލުކުރައްވާކަމަށްވެސް 10 މެމްބަރުން ސޮއިކުރައްވާ ނެރުއްވި ބަޔާނުގައި ވިދާޅުވެފައި ވެއެވެ.
10 މެމްބަރުން ގުޅިގެން ނެރުއްވި ބަޔާނުގައި ސއޮއިކުރައްވާފައިވާ މެމްބަރުންނަކީ:
- މުހައްމަދު ނާޒިމް – ދަގެތީ ދާއިރާގެ މެމްބަރު
- އަބުދުﷲ ރިޔާޒު – ތިމަރަފުށި ދާއިރާގެ މެމްބަރު
- ސައުދު ހުސެއިން – ވިލިގިލި ދާއިރާގެ މެމްބަރު
- އަލީ ހުސެއިން – ކެންދޫ ދާއިރާގެ މެމްބަރު
- އަހުމަދު އުޝާމް – ވިލިމާލެ ދާއިރާގެ މެމްބަރު
- އިބުރާހިމް ނަސީމް – ތުލުސްދޫ ދާއިރާގެ މެމްބަރު
- އަބުދުލް މުހުސިން ހަމިދު – ނިލަންދޫ ދާއިރާގެ މެމްބަރު
- އަލީ ހަމީދު – އިސްދޫ ދާއިރާގެ މެމްބަރު
- މުހައްމަދު ނަޝީދު އަބުދުﷲ – ނޮޅިވަރަމް ދާއިރާގެ މެމްބަރު
- އަހުމަދު އާމިރު – ކުޑަހުވަދޫ ދާއިރާގެ މެމްބަރު
މިބަޔާނުގައި މެމްބަރުން އިތުރަށް ވިދާޅުވެފައިވާ ގޮތުގައި، ރައްޔިތުންގެ މެދުގައި ބައެއް ފަރާތްތަކުން އުފައްދާ ނަފްރަތުގެ އަމަލްތަކަކީ ހުއްޓުވަންޖެހޭ އަމަލްތަކެކެވެ. އަދި ނަފްރަތުގެ އަމަލްތަކުގެ ސަބަބުން ދިވެހި އެތައް ރައްޔިތުންނަކަށް ބޮޑެތި އަނިޔާތަކާއި ގެއްލުންތަކެއް ލިބިފައިވާ ކަމީ ދެބަސްވެވެން ނެތް ހަގީގަތެއް ކަމަށް ވީހިދު މިއީ ހައްލެއް ހޯދަންޖެހޭ މައްސަލައެކެވެ. އެހެންނަމަވެސް، ދިވެހިރާއްޖޭގެ ގާނޫނުލް އުގޫބާތަށް 124ވަނަ މާއްދާގެ ގޮތުގައި އިތުރުކުރުމަށް މިހާރު ހުށަހެޅިފައިވާ އިސްލާހަކީ، މިކަމުގެ ހައްލުކަމަށް ނުވަތަ މިފަދަ ގާނޫނެއް ފާސްކުރުމުގެ މަގުސަދު ހާސިލްވާނެ ބިލެއްކަމަށް ދެކެވަޑައި ނުގަންނަވާކަމަށްވެސް 10 މެމްބަރަކު ގުޅިގެން ނެރުއްވި ބަޔާނުގައި ހާމަ ކުރައްވާފައިވެއެވެ.
ރައްޔިތުންގެ މަޖިލިހަށް މިހާރު ހުށަހެޅިފައިވާ ނަފްތަރުގެ ބިލަކީ، ރައްޔިތުންގެ މަޖިލިހުގެ ރައީސް މުހައްމަދު ނަޝީދުއާއި ގާތް ގުޅުމެއް އޮންނަ، ތުޅާދޫ ދާއިރާގެ މެމްބަރު ހިސާން ހުސެއިން ސްޕޮންސަރ ކުރައްވައިގެން ހުށަހަޅުއްވާފައިވާ ބިލެކެވެ. އަދި މަޖިލީހުން މިބިލް އޮތް ގޮތަށް ފާސްކުރުމަށް މަޖިލިސް ރައީސް މުހައްމަދު ނަޝީދު ގެންދަވަނީ ވަރަށް ބޮޑަށް ވަކާލާތު ކުރައްވަމުންނެވެ.
އެހެންނަމަވެސް، މިބިލް މަޖިލީހުން ފާސްކުރުމާ ދެކޮޅަށް، މަޖިލީހުގެ ބައެއް މެމްބަރުގެ އިތުރުން، ގިނަ އަދަދެއްގެ ދިނީ ޢިލްމުވެރިންނާއި، ކައުންސިލްތަކުންނާއި އަދި ގިނައަދަދެއްގެ ރައްޔިތުންވެސް ދަނީ ޝުއޫރު ފާޅުކުރަމުންނެވެ. މީގެ އިތުރުން، އެމްޑިޕީ ފިޔަވާ ރާއްޖޭގެ އެހެން ހުރިހާ ސިޔާސީ ޕާޓީއަކުންވެސް ވަނީ މިބިލާ ދެކޮޅު ހައްދަވާފައެވެ.
