އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުންފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހެދުމަށް ގާނޫނުލްއުގޫބާތަށް އިސްލާހު ގެނައުމަށް ސަރުކާރުގެ ފަރާތުން މަޖިލީހަށް ހުށަހަޅާފައިވާ ބިލަށް ސަރުކާރު ކޯލިޝަންގައި ހިމެނޭ ހުރިހާ ޕާޓީތަކުން ދެކޮޅު ހަދައިފި އެވެ.

ގާނޫނުލްއުގޫބާތަށް އިސްލާހު ގެނައުމަށް ސަރުކާރުގެ ސަރާތުން ރައްޔިތުން މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިން ހުށަހެޅުއްވި އިސްލާހުގައި ބުނެފައި ވަނީ އާއްމު ތަނެއްގައި ވަކި މީހަކީ އިސްލާމްދީނާއި ހިލާފަށް އުޅޭ ނުވަތަ އިސްލާމްދީނާއި ދެކޮޅު މީހަކު ކަމަށް ތުހުމަތުކޮށް ނުވަތަ އިސްލާމީ އަގީދާއާ ގުޅުވައި މުޖުތަމައުގައި މީހަކާއި މެދު ނަފްރަތު އުފެއްދުމަކީ ނުވަތަ އާއްމުތަނެއްގައި މުސްލިމަކު ކާފަރެއްގެ ގޮތުގައި ސިފަކުރުން ނުވަތަ ސިފަ ކުރުމުގައި ބައިވެރިވުމަކީ ކުށެއް ކަމަށެވެ.

ބިލް ދިރާސާކުރި ޖުޑީޝަރީ ކޮމިޓީން ބޮޑެތި ބަދަލުތަކެއް ބިލަށް ގެނައުމަށްފަހު ކޮމިޓީ ރިޕޯޓް މިހާރު ވަނީ މަޖިލީހުގެ ތަޅުމަށް ފޮނުވާފަ އެވެ.

ސަރުކާރު ކޯލިޝަންގައި ހިމެނޭ އެމްޑީޕީ ނޫން ހުރިހާ ޕާޓީތަކުން މި ބިލާމެދު ކަންބޮޑުވުން ފާޅުކޮށް ބިލުގައި ހުރި ކަންކަމާއި ދެކޮޅު ހަދާފައި ވާއިރު، ކޯލިޝަންގެ ތެރެއިން ބިލަށް ތާޢީދުނުކުރާކަން އެންމެ ފަހުން ހާމަކޮށްފައި ވަނީ ރައީސް މައުމޫންގެ އެމްއާރްއެމުން ނެވެ. އެމްއާރްއެމުން މިއަދު ބުނީ ބިލްގައި ވާ ކަންކަމަށް ތާއީދު ނުކުރެވޭ ކަމަށް އެމްއާރްއެމް އެކްސްކޯ ގެ 08/2021 ވަނަ ބައްދަލުވުމުގައި ނިންމާފައި ވާކަމަށާއި އެ ބިލުގައި ހުރިކަންބޮޑުވުންތަށް ސަރުކާރާއި ޙިއްސާ ކުރުމަށް ނިންމާފައިވެސް ވާކަމަށެވެ.

ނަފްރަތުގެ ޢަމަލަކީ ޖިނާއީ ކުށެއްގެ ގޮތުގައި ކަނޑައެޅުމަށްޓަކައި، ޤާނޫނު ނަންބަރު 2014/9 (ދިވެހިރާއްޖޭގެ ޤާނޫނުލްޢުޤޫބާތު) އަށް މިހާރު ހުށަހަޅާފައިވާ އިސްލާޙުތަކަށް ތާއީދު ނުކުރެވޭ ކަމަށް އެމް.އާރް.އެމް އެކްސްކޯ ގެ 08/2021 ވަނަ ބައްދަލުވުމުގައި ވަނީ ނިންމާފައެވެ. 1/2

— Maldives Reform Movement (MRM) ?? (@MRM_Office) July 4, 2021

ބިލަށް އެންމެ ފުރަތަމަ ދެކޮޅު ހެދީ ސަރުކާރު ކޯލިޝަންގައި ހިމެނޭ އަދާލަތު ޕާޓީންނެވެ. މީގެ އިތުން ޖުމްހޫރީ ޕާޓީ (ޖޭޕީ) އިންވެސް ވަނީ މި ބިލާމެދު ކަންބޮޑުވުން ފާޅުކޮށް ބިލުގައި ވާ ކަންކަމަށް ދެކޮޅު ހަދާފައެވެ.

ނަފްރަތުގެ ޢަމަލު ބަޔާކުރާ ބިލާއިމެދު ސަރުކާރު ކޯލިޝަންގައި ހިމެނޭ އަދާލަތު ޕާޓީގެ އިލްމުވެރިން ވަނީ މިދިޔަ މަހު ރައީސުލްޖުމްހޫރިއްޔާއާއި ބައްދަލު ކުރައްވާފައެވެ. ބައްދަލު ކުރެއްވުމަށްފަހު އަދާލަތު ޕާޓީން ކުރި ޓްވީޓުގައި ބުނެފައިވަނީ މިބައްދަލުވުމުގައި ބިލާއިމެދު ހުރިކަންބޮޑުވުންތައް ރައީސުލްޖުމްހޫރިއްޔާއާއި ހިއްސާ ކުރައްވާފައިވާކަމަށެވެ.

އަދި މިހާރު ބިލާއިމެދު ދީނީ ޢިލްމުވެރިންނާއި، އާންމު ރައްޔިތުންނާއި، ކައުންސިލްތަކުން ފާޅު ކުރަމުންދާ ކަންބޮޑުވުންތަކަށް ރިޢާޔަތްކުރެއްވުމަށްފަހު، މިކަންކަމަށް ހައްލު ލިބިދޭނެ ގޮތަކަށް މިބިލް ޤާނޫނަކަށް ވާއިރު ވެގެންދާނެކަމުގެ ޔަގީންކަން ރައީސް ދެއްވާފައި ވާކަމަށްވެސް އަދާލަތު ޕާޓިން ވަނީ ބުނެފައެވެ.

މި ބިލާމެދު ގިނަ ބަޔަކު ކަންބޮޑުވުން ފާޅުކުރަމުން ގެންދިޔަ ނަމަވެސް ސަރުކާރުގެ ފަރާތުން ބިލް ހުށަހެޅި މެމްބަރު ޙިސާން ހުސައިން  މި ބިލާގުޅޭގޮތުން ވިދާޅުވެފައި ވަނީ ބިލުގެ ހަގީގަތް އޮޅުވާލަން ބަޔަކު މަސައްކަތް ކޮށްފައިވާ ކަމަށެވެ. އެކަމަކު ހަގީގަތަކީ އެ ބިލު ފަރުމާ ކޮށްފައި ވަނީ އިސްލާން ދީނުގެ އެންމެ މަތީ އިމާމުން ދެއްވާފައިވާ އިރުޝާދުތަކާއި އިސްލާމީ ޝަރީއަތުގެ އިލްމަށް ރިއާޔަތް ކޮށްގެން ކަމަށް ބިލް ހުށަހަޅަމުން ޙިސާން ވަނީ ވިދާޅުވެފަ އެވެ.