އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުންފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހެދުމަށް ގާނޫނުލްއުގޫބާތަށް ތުޅާދޫ ދާއިރާގެ މެމްބަރު ހިސާން ހުސެއިން ހުށައެޅައްވާފައިވަ ބިލާއި ދެކޮޅު ހެދުމުގެ ގޮތުން ރާއްޖޭގެ ގިނަ އަދަދެއްގެ ކައުންސިލްތަކުން، ބަޔާންތައް ނެރެމެން އެބަދެއެވެ.

އާންމުންގެ މެދުގައި ބޮޑު ނުރުހުމެއް އަމާޒުވެފައިވާ މިބިލާ ދެކޮޅު ހެދުމުގެ ގޮތުން މިހާތަނަށް ބަޔާންތައް ނެރެފައިވާ ކައުންސިލްތަކުގެ ތެރޭގައި، ތިރިގައި މިވާ ކައިންސިލްތައް ހިމެނެއެވެ.

ގދ. މަޑަވެލި ކައުންސިލް، ހދ. ކުނރިބީ ކައުންސިލް، ގދ. ފިޔޯރީ ކައުންސިލް، ރ. އުނގޫފާރު ކައިސިލް، ރ. ވާދޫ ކައުންސިލް، ލ. މާވަށު ކައުންސިލް، ގއ. ވިލިގިލީ ކައުންސިލް، ހދ. ހިރިމަރަދޫ ކައުންސިލް، ހއ. ވަށަފަރު ކައުންސިލް، ހދ. މަކުނުދޫ ކައުންސިލް، ޅ. ނައިފަރު ކައުންސިލް، ވ. ފެލިދޫ ކައުންސިލް، ލ. މާމެންދޫ ކައުންސިލް، ތ. ކިނބިދޫ ކައުންސިލް، ރ. މާކުރަތު ކައުންސިލް، ށ. ނަރުދޫ ކައުންސިލް، ތ. އޮމަދޫ ކައުންސިލް، ރ. މީދު ކައުންސިލް، ރ. ހުޅުދުއްފާރު ކައުންސިލް، ރ. މަޑުއްވަރީ ކައުންސިލް، ނ. ނެމބަދޫ ކައުންސިލް، ހއ. އުތީމު ކައުންސިލް، ހއ. ކެލާ ކައުންސިލް،ވ.ތިނަދޫ ކައުންސިލް، މ. ދިއްގަރު ކައުންސިލް، ދ. ކުޑަހުވަދޫ ކައުންސިލް، ނ. މާފަރު ކައުންސިލް، ރ. އަނގޮޅިތީމު ކައުންސިލް، ހދ. ނޮޅިވަރަމް ކައުންސިލް، ތ. ހިރިލަންދޫ ކައުންސިލް، ކ. ގުރައިދޫ ކައުންސިލް، އދ. މާމިގިލީ ކައުންސިލް، ބ. އޭދަފުށީ ކައުންސިލް، ހދ. ނައިވާދޫ ކައުންސިލް، ތ. ގާދިއްފުށި ކައުންސިލް، ހދ. ނެއްލައިދޫ ކައުންސިލް، ވ. ކެޔޮދޫ ކައުންސިލް، ލ. ފޮނަދޫ ކައުންސިލް، ތ. މަޑިފުށި ކައުންސިލް، ށ. ގޮއިދޫ ކައުންސިލް، ރ. ދުވާފަރު ކައުންސިލް، ގއ. ކަނޑުހުޅުދޫ ކައުންސިލް، ނ. މާޅެންދޫ ކައުންސިލް، އއ. ބޮޑުފުޅަދޫ ކައުންސިލް، ނ. މަނަދޫ ކައުންސިލް، ލ. ދަނބިދޫ ކައުންސިލް، މ. މުލަކު ކައުންސިލް، ނ. މާފަރު ކައުންސިލްގެ އިތުރުން މާލޭ ސިޓީ ކައުންސިލްވެސް ހިމެނެއެވެ.

މި ބިލާއިދެކޮޅަށް މިހާތަނަށް ގިނަ އަދަދެއްގެ ކައުންސިލްތަކުން ބަޔާން ނެރެމުންދައިރު، ރާއްޖޭގެ ގިނަ ދީނީ އިލްމުވެރިންވެސް ދަނީ މިބިލާ ދެކޮޅަށް ޝުއޫރު ފާލުކުރުމުންނެވެ.

ރައްޔިތުންގެ މަޖިލީހުން ވަނީ، އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުންފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހެދުމަށް ގާނޫނުލްއުގޫބާތަށް ހުށައެޅި އިޞްލާހުގެ ބިލަށް އާންމުންގެ ޚިޔާލަށް ނުހުޅުވައި، ކޮމިޓީން ބޭނުންވާ އިދާރާތަކުގެ މައުލޫމާތު އެކަނި ހޯދުމަށް ނިންމައިފިއެވެ.

ގާނޫނުލްއުގޫބާތަށް މާއްދާއެއް އިތުރުކުރަން ސަރުކާރުގެ ފަރާތުން ތުޅާދޫ ދާއިރާގެ އެމްޑީޕީގެ މެމްބަރު ހިސާން ހުސައިން މަޖިލީހަށް ހުށަހެޅުއްވި ބިލު މަޖިލީހަށް ބަލައިގަނެ، އެ ބިލް ދިރާސާކުރަން ޖުޑިޝަރީ ކޮމިޓީއަށް ފޮނުވީ އިއްޔެއެވެ. ކޮމެޓީން ރޭބޭއްވި ބައްދަލުވުމުގައި ކޮމެޓީގެ މުޤައްރިރު އިމްތިޔާޒު ފަހުމީ ވަނީ މިބަލަކީ މަޖިލީހުން ވީހާވެސް އަވަހަށް ނިންމުމަށް މަސައްކަތް ކުރާ ބިލަކަށްވުމުން ބިލްގެ މަސައްކަތް ވީހާވެސް އަވަހަށް ގެންދެވޭނެ ގޮތަކަށް ކަންކަން އިންތިޒާމު ކުރުމަށް ނިންމާފައިވާކަމަށެވެ.

އާންމުކޮށް ކޮމިޓީތަކުން ބިލްތަކުގެ މަސައްކަތްކުރާއިރު، އާންމުންގެ ޚިޔާލަށް ހުޅުވާލައެވެ. ނަމަވެސް މިބިލަށް ޚިޔާލު ހޯދުމަށް ނިންމާފައިވަނީ އިސްލާމިކް މިނިސްޓްރީ އާއި ޕްރޮސެކިއުޓާ ޖެނެރަލްގެ އޮފީސް އަދި ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް)ގެ ލަފާ ހޯދުމަށެވެ.

ގިނަ އާންމު ރައްޔިތުންނާއި، ކޯލިޝަންގައި ހިމެނޭ ޕާޓީތަކާއި، ދީނީ އިލްމުވެރިންގެ ބޮޑު ކަންބޮޑުވުންތަކެއް މިބިލާއިމެދު އޮތްނަމަވެސް ކޮމިޓީން އެކަމަށް އެއްވެސް ވަރަކަށް އިޝާރާތް ކުރައްވާފައި ނުވެއެވެ. އަދި މިކަމުގައި ރާއްޖޭގެ ދީނީ އިލްމުވެރިންގެ މަޝްވަރާ ހޯދުމަށްވެސް ނިންމާފައި ނުވެއެެ. ބިލަށް ކޮމެންޓް ހޯދާނެ ފަރާތްތައް ކަނޑައެޅުމާއެކު ބިލުގެ މަސަައްކަތް ކޮމިޓީން ނިންމާނެ ތާރީހަކީ މި މަހުގެ 23 ވަނަ ދުވަސް ކަމަށް ވެސް ރޭ ނިންމިއެވެ.

“ހިސާން ބިލު” ގައިވާ ގޮތުން އާންމު ތަނެއްގައި ވަކި މީހަކީ އިސްލާމްދީނާ ހިލާފަށް އުޅޭ ނުވަތަަ އިސްލާމްދީނާ ދެކޮޅު މީހެއް ކަމަށް ތުހުމަތު ކުރުމާއި އިސްލާމީ އަގީދާއާ ގުޅުވައި މުޖުތަމައުގައި މީހަކާމެދު ނަފްރަތު އުފެއްދުން އުފެއްދުން ކުށަކަށް ހަދަން ވަނީ ހުށަހަޅައިފައެވެ. ހަމަ އެހެންމެ އާންމުތަނެއްގައި މުސްލިމަކު ކާފަރު ކުރުން ސިފަކުރުން ނުވަތަ ސިފަ ކުރުމުގައި ބައިވެރިވުން ނުވަތަ އާންމު ތަނެއްގައި މުސްލިމަކު ކާފަރެއް ކަމަށް ތުހުމަތު ކުރުން ވެސް ކުށަކަށް ވާނެ އެވެ. ބިލްގައިވާ ގޮތުން މި ހުރިހާ ކުށަކީ ވެސް ޖުނާހުގެ އެއްވަނަ ދަރަޖައިގެ ކުށެކެެވެ. އެ ކުށުގެ އެންމެ ބޮޑު އަދަބަކަށް އަންނާނީ އެއް އަހަރުގެ ޖަލު ހުކުމެކެވެ.

މިއީ، ރައްޔިތުންގެ މަޖިލީހަށް ހުށަހެޅިފައިވާ ބިލަކާދެކޮޅަށް މިހާ ގިނަ އަދަދެއްގެ ކައުންސިލްތަކުން ނުރުހުން ފާޅުކޮށް ބަޔާން ނެރުނު ފުރަތަމަ ފަހަރުކަން ފާހަގަ ކޮށްލެވެއެވެ.