އީޖާދެއްގެ ހަޤީޤީ މާނަ ފުރިހަމަވަނީ، އެ އީޖާދަކުން މީހުންނަށް މަންފާއެއް ލިބިގެންކަމަށާއި، ޓެކްނޮލޮޖީ މިންކުރުމުގައި ބަލަންވީ އެއީ އުފެއްދިދާނެ އެއްޗެއްތޯ ނުވަތަ ކުރެވިދާނެ ކަމެއްތޯ ނޫން ކަމަށާއި، އޭގެ މަންފާ ކުރާނީ ކޮން ބަޔަކަށްތޯ ކަމުގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެ އެވެ.
ދިވެހިރާއްޖޭގެ ޤައުމީ ޔުނިވަރސިޓީގައި މިއަދު ފެށި ތެވެލި އިންޓަރނޭޝަނަލް ކޮންފަރެންސް 2026 ހުޅުވުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން މެޑަމް ސާޖިދާ ވިދާޅުވީ، އާޓިފިޝަލް އިންޓެލިޖެންސް ފަދަ ވަސީލަތްތަކުން ގިނަ ފުރުޞަތުތަކެއް ހުޅުވިގެންދިޔަ ނަމަވެސް، އީޖާދުކުރުމަކީ ނިމުމެއްކަމަށް ދެކިގެން ނުވާނެ ކަމަށެވެ. ޓެކްނޮލޮޖީގެ ސަބަބުން ޙަޤީޤީ ބަދަލެއް އަންނަނީ، ތަޢުލީމީ ނިޒާމަށާއި، ޞިއްޙީ ދާއިރާއަށާއި، ރައްޔިތުންގެ ދިރިއުޅުމަށް އެކަން އަމާޒުކުރެވުމުން ކަމުގައި ވެސް އެކަމަނާ ފާހަގަކުރެއްވި އެވެ.
ސައިންސާއި ޓެކްނޮލޮޖީގެ މައިދާނުގައި އަންހެނުންނާއި އަންހެން ކުދިން އެމީހުންގެ ޖާގަ ހޯދުމަށް އިލްތިމާސްކުރައްވަމުން މެޑަމް ވިދާޅުވީ، އީޖާދުކުރުމަކަށް ވަކި ޖިންސެއް ނުވާ ކަމަށާއި، މުސްތަޤުބަލު ބައްޓަންކުރުމުގައި ދައުރު އަދާކުރުމަށް އެއްވެސް ފަރާތެއްގެ ހުއްދައަކަށް ބޭނުންނުވާނެ ކަމަށެވެ. އަދި ޒުވާނުންނަކީ މާދަމާގެ ބިނާވެށި ކުރަހާ މީހުންކަން ފާހަގަކުރައްވާ، ދަރިވަރުން ޓެކްނޮލޮޖީ ބޭނުންކުރާ ބަޔަކަށް ވުމުގެ ބަދަލުގައި، އެ އުފައްދާ ބަޔަކަށް ވުމަށް ހިތްވަރު ދެއްވި އެވެ.
ދިރާސާކުރާ ފަރާތްތަކުން، އެ މީހުންގެ މަސައްކަތްތައް ހަމައެކަނި ޔުނިވަރސިޓީގެ ތެރެއަށް ދޫކޮށްލުމުގެ ބަދަލުގައި، ޙަޤީޤީ ދުނިޔޭގެ ގޮންޖެހުންތަކާ ކުރިމަތިލުމަށް އެކަމަނާ ބާރުއެޅުއްވި އެވެ. ދިރާސާއެއް އެންމެ ރަނގަޅަށް ވަޒަންކުރެވޭނީ، އެ ދިރާސާއެއްގެ ސަބަބުން ދިރިއުޅުމަށް އަންނަ ހެޔޮ ބަދަލުތަކުން ކަމުގައި ވެސް ފާހަގަކުރެއްވި އެވެ.
މި ރަސްމިއްޔާތުގައި، ތެވެލި 2026 އެވޯޑުތައް ހާސިލުކުރި ފަރާތްތަކާ އެވޯޑު ހަވާލުކޮށްދެއްވީ ވެސް މެޑަމް ސާޖިދާ އެވެ.
ކޮމެންޓު ފޮނުވާ