އެމެރިކާއިން ހުށަހެޅި ޣައްޒާ ޕްލޭން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޤަބޫލުނުކުރި ނަމަވެސް، ދެ ލީޑަރުންގެ ގުޅުން "ވަރަށް ރަނގަޅު" ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ޓްރަމްޕް މިހެން ވިދާޅުވީ އިއްޔެ ބޭއްވުނު ނޫސްވެރިންގެ ބައްދަލުވުމުގައި ދެ ޤައުމުގެ ގުޅުމާ ބެހޭ ގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުންނެވެ.
ޣައްޒާ ޕްލޭނަކީ މިދިޔަ އޮކްޓޫބަރު މަހު އިޢުލާނުކުރި ހަމަލާ ބަދަލުކުރުން ހުއްޓައިލުމުގެ އެއްބަސްވުމުގެ ދަށުން އެންމެ ފަހުން އެޅި ފިޔަވަޅެވެ. އެ އެއްބަސްވުމާ ގުޅިގެން އިސްރާއީލުގެ ޢަސްކަރީ ޙަރަކާތްތައް ކޮންމެވެސް ވަރަކަށް މަދުވި ނަމަވެސް، ޣައްޒާގައި ހިންގަމުންދާ ޤަތުލްޢާއްމު އެއްކޮށެއް ނުހުއްޓެއެވެ. ޣައްޒާގެ ޞިއްޙީ ވުޒާރާއިން ބުނާ ގޮތުގައި، "ޢަސްކަރީ ޙަރަކާތްތަކު"ގެ ނަމުގައި ހަމަލާ ބަދަލުކުރުން ހުއްޓައިލި ފަހުން ވެސް 1,250 އަށް ވުރެ ގިނަ ފަލަސްޠީނުގެ ރައްޔިތުން ޝަހީދުކޮށްލައިފައިވެއެވެ.
ހަމާސް ހަތިޔާރު ބެހެއްޓުމާއި، ޣައްޒާ އިން އިސްރާއީލުގެ ސިފައިން ފޭބުން ހިމެނޭ މި ޕްލޭނާ މެދު ނަތަންޔާހޫގެ ކަނާތު ފިޔައިގެ ސަޕޯޓަރުންގެ މެދުގައި ބޮޑު ނުތަނަވަސްކަމެއް އޮތެވެ. ރިޕޯޓުތައް ބުނާ ގޮތުގައި، ޕްލޭން ނިމުމަކަށް ގެނައުމަށް ނަތަންޔާހޫއަށް އެންމެ ބޮޑަށް ޕްރެޝަރު ކުރީ ކެބިނެޓުގައި ހިމެނޭ ހައްދުފަހަނައެޅި ކަނާތު ފިޔައިގެ މެންބަރުންނެވެ.
ޓްރަމްޕާއި ނަތަންޔާހޫ މިދިޔަ ފެބްރުއަރީ ފަހުކޮޅު އީރާނާ ދެކޮޅަށް ހަނގުރާމައެއް ފެށްޓެވި ނަމަވެސް، އެ ހަނގުރާމައިގެ ސަބަބުން ޓްރަމްޕްގެ މަޤުބޫލުކަން ދަށްވެ، ތެލުގެ އަގު މައްޗަށް ދިޔުމުން، ހަމަލާ ބަދަލުކުރުން ހުއްޓައިލުމަށާއި ދާއިމީ ޙައްލެއް ހޯދުމުގެ މަސައްކަތް ޓްރަމްޕް ފެއްޓެވިއެވެ. ދެ ލީޑަރުންގެ މެދުގައި ޚިޔާލު ތަފާތުވާން ފެށީ އެ ހިސާބުންނެވެ. ދާދި ފަހަކާ ޖެހެންދެން ޓްރަމްޕާ އޮތް ގާތް ގުޅުން ނަތަންޔާހޫ ސިފަކުރައްވަމުން ގެންދެވީ ކެމްޕެއިނުގެ ބާރެއްގެ ގޮތުގައެވެ. ހަމައެއާއެކު، އެމެރިކާގެ އެމްބަސީ ޤުދުސަށް ބަދަލުކުރެއްވުން ފަދަ ބޮޑެތި ފިޔަވަޅުތައް އިސްރާއީލުގެ ދިފާއުގައި ޓްރަމްޕް ވެސް ވަނީ އަޅުއްވައިފައެވެ.
އިސްރާއީލުގައި އެންމެ ގިނަ ދުވަހު ބޮޑުވަޒީރުކަން ކުރެއްވި ނަތަންޔާހޫ، އަންނަ އޮކްޓޫބަރު 27 ގައި ބާއްވާ އިންތިޚާބާ ކުރިމަތިލައްވާ އިރު، ބައެއް ޕޯލްތަކުން ދައްކާ ގޮތުގައި އޭނާ އޮތީ ވާދަވެރިންނާ އެއް ހަމައެއްގައި، ނުވަތަ ފަހަތުގައެވެ. 2023 ވަނަ އަހަރު ޣައްޒާގައި އިސްރާއީލުން ޤަތުލްޢާއްމު ފެށިފަހުން އިސްރާއީލުގައި ބާއްވާ ފުރަތަމަ އިންތިޚާބަށް މި އިންތިޚާބު ވާނެއެވެ.
ކޮމެންޓު ފޮނުވާ