ފީފާގެ މުބާރާތްތަކުގެ ހިއްސާ އަމިއްލަ އިންވެސްޓަރުންނަށް ވިއްކާލުމުގެ ރޭވުމާ ގުޅިގެން ފެންމަތިވި ބޮޑު ހަމަނުޖެހުމުގައި، ފީފާގެ ރައީސް ޖިއާނީ އިންފަންޓީނޯ މާފަށް އެދިވަޑައިގަތުމާއެކު، އޭނާއަށް އިދާރާގެ އިސްވެރިންގެ ފުރިހަމަ ތާއީދު ލިބިވަޑައިގެންފިއެވެ.
މޮރޮކޯގެ ރަބާޓްގައި ހުންނަ ފީފާގެ އެފްރިކާ އޮފީހުގައި 4 ގަޑިއިރު ވަންދެން ކުރިއަށްދިޔަ ކުއްލި ބައްދަލުވުމަކަށްފަހު، ފީފާގެ މެނޭޖްމަންޓް ބޯޑުން ވަނީ އިންފަންޓީނޯއަށް ތާއީދު އޮތްކަން ހާމަކޮށްފައެވެ. މިއާއެކު އިންފަންޓީނޯ މަގާމުގައި ދެމިހުންނަވާނެކަން މިހާރު ވަނީ ކަށަވަރުވެފައެވެ. މެނޭޖްމަންޓް ބޯޑުގެ ތާއީދު ނުލިބުނު ނަމަ، މަގާމުގައި ދެމިހުންނެވުމަށް ބޮޑެތި ދަތިތަކާ ކުރިމަތިވީސްކަމަށް ބެލެވެއެވެ.
މި ހަމަނުޖެހުމުގެ އަސްލަކީ ފީފާގެ ފިރިހެން އަދި އަންހެން ވޯލްޑް ކަޕާއި ކްލަބް ވޯލްޑް ކަޕްގެ ކޮމާޝަލް އަދި ޓިކެޓިން ރައިޓްސް ވަކި ކުންފުންޏަކަށް ބަދަލުކުރުމަށްފަހު، އޭގެ މައިނޯރިޓީ ހިއްސާ ގާތްގަނޑަކަށް 20 ބިލިއަން ޑޮލަރަށް އަމިއްލަ އިންވެސްޓަރުންނަށް ވިއްކާލުމުގެ ޕްލޭނެވެ. އެމެރިކާގެ ތްރައިވް ކެޕިޓަލް އިންވެސްޓްމަންޓް ފަންޑުން އިސްކޮށް އޮވެގެން ކުރިއަށްގެންދިޔަ މި ޕްލޭންގެ ފަހަތުގައި، އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ދަނބިދަރި ޖެރެޑް ކުޝްނާގެ އާއިލީ މީހެއް ކަމަށްވާ ޖޯޝުއާ ކުޝްނާ ބައިވެރިވާކަމުގެ ތުހުމަތުތައް ކުރެވުމާއެކު، ދުނިޔޭގެ ފުޓްބޯޅަ އިދާރާތަކުގެ ނުރުހުން އިންފަންޓީނޯއަށް އަމާޒުވިއެވެ.
ޔޫރަޕުގެ ފުޓްބޯޅަ އިދާރާ (ޔުއެފާ) އިން ފީފާގެ މުބާރާތްތައް ބޮއިކޮޓްކުރާނެ ކަމުގެ އިންޒާރު ދިނުމާއެކު، ފީފާގެ ލީޑަރޝިޕަށް އޮތް އިތުބާރު ގެއްލިފައިވާކަން އިއުލާނުކުރިއެވެ. ފީފާގެ ތެރެއިންވެސް އިންފަންޓީނޯގެ އިސްތިއުފާއަށް ގޮވާލި އިރު، ފީފާގެ ސީނިއާ އެޑްވައިޒަރު ކާލޯސް ކޯޑޭރޯ ވަނީ މަގާމުން އިސްތިއުފާ ދެއްވާފައެވެ. އަދި ފީފާގެ ސެކްރެޓަރީ ޖެނެރަލް މަތިއާސް ގްރާފްސްޓްރޯމް ވަނީ މިއީ ހިތާމަވެރި އަދި ލަދުވެތި ކަމެއް ކަމަށް ސިފަކުރައްވައި، މުވައްޒަފުންނަށް މެމޯއެއް ފޮނުއްވާފައެވެ. މީގެ އިތުރުން ކެނެޑާގެ ބޮޑުވަޒީރު މާކް ކާނީ އާއި ޕޯޗުގަލްގެ ކުރީގެ ތަރި ލުއިސް ފީގޯ ވެސް ވަނީ އިންފަންޓީނޯ ވަގުތުން އިސްތިއުފާ ދެއްވުމަށް ގޮވާލައްވާފައެވެ.
ރަބާޓްގައި ބޭއްވި ކުއްލި ބައްދަލުވުމަށްފަހު، އިންފަންޓީނޯ އާއި ގްރާފްސްޓްރޯމް ވަނީ ފީފާގެ 211 މެމްބަރު އެސޯސިއޭޝަނަށް ސިޓީއެއް ފޮނުއްވައި، ކަންކަން ނިންމުމުގައި މެމްބަރުން ބައިވެރި ނުކުރެވުނުކަމަށްޓަކައި މާފަށް އެދިވަޑައިގެންފައެވެ. އަދި މި ޕްރޮޕޯޒަލް މުޅިން އުވާލެވިފައިވާކަން ފީފާއިން ވަނީ ކަށަވަރުކޮށްދީފައެވެ. ނަމަވެސް، ޔުއެފާއިން ވަނީ މައްސަލައާ ގުޅޭ އެއްވެސް ލިޔެކިޔުމެއް ނައްތާނުލުމަށާއި، ގާނޫނީ ފިޔަވަޅު އަޅަން ތައްޔާރުވަމުންދާކަމުގެ ރަސްމީ ނޯޓިސްއެއް ފީފާއަށް ފޮނުވާފައެވެ.
ޔޫރަޕުގެ އިދާރާތަކާއި އިނގިރޭސިވިލާތާއި ވޭލްސް ފަދަ ގައުމުތަކުން އިންފަންޓީނޯއާ ދެކޮޅަށް ތެދުވި ނަމަވެސް، މިސްރު، މޮރޮކޯ، ކޮންގޯ އަދި ފިލިޕީންސް ފަދަ އެފްރިކާ އާއި އޭޝިއާގެ ގިނަ ގައުމުތަކުގެ ފުރިހަމަ ތާއީދު އަދިވެސް އޮތީ އިންފަންޓީނޯއަށެވެ. މިއާއެކު، 2027 ވަނަ އަހަރުގެ މާޗު މަހު މޮރޮކޯގައި ބޭއްވުމަށް ހަމަޖެހިފައިވާ ފީފާގެ އިންތިޚާބުގައި ހަތަރުވަނަ ދައުރަކަށް ކުރިމަތިލެއްވުމުގެ ފުރުސަތު އިންފަންޓީނޯއަށް ވަރަށް ބޮޑަށް އެބައޮތެވެ.
ކޮމެންޓު ފޮނުވާ