އެމެރިކާއަށް އެންމެ ގިނައިން މުދާ އެތެރެކުރާ 60 ގައުމެއްގެ މުދަލުން 10 އިންސައްތަ އާއި 12.5 އިންސައްތައާ ދެމެދުގެ ޓެރިފެއް ނެގުމަށް، ރައީސް ޑޮނަލްޑް ޓްރަމްޕް ނިންމަވައިފި އެވެ.
ދުނިޔޭގެ ނޫސްތަކުގައި ރިޕޯޓުކޮށްފައިވާ ގޮތުގައި، މި ފިޔަވަޅު އަޅާފައިވަނީ ޓްރަމްޕް ކުރިން އަޅުއްވާފައިވާ ޓެރިފްތަކެއް، ސްޕްރީމް ކޯޓުގެ ނިންމުމަކާއެކު ބާތިލްވުމުގެ މުއްދަތު ހަމަވުމުގެ ކުޑަ ވަގުތުކޮޅެއް ކުރިންނެވެ. މި ޓެރިފްތަކުގެ ދަށުން މުދަލުގެ ޑިއުޓީ މަތިކުރެވޭ 60 ގައުމަކީ، އެމެރިކާއަށް އެތެރެކުރާ މުދަލުގެ 99 އިންސައްތަ ހިއްސާކުރާ ގައުމުތަކެވެ.
ވައިޓް ހައުސްއިން ވިދާޅުވި ގޮތުގައި، މި ފިޔަވަޅު އަޅާފައިވަނީ މި ގައުމުތަކުން މީހުން މަޖުބޫރުކޮށްގެން މަސައްކަތްކުރުވައި (ފޯސްޑް ލޭބާ) އުފައްދާ މުދާ އެމެރިކާއަށް އެތެރެކުރުން ހުއްޓުވުމަށް އެކަށީގެންވާ ފިޔަވަޅެއް އަޅާފައި ނުވާތީ ކަމަށެވެ.
އެމެރިކާގެ ޓްރޭޑް ރެޕްރެޒެންޓޭޓިވް ޖޭމިސަން ގްރިއާ ބުރާސްފަތި ދުވަހު ނެރުއްވި ބަޔާނެއްގައި ވިދާޅުވީ، މީހުން މަޖުބޫރުކޮށްގެން މަސައްކަތްކުރުވައި އުފައްދާ މުދާ އެތެރެކުރުން މަނާކުރާ ގާނޫނެއް އެމެރިކާގައި އޮންނަތާ ގަރުނަކަށްވުރެ ގިނަ ދުވަސް ވެއްޖެ ކަމަށާއި، އެ ގާނޫނު ވަރަށް ހަރުކަށިކޮށް ތަންފީޒުކުރަމުންދާ ކަމަށެވެ.
"އަޅުގަނޑުމެންނާ ވިޔަފާރީގެ ގުޅުން އޮންނަ ގައުމުތަކުން ވެސް މިފަދައިން އަމަލުކުރަންޖެހޭ ވަގުތު ފަހަނައަޅައި ހިނގައްޖެ. މިއަދު މި އެޅި ފިޔަވަޅަކީ އިންސާނީ ހައްގުތަކާ ހިލާފު، އަދި ވިޔަފާރީގެ އުސޫލުތަކާ ވެސް ހިލާފު ކަންތައްތަކެއް އިސްލާހުކޮށް، ދުނިޔޭގެ އެކި ކަންކޮޅުތަކުގައި މަސައްކަތްކުރާ މީހުންގެ ލާބަޔާއި މަންފާއަށް އެޅޭ ފިޔަވަޅެއް،" ގްރިއާ ވިދާޅުވި އެވެ.
އާ ޓެރިފްތަކަށް އަމަލުކުރަން ފެށޭނީ ހުކުރު ދުވަހުގެ ރޭ 12:01 ގައި، ކުރިން ނަގަމުން އައި ވަގުތީ 10 އިންސައްތައިގެ ޓެރިފްގެ މުއްދަތު ހަމަވުމާއެކު އެވެ.
ޓްރަމްޕް ފުރަތަމަ ޓެރިފް ނަންގަވަން ފެއްޓެވީ، 1977 ވަނަ އަހަރުގެ 'އިންޓަނޭޝަނަލް އިމަޖެންސީ އިކޮނޮމިކް ޕަވަރސް އެކްޓް' (އައިއީއީޕީ.އޭ) ގެ ދަށުން، އެމެރިކާގެ ވިޔަފާރީގެ ޑެފިސިޓަކީ ގައުމީ ކުއްލި ނުރައްކަލެއް ކަމަށް ކަނޑައަޅައި، ދުނިޔޭގެ ހުރިހާ ހިސާބަކުން ކަހަލަ ގޮތަކަށް އެތެރެކުރާ މުދަލުންނެވެ. ނަމަވެސް ފެބްރުއަރީ މަހު ސްޕްރީމް ކޯޓުން ވަނީ އެ ގާނޫނުގެ ދަށުން ޓެރިފް ނެގުމުގެ ބާރު ރައީސަށް ލިބިގެން ނުވާ ކަމަށް ކަނޑައަޅައި، އެ ޓެރިފްތައް ބާތިލްކޮށްފަ އެވެ.
އެ ނިންމުމަށްފަހު ޓްރަމްޕް ބޭނުންކުރެއްވީ 1974 ގެ ޓްރޭޑް އެކްޓްގެ ސެކްޝަން 122 އެވެ. ނަމަވެސް އެ ސެކްޝަންގެ ދަށުން ޓެރިފް ނެގެނީ 150 ދުވަހަށެވެ. އެ މުއްދަތު ހުކުރު ދުވަހަށް ހަމަވާތީ، މިހާރު މި އާ ޓެރިފްތައް ތައާރަފުކުރައްވަނީ ޓްރޭޑް އެކްޓްގެ ސެކްޝަން 301 ގެ ދަށުންނެވެ. މިއީ "ބޭއިންސާފު"، "ނުކަތާ" ނުވަތަ "ތަފާތުކުރުން" ގެންގުޅޭ ވިޔަފާރީގެ އުސޫލުތައް ގެންގުޅޭ ގައުމުތަކާ ދެކޮޅަށް ފިޔަވަޅު އެޅުމުގެ ބާރު ރައީސަށް ދޭ މާއްދާ އެވެ. ޓްރަމްޕްގެ ފުރަތަމަ ދައުރުގައި ޗައިނާއާ ދެކޮޅަށް ވެސް މި ސެކްޝަންގެ ދަށުން ޓެރިފް ނަންގަވަން ފެއްޓެވިއިރު، އެ ފަހަރު ކޯޓުތަކުން އެ ނިންމުން ބާތިލްކޮށްފައެއް ނުވެ އެވެ.
ކޮމެންޓު ފޮނުވާ