ހޮރްމޫޒް ކަނޑުއޮޅިން ދަތުރުކުރާ ހުރިހާ މުދަލަކުން %20ގެ ފީއެއް ނެގުމަށާއި، އީރާނާ ދެކޮޅަށް އަސްކަރީ ބްލޮކޭޑެއް އަލުން ހިންގުމަށް އެމެރިކާގެ ރައީސް ޑޮނަލްޑް ޓްރަމްޕް މިރޭ ނިންމަވައިފި އެވެ.
ޓްރުތު ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އީރާނާ އެކު ވިޔަސް، އީރާނާ ނުލައި ވިޔަސް، ހޮރްމޫޒް ކަނޑުއޮޅި އޮންނާނީ ހުޅުވިފައި ކަމަށާއި، އީރާނާ ދެކޮޅަށް ކަނޑުގެ ބްލޮކޭޑް އަލުން ހިންގަން ފަށާފައިވާ ކަމަށެވެ. އަދި ސަރަހައްދުގެ ސަލާމަތާއި ރައްކާތެރިކަން ކަށަވަރު ކުރުމަށް ހިނގާ ޚަރަދުތައް ފޫބެއްދުމަށްޓަކައި، އެ ކަނޑުއޮޅިން ދަތުރުކުރާ ހުރިހާ މުދަލަކުން %20 ފީގެ ގޮތުގައި އެމެރިކާއަށް ލިބެންޖެހޭނެ ކަމަށް އޭނާ ވިދާޅުވި އެވެ.
މީގެ ކުރިން ފޮކްސް ނިއުސްއަށް ދެއްވި އިންޓަވިއުއެއްގައި ޓްރަމްޕް ވަނީ ސްޓްރެޓީޖިކް ގޮތުން މުހިންމު އެ ކަނޑުގެ މަގުގެ ކޮންޓްރޯލް އެމެރިކާއިން ނެގުމުގެ ފުރުސަތު އޮތްކަން ވެސް އިޝާރާތް ކުރައްވައިފަ އެވެ. "އަހަރެމެން އެ ކަނޑުއޮޅި ހިފަހައްޓާނަން. އެ ތަން ބަލަހައްޓާނީ ވެސް އަހަރެމެން. އަހަރެމެން ވެގެންދާނީ އެ ކަނޑުއޮޅީގެ ބަލަދުވެރިޔާ. އެކަމުގެ ބަދަލު ވެސް ލިބެންޖެހޭނެ،" ޓްރަމްޕް ވިދާޅުވި އެވެ.
ޓްރަމްޕްގެ މި އިއުލާން މި ގެންނެވީ، ހުއްދަ ނެތި އުޅަނދުތަކެއް ދަތުރުކުރުމާ ގުޅިގެން ހޮރްމޫޒް ކަނޑުއޮޅި ބަންދުކޮށްފައި އޮންނާނެ ކަމަށާއި، އެ ސަރަހައްދުގައި ހަމަޖެހުމާއި އަމާންކަން އަލުން ގާއިމުވަންދެން ބަންދު ދެމިއޮންނާނެ ކަމަށް އީރާނުން ބުނެފައި ވަނިކޮށެވެ. އީރާނުގެ ރިވޮލިއުޝަނަރީ ގާޑުން ބުނެފައި ވަނީ، އާންމު ދަތުރުފަތުރު އަލުން ފެށޭނީ އެ ސަރަހައްދުގައި އެމެރިކާއިން ހިންގާ އަސްކަރީ ހަރަކާތްތައް ހުއްޓާލުމުން ކަމަށެވެ. ދުނިޔޭގެ ތެލާއި ގޭހުގެ ސިނާއަތަށް ހުރި ނުރައްކާ އެއަށް ވުރެ ބޮޑުވެގެންދާނީ، މިހާރު ފެންނަމުންދާ ފަދަ ނުފޫޒު ފޯރުވުންތައް ދިގުދެމިގެންދާ ނަމަ ކަމަށް ވެސް އެ ޖަމާއަތުން ވަނީ އިންޒާރު ދީފަ އެވެ.
މި ފަހުން ދެ ގައުމުގެ ދެމެދުގައި ހަރުކަށި ބަހުގެ ހަމަލާތައް މި ބަދަލުކުރަނީ، އެމެރިކާ އާއި އީރާނުގެ އަސްކަރިއްޔާއާ ދެމެދު މިސައިލާއި ޑްރޯން ހަމަލާތައް ވަރުގަދަވެފައިވާ ދަނޑިވަޅެއްގަ އެވެ. ހޮރްމޫޒް ކަނޑުއޮޅި އަލުން ހުޅުވާލުމަށާއި ދެ ފަރާތުގެ ހަމަލާތައް މެދުކަނޑާލުމަށް މިދިޔަ މަހު އެކުލަވާލި ވަގުތީ އެއްބަސްވުމަށް، މި ފަހުގެ ކަންކަމާ ގުޅިގެން ވަނީ ބޮޑެތި ހުރަސްތަކެއް ކުރިމަތިވެފަ އެވެ.
ކޮމެންޓު ފޮނުވާ