އެމެރިކާގެ ރައީސް ޑޮނަލްޑް ޓްރަމްޕް އަވަހާރަކޮށްލުމަށް އީރާނުން މުޅިން އަލަށް "ވަކި ޚާއްސަ" ރޭވުމެއް ރާވަމުންދާ ކަމުގެ ޖާސޫސީ މައުލޫމާތު އިޒްރޭލުން މި ހަފުތާގައި އެމެރިކާއާ ހިއްސާކޮށްފައިވާ ކަމަށް އެ ގައުމުގެ މީޑިއާތަކުން ރިޕޯޓްކޮށްފި އެވެ.
ސީއެންއެން އަދި ވޯލް ސްޓްރީޓް ޖާނަލް އިން ނަން ހާމަނުކުރާ މަސްދަރުތަކާ ހަވާލާދީ ބުރާސްފަތި ދުވަހު ރިޕޯޓްކުރި ގޮތުގައި، ޓްރަމްޕް އަވަހާރަކޮށްލަން އީރާނުން މަސައްކަތްކުރާކަމުގެ މައުލޫމާތު އެމެރިކާއިން ސިލްސިލާކޮށް ބަލަމުން ދިޔަ ނަމަވެސް، މި ފަހަރު އިޒްރޭލުން ދިން އިންޒާރަކީ މުޅިން އާ އަދި ވަކިން ޚާއްސަ ރޭވުމަކާ ގުޅޭ މައުލޫމާތެކެވެ. މި ރިޕޯޓްތައް ބޭރުވެފައި މިވަނީ އެމެރިކާ އާއި އީރާނާ ދެމެދު އަނެއްކާ ވެސް ހަމަލާތައް ބަދަލުކުރަން ފެށުމުން ބޮޑު ހަނގުރާމައަކަށް ހިނގައިދާނެ ކަމުގެ ބިރު ބޮޑުވެފައިވާ ދަނޑިވަޅެއްގަ އެވެ.
ބުދަ ދުވަހު ނޭޓޯ ސަމިޓް ނިންމަވާލެއްވުމަށް ފަހު އެއާ ފޯސް ވަން ބޯޓުގައި އެނބުރި ވޮޝިންޓަނަށް ވަޑައިގަންނަވަމުން ޓްރަމްޕް ނޫސްވެރިންނާ ވާހަކަދައްކަވަމުން ވިދާޅުވީ، އީރާނުގެ "ލިސްޓު"ގެ އެންމެ ކުރީގައި އޮތީ އޭނާ ކަމަށެވެ. "އެ މީހުން ބޭނުންވަނީ އެމެރިކާގެ ލީޑަރު — އަހަރެން ނައްތާލަން. އަހަރެން އޮތީ ކޮންމެވެސް ލިސްޓެއްގައި. މިއަދު ހެނދުނު އަހަރެން ދުށިން އެ މީހުންގެ ކޮންމެ ލިސްޓެއްގެ ކުރީގައި އަހަރެން އޮތްތަން،" ޓްރަމްޕް ވިދާޅުވި އެވެ.
ސަމިޓް ބޭއްވި ތުރުކީން ފުރާވަޑައިގަތުމަށް ޓްރަމްޕް ބޭނުންކުރެއްވީ އޭނާގެ ކުރީގެ އެއާ ފޯސް ވަން ބޯޓެވެ. ގަތަރުން ހަދިޔާކުރި އާ ޖެޓް ކުރިން އިނގިރޭސިވިލާތަށް ފޮނުވާލުމަށް ފަހު، ވޮޝިންޓަނަށް ވަޑައިގަތުމަށް އޭނާ ބޯޓު ބަދަލުކުރެއްވުމުން، އެއީ ސަލާމަތީ ސަބަބުތަކާ ހުރެ ކުރި ކަމެއް ކަމުގެ އަޑުތައް ފެތުރުނެވެ. ޚާއްސަކޮށް، ތުރުކީއާ ބޯޑަރު ގުޅިފައިވާ އީރާނަށް އެމެރިކާއިން އާ ހަމަލާތަކެއް ދެމުންދިޔަ ވަގުތާ ދިމާވުމުން ސުވާލުތައް އިތުރުވި އެވެ. ނިއު ޔޯކް ޓައިމްސް އިން ބުދަ ދުވަހުގެ ރޭ ރިޕޯޓްކޮށްފައިވާ ގޮތުގައި، ބޯޓު ބަދަލުކުރީ އެމެރިކާގެ ސީކްރެޓް ސާވިސްގެ އެދުމުގެ މަތިން "ރައްކާތެރިކަމުގެ ފިޔަވަޅެއް"ގެ ގޮތުގަ އެވެ.
ނޫސްވެރިންގެ ސުވާލުތަކަށް ޖަވާބުދެއްވަމުން ޓްރަމްޕް ސީދާ ޖަވާބެއް ދެއްވަން ބޭނުންފުޅު ނުވި ނަމަވެސް، މީގެ ކުރިން އީރާނުން އޭނާ އަވަހާރަކޮށްލަން މަސައްކަތްކުރި ކަމަށް ބުނާ ހާދިސާތަކަށް އިޝާރާތް ކުރެއްވި އެވެ. ޓްރަމްޕްގެ ފުރަތަމަ ރިޔާސީ ދައުރުގައި، 2020 ވަނަ އަހަރުގެ ޖެނުއަރީ މަހު އީރާނުގެ ޖެނެރަލް ގާސިމް ސުލައިމާނީ އަވަހާރަކޮށްލަން އޭނާ އަމުރު ކުރެއްވުމާ ގުޅިގެން، އެކަމުގެ ބަދަލު ހިފާނެ ކަމަށް އީރާނުން ބުނަމުންދާތާ މިހާރު އަހަރުތަކެއް ވެއްޖެ އެވެ.
ކޮމެންޓު ފޮނުވާ