ވޯލްޑް ކަޕްގައި އެމެރިކާގެ ފޯވާޑް ފޮލަރިން ބަލޯގަންއަށް ދެއްކި ރަތް ކާޑު އުވާލުމަށް ފީފާއަށް ނުފޫޒު ފޯރުވިކަމަށް ބުނެ އަމާޒުވި ފާޑުކިޔުންތަކަށް އެމެރިކާގެ ރައީސް ޑޮނަލްޑް ޓްރަމްޕް ރައްދުދެއްވައި، އަމިއްލަ ދިފާޢުގައި ވާހަކަދައްކަވައިފިއެވެ.
ބޮސްނިއާއާ ދެކޮޅަށް ކުޅުނު މެޗުގައި ބަލޯގަންއަށް ދެއްކި ރަތް ކާޑު އުވާލުމަށް ފީފާގެ ރައީސް ޖިއާނީ އިންފަންޓީނޯއަށް ގުޅުއްވައި ޓްރަމްޕް ނުފޫޒު ފޯރުވިކަމަށް ބައިނަލްއަޤުވާމީ ފުޓްބޯޅަ އިދާރާތަކުން ދަނީ ތުހުމަތުކުރަމުންނެވެ. ނަމަވެސް އޯވަލް އޮފީހުގައި ވާހަކަދައްކަވަމުން ޓްރަމްޕް ވިދާޅުވީ، އޭނާ އެދިވަޑައިގަތީ ހަމައެކަނި އެ ނިންމުން މުރާޖައާ ކޮށްދިނުމަށް ކަމަށާއި، ވަކި ގޮތަކަށް ކަންތައް ކުރުމަށް އަންގަވާފައި ނުވާނެ ކަމަށެވެ. އަދި ރެފްރީގެ އެ ނިންމުމަކީ ވަރަށް ގޯސް ނިންމުމެއްކަމަށްވެސް އޭނާ ވިދާޅުވިއެވެ. ބްރެޒިލްގެ ރެފްރީ ރަފައެލް ކްލައުސް ބަލޯގަންއަށް ރަތް ކާޑު ދެއްކީ ވީއޭއާރު ބެލުމަށްފަހު ކަމަށްވާއިރު، ޓްރަމްޕް ވަނީ ވީއޭއާރުން ސްލޯ މޯޝަންކޮށް ބެލުމުން މަންޒަރު އޮންނަ ވަރަށްވުރެ މާ ގޯސްކޮށް ފެންނަކަމަށް ވިދާޅުވެ އެކަމަށްވެސް ފާޑުވިދާޅުވެފައެވެ.
ފީފާއިން ބަލޯގަންގެ ސަސްޕެންޝަން އުވާލުމާއެކު ބެލްޖިއަމާ ދެކޮޅަށް ކުޅޭ މެޗުގައި އޭނާއަށް ބައިވެރިވެވޭނެއެވެ. މިއީ މުބާރާތުގައި މިހާތަނަށް އެމެރިކާއަށް ތިން ގޯލު ކާމިޔާބުކޮށްދީފައިވާ އެންމެ މުހިންމު އެއް ކުޅުންތެރިޔާއެވެ. ފީފާގެ މި ނިންމުމަކީ "ބަލައިގަނެވޭނެ އިންސާފުވެރި ނިންމުމެއް ނޫން" ކަމަށް ޔޫއީއެފްއޭއިން ބުނެފައިވާއިރު، ބެލްޖިއަމްގެ ފުޓްބޯޅަ ފެޑެރޭޝަނުން ވަނީ މި މައްސަލަ އިސްތިއުނާފުކޮށްފައެވެ. އަދި ބެލްޖިއަމްގެ ކޯޗު ރޫޑީ ގާސިއާ ވަނީ މިއީ "އޭޕްރީލް ފޫލް" ގެ ޖޯކެއް ފަދަ ކަމެއްގެ ގޮތުގައި ސިފަކޮށްފައެވެ.
މި ފާޑުކިޔުންތަކާ ގުޅިގެން ފީފާގެ ރައީސް އިންފަންޓީނޯ ވިދާޅުވީ ޓްރަމްޕާ ވާހަކަދެއްކެވި ނަމަވެސް، ފީފާގެ ޑިސިޕްލިނަރީ ކޮމިޓީއަކީ މިނިވަން މުއައްސަސާއެއް ކަމަށާއި ކަންކަން ނިންމާނީ އުސޫލުތަކުގެ ތެރެއިން ކަމަށެވެ. އަނެއްކޮޅުން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އާއި އެމެރިކާ ޓީމުގެ ކޯޗު މައުރީސިއޯ ޕޮޗެޓީނޯ ވަނީ ފީފާގެ ނިންމުމަށް ތާއީދުކޮށް، އެންމެ މޮޅު ކުޅުންތެރިންނާ ނުލައި ކުޅުމަކީ އިންސާފެއް ނޫންކަމަށް ބުނެފައެވެ.
ކޮމެންޓު ފޮނުވާ