މިރޭ ކުޅޭ މެޗުތަކުގައި ލަނޑު ޖަހައިގެން، ވޯލްޑް ކަޕްގެ ތާރީހުގައި އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދުމުގެ ފުރުސަތު އާޖެންޓީނާގެ ކެޕްޓަން ލިއޮނެލް މެސީ އަދި ފްރާންސްގެ ކެޕްޓަން ކީލިއަން އެމްބާޕޭއަށް އެބައޮތެވެ.
މިރޭ 10 ޖަހާއިރު އޮސްޓްރިޔާއާ ދެކޮޅަށް އާޖެންޓީނާ ނުކުންނައިރު، މެސީއަށް މި ރެކޯޑު މުގުރާލުމާ ދެމެދު އޮތީ އެންމެ ލަނޑެކެވެ. މުބާރާތުގެ ފުރަތަމަ މެޗުގައި އަލްޖީރިޔާ ކޮޅަށް ހެދި ހެޓްރިކާއެކު އުމުރުން 38 އަހަރުގެ މެސީ ވަނީ ޖުމްލަ 16 ލަނޑު ހަމަކޮށްފަ އެވެ. މިއާއެކު އޭނާ މިހާރު އޮތީ 2014 ވަނަ އަހަރުން ފެށިގެން ޖަރުމަނުގެ މިރޮސްލާވް ކްލޯސޭ ދަމަހައްޓަމުން އަންނަ ރެކޯޑާ އެއްވަރުކޮށްފަ އެވެ. މިރޭގެ މެޗުގައި މެސީ ލަނޑެއް ޖަހައިފިނަމަ، 17 ލަނޑާއެކު އޭނާއަށް ތާރީހީ އާ ރެކޯޑެއް ލިބޭނެ އެވެ.
މެސީގެ ފަހަތުން މި ރެކޯޑަށް އެންމެ ބޮޑަށް ވާދަކުރަމުން އަންނަނީ އެމްބާޕޭ އެވެ. ފުރަތަމަ މެޗުގައި ސެނެގޯލް ކޮޅަށް އޭނާ ޖެހި ދެ ލަނޑާއެކު ވޯލްޑް ކަޕްގައި އެމްބާޕޭ ޖެހި ލަނޑުގެ ޖުމްލަ ވަނީ 14 އަށް އަރާފަ އެވެ. އާޖެންޓީނާގެ މެޗު ނިމޭތާ ދެ ގަޑިއިރު ފަހުން އިރާގާ ދެކޮޅަށް ފްރާންސް ނުކުންނައިރު، މިއީ އެމްބާޕޭއަށް ވެސް ލަނޑު ލިސްޓުގެ ކުރިއަށް ޖެހިލަން ލިބޭނެ ރަނގަޅު ފުރުސަތެކެވެ.
އެންމެ ފަހުގެ ވޯލްޑް ކަޕް ފައިނަލްގައި އާޖެންޓީނާ އަތުން ޕެނަލްޓީ ޖަހައިގެން ފްރާންސް ބަލިވި ނަމަވެސް، އެމްބާޕޭ ވަނީ އެ މެޗުގައި ތާރީހީ ހެޓްރިކެއް ހަދައި މުބާރާތުގެ ރަން ބޫޓު ހާސިލްކޮށްފަ އެވެ. އެހެންކަމުން މިރޭގެ މެޗުތަކަކީ މި ދެ ކުޅުންތެރިންގެ ފަރާތުން ވެސް ތާރީހީ މޮޅު ކުޅުމެއް ފެނިގެންދާނެ މެޗުތަކަކަށް ވާނެ ކަމަށް ބެލެވެ އެވެ.
ކޮމެންޓު ފޮނުވާ