ސަރުކާރުގެ އާ ތަރުޖަމާނު މުހައްމަދު ހުސެއިން ޝަރީފް (މުންދު) ނޫސްވެރިންނާ ބައްދަލުކުރެއްވުމަށް "ޕްރެސާ ވިތު ދަ ސްޕޯކްސް" ގެ ނަމުގައި ސިލްސިލާ ބައްދަލުވުންތަކެއް މިއަދު ފަށައި، ޓިކްޓޮކާއި އިންސްޓަގްރާމް މެދުވެރިކޮށް ސަރުކާރުގެ މައުލޫމާތު ދޭން ނިންމައިފިއެވެ.
ދައުލަތުގެ މީޑިއާ، ޕީއެސްއެމްގެ ސްޓޫޑިއޯގައި މިއަދު ފެށި މި ބައްދަލުވުންތައް ކޮންމެ ހަފުތާއެއްގެ ބުރާސްފަތި ދުވަހު ގާތްގަނޑަކަށް 55 މިނެޓަށް ކުރިއަށް ގެންދާނެކަމަށް މުންދު ވިދާޅުވިއެވެ. މިކަމުގެ މައިގަނޑު ބޭނުމަކީ ނޫސްވެރިން ލިޔާ ޚަބަރުތަކަށް ބޭނުންވާ ސަރުކާރުގެ ބަހާއި، ތަފާސްހިސާބުތަކާއި، މައުލޫމާތުތައް ހޯދުމުގައި ލުއިފަސޭހަ ގޮތްތަކެއް ހަމަޖައްސައިދިނުން ކަމަށް އޭނާ ފާހަގަކުރެއްވިއެވެ.
މީގެ އިތުރުން، ސަރުކާރުގެ އެންމެފަހުގެ ޚަބަރުތަކާއި މައުލޫމާތު ރައްޔިތުންނާ ވީހާވެސް ގާތުން ގެނެސްދިނުމަށްޓަކައި "ދަ ފީޑް" ގެ ނަމުގައި މުންދުގެ ރަސްމީ ޓިކްޓޮކް އަދި އިންސްޓަގްރާމް އެކައުންޓެއް މިހާރު ވަނީ ހަދާފައެވެ. މިއީ ސަރުކާރުގެ މައުލޫމާތު އާންމުންނަށް ޒަމާނީ ވަސީލަތްތައް މެދުވެރިކޮށް ފަސޭހައިން ފޯރުކޮށްދިނުމަށް އެޅުނު މުހިންމު ފިޔަވަޅެކެވެ.
ޔޫއޭއީއަށް ރާއްޖެއިން ކަނޑައަޅާފައިވާ ސަފީރުކަމުގައި ހުންނެވުމަށްފަހު، މި މަހުގެ 15 ވަނަ ދުވަހު ރައީސް އޮފީހުގެ އިސް ތަރުޖަމާނުގެ މަގާމަށް އައްޔަންކުރެއްވި މުންދު އަކީ މީގެ ކުރިންވެސް އެ އޮފީހުގެ ތަރުޖަމާނުކަން 2005 އިން 2008 އަށް ކުރައްވާފައިވާ ތަޖުރިބާކާރު ބޭފުޅެކެވެ. އަދި އޭނާ ވަނީ ރައީސް އޮފީހުގެ ސްޓްރެޓީޖިކް ކޮމިއުނިކޭޝަންސް ޔުނިޓް އުފެއްދުމުގައި އިސް ދައުރެއް އަދާކުރައްވައި، ފަހުން ސްޕޯޓްސް މިނިސްޓަރުކަންވެސް ކުރައްވާފައެވެ.
ކޮމެންޓު ފޮނުވާ