ސޯޝަލް ހައުސިންގ ސްކީމްގެ ދަށުން ދޫކޮށްފައިވާ ހިޔާ ފްލެޓްތައް، އެހެން ފަރާތްތަކަށް ކުއްޔަށް ދޫކުރުން ހުއްޓުވުމަށްޓަކައި ގާނޫނީ އޮނިގަނޑަށް ގެންނަންޖެހޭ ބަދަލުތައް ގެނައުމުގެ މަސައްކަތް ސަރުކާރުން ފަށައިފިއެވެ.
ހައުސިންގ، ލޭންޑް އެންޑް އަރބަން ޑިވެލޮޕްމަންޓް މިނިސްޓަރު ޑރ. އަބްދުالله މުއްޠަލިބު ނޫސްވެރިންނާ ވާހަކަދައްކަވަމުން ވިދާޅުވީ، ސަރުކާރުގެ ބޯހިޔާވަހިކަމުގެ މަޝްރޫޢުތަކުގެ ދަށުން ދޫކޮށްފައިވާ ފްލެޓްތައް ކުއްޔަށް ދިނުމަކީ ސަރުކާރުން ތާއީދުކުރާ ކަމެއް ނޫން ކަމަށެވެ. ނަމަވެސް، މިހާރު ހިޔާ ފްލެޓްތައް ދޫކޮށްފައިވަނީ "ސޭލް ޕާޗޭސް އެގްރީމަންޓެއް" ގެ ދަށުން ކަމަށްވާތީ، އެތަންތަން ކުއްޔަށް ދޭ ފަރާތްތަކާ މެދު ފިޔަވަޅު އެޅުމަށް ގާނޫނީ ގޮތުން ގޮންޖެހުންތަކެއް އެބަހުއްޓެވެ. މިނިސްޓަރު ފާހަގަކުރެއްވި ގޮތުގައި މިހާރު އޮތް އެގްރީމަންޓުގައި ކުއްޔަށް ނުދެވޭނެ ކަމަށް ސީދާ ބަޔާންކޮށްފައި ނެތް ނަމަވެސް، އެއީ ސޯޝަލް ހައުސިންގގެ މަގުސަދާ ޚިލާފު ކަމެކެވެ.
މި މައްސަލަ ހައްލުކުރުމަށްޓަކައި ސަރުކާރުން މިހާރު ދެ މަސައްކަތެއް ކުރަމުންދާކަން ވަޒީރު ހާމަކުރެއްވިއެވެ. އެގޮތުން، ގާނޫނަށް އިސްލާހު ގެނެސް ސޯޝަލް ހައުސިންގ ޔުނިޓްތައް ކުއްޔަށް ދިނުމަކީ މަނާކަމެއްގެ ގޮތުގައި ކަނޑައެޅުމުގެ މަސައްކަތް ކުރިއަށްދާއިރު، ހިޔާ ފްލެޓްތަކުގައި ދިރިއުޅޭ އެހެން ފަރާތްތަކަށް އުނދަގޫވާ ގޮތަށް އެތަންތަން ބޭނުންކުރާ ފަރާތްތަކަށް އެޗްޑީސީ މެދުވެރިކޮށް ނޯޓިސް ދީ، އެކަންކަން ހުއްޓުވުމުގެ މަސައްކަތް ވެސް ދަނީ ކުރަމުންނެވެ. އަދި އަލަށް ދޫކުރާ 4000 ފްލެޓް ދޫކުރަނީ "ރެންޓް ޓު އޯން" މޮޑެލްއަށް ކަމަށްވާތީ، އެތަންތަން ކުއްޔަށް ދީފިނަމަ ފިޔަވަޅު އަޅަން ފަސޭހަވާނެކަން ވެސް މިނިސްޓަރު ފާހަގަކުރެއްވިއެވެ.
ކުއްޔަށް ދިނުން މަނާކުރަން ނިންމި ނަމަވެސް، ޚާއްސަ ހާލަތްތަކެއްގައި އިސްތިސްނާ ދެވިދާނެކަމަށް މިނިސްޓަރު ވިދާޅުވިއެވެ. މިސާލެއްގެ ގޮތުން، އެއް ކޮޓަރި ނުވަތަ ދެ ކޮޓަރީގެ ފްލެޓެއް ލިބިފައިވާ އާއިލާއަކީ އެތަނުގައި ނޫޅެވޭ ވަރުގެ ބޮޑު އާއިލާއެއް ނަމަ، ސަރުކާރުގެ ޚާއްސަ ހުއްދައެއްގެ ދަށުން އެތަން ކުއްޔަށް ދިނުމުގެ ފުރުސަތު ދިނުން ފަދަ ކަންކަން ކުރެވިދާނެ ކަމަށް ވިދާޅުވިއެވެ. އެހެން ނަމަވެސް، އެ ނޫން ގޮތަކަށް ފްލެޓްތައް ކުއްޔަށް ދިނުމަކީ ސަރުކާރުން ބަލައިގަންނާނެ ކަމެއް ނޫން ކަމަށް މިނިސްޓަރު ވަނީ ތަކުރާރުކޮށް ވިދާޅުވެފައެވެ.
ކޮމެންޓު ފޮނުވާ