ކުރިއަށް އޮތް ފީފާ ވޯލްޑް ކަޕް ފުޓްބޯޅަ މުބާރާތުގެ ރަސްމީ ވީޑިއޯ ކޮންޓެންޓް އަދި ސޯޝަލް މީޑިއާ ޕާޓްނަރަކަށް މަޝްހޫރު ވީޑިއޯ ޕްލެޓްފޯމް، ޓިކްޓޮކް ހަމަޖައްސައި އެކަން ފީފާއިން އިއުލާންކޮށްފިއެވެ. ދުނިޔޭގެ ފުޓްބޯޅައިގެ މައި އިދާރާ، ފީފާއިން މި އެއްބަސްވުމުގެ މާލީ އަގުތައް ހާމަކޮށްފައި ނުވި ނަމަވެސް، އެ އިދާރާއިން ބުނެފައިވަނީ މިއީ ސޯޝަލް މީޑިއާ ޕްލެޓްފޯމްތަކުން ލިބުނު ހުށަހެޅުންތަކުގެ ތެރެއިން އެންމެ ފުރިހަމަ އަދި އެންމެ ރަނގަޅު ހުށަހެޅުން ކަމަށެވެ.
މި ވެވުނު އާ އެއްބަސްވުމުގެ ދަށުން، ޓިކްޓޮކަށް ފީފާގެ މުއްސަނދި އަރުޝީފް ނުވަތަ އާކައިވް ބޭނުންކުރުމުގެ ހުއްދަ ލިބިގެންދާނެއެވެ. އަދި ހަމައެހެންމެ، ޖޫން މަހު އެމެރިކާގައި ބޭއްވުމަށް ހަމަޖެހިފައިވާ މުބާރާތުގެ މެޗުތަކުގެ ވީޑިއޯ ފުޓޭޖް ބޭނުންކޮށްގެން ތަފާތު ކޮންޓެންޓް އުފެއްދުމުގެ ފުރުސަތު ވެސް ޓިކްޓޮކަށް ފަހިވެގެންދާނެއެވެ. މީގެ އިތުރުން މުބާރާތުގެ ބްރޯޑްކާސްޓިންގ ރައިޓްސް ނަގާ ފަރާތްތަކަށް، އެފަރާތްތަކުގެ ޓިކްޓޮކް އެކައުންޓްތައް މެދުވެރިކޮށް މެޗުތައް ދުރަށް ދެއްކުމުގެ މަގުވެސް ފީފާއިން ވަނީ ތަނަވަސްކޮށްދީފައެވެ.
ޓިކްޓޮކަކީ މިހާރުވެސް އެމެރިކާގެ މޭޖަ ލީގް ސޮކާ (އެމްއެލްއެސް) އާއި އެޕަލް ޓީވީގެ ވެސް ޕާޓްނަރެކެވެ. ނަމަވެސް ފީފާއިން ޓިކްޓޮކާއެކު މި ބޮޑު އެއްބަސްވުން ގާއިމުކޮށްފައި މިވަނީ، ސަލާމަތީ ސަބަބުތަކަށްޓަކައި އެމެރިކާގައި ޓިކްޓޮކް ބޭނުންކުރުން މަނާކޮށްފާނެ ކަމުގެ އިންޒާރު އެގައުމުގެ މިހާރުގެ ސަރުކާރުން ދީފައިވާ ދަނޑިވަޅެއްގައެވެ. މި ނުތަނަވަސްކަމުގެ ތެރެއިންވެސް ފީފާއިން ޓިކްޓޮކް ޚިޔާރުކުރުމަކީ ފާހަގަކޮށްލެވޭ ކަމެކެވެ.
ކޮމެންޓު ފޮނުވާ