ލަންކާއަށް އެރި ތޫފާން "ޑިޓްވާ"ގެ ސަބަބުން އެ ގައުމުގެ 1،289 ގެއެއް މުޅިން ހަލާކުވެ، ގާތްގަނޑަކަށް 44،500 ގެއަކަށް އެކިވަރުގެ ގެއްލުން ލިބިފައިވާ ކަމަށް ނޭޝަނަލް ހައުސިން ޑިވެލޮޕްމަންޓް އޮތޯރިޓީގެ އިބްތިދާއީ ތަހުލީލުތަކުން ހާމަވެއްޖެއެވެ.
މި މައުލޫމާތު ހިއްސާކޮށްފައިވަނީ ރައީސް އަނޫރާ ކުމާރާ ދިއްސާނަޔަކޭ، ފިނޭންސް މިނިސްޓްރީ އަދި އެންއެޗްޑީއޭގެ އިސް އޮފިޝަލުންނާއެކު ރައީސް އޮފީހުގައި މިއަދު ބޭއްވި ބައްދަލުވުމެއްގައެވެ. މި ބައްދަލުވުމުގައި ރައީސް ވަނީ ގެއްލުން ލިބުނު ގެތައް ދެނެގަތުމުގެ މަސައްކަތް ހާމަކަން ބޮޑު އުސޫލެއްގެ ދަށުން ކުރިއަށް ގެންދިޔުމަށާއި، ބަދަލު ދިނުމަށް ބޭނުންވާ ސައްހަ މައުލޫމާތު އެއްކުރެވޭނެ ހާއްސަ ނިޒާމެއް ގާއިމްކުރުމަށް އޮފިޝަލުންނަށް އަންގާފައެވެ.
ކާރިސާގެ އަސަރު ކުރި ސަރަހައްދުތަކުގައި ދިރިއުޅޭ މީހުންނަށް ދިގުމުއްދަތުގެ ދެމެހެއްޓެނިވި ހައްލުތައް ހޯދައިދިނުމުގެ މުހިންމުކަން ރައީސް ފާހަގަކުރެއްވިއެވެ. މި ތޫފާނުގެ ސަބަބުން މިހާތަނަށް 474 މީހުން މަރުވެފައިވެއެވެ.
ކޮމެންޓު ފޮނުވާ