ދެކުނު އޭޝިޔާ ސަރަޙައްދަށް އެރި ބާރުގަދަ ތޫފާން ދިތުވާގެ ސަބަބުން ސްރީ ލަންކާގެ ދަނޑުވެރިކަމުގެ ސިނާއަތް އިޔާދަކުރުމަށް 100 މިލިޔަން އެމެރިކާ ޑޮލަރު ބޭނުންވާނެ ކަމަށް އެ ޤައުމުގެ ޚާރިޖީ ވުޒާރާއިން ބުނެފިއެވެ. ބޯކޮށް ވެހުނު ވާރެއާއި ގަދަ ވައިގެ ސަބަބުން އެ ޤައުމުގެ ތިންބައިކުޅަ އެއްބައި ސަރަޙައްދު ވަނީ ފެނު އަޑީގައެވެ.
ހަނޑުލާއި ތަރުކާރީ ދަނޑުތައް އެކަނިވެސް އިޔާދަކުރުމަށް 48 މިލިޔަން ޑޮލަރު ހޭދަވާއިރު، ފެންދޭ ނިޒާމާއި ކެނޭލްތައް މަރާމާތުކުރުމަށް އިތުރު 9 މިލިޔަން ޑޮލަރު ބޭނުންވެއެވެ.
މި ކާރިސާގައި 334 މީހުން މަރުވެ، 218 މީހުން ގެއްލިފައިވާއިރު، ގާތްގަނޑަކަށް މިލިޔަނެއްހާ މީހުންނަށް ވަނީ ފެންބޮޑުވުމުގެ އަސަރުކޮށްފައެވެ. މީގެ ތެރެއިން 180,000 އަށްވުރެ ގިނަ މީހުން މިހާރު ދިރިއުޅެމުންދަނީ ވަގުތީ ހިޔާތަކުގައެވެ. މީގެ އިތުރުން 15,000 އަށްވުރެ ގިނަ ގެއަށް ގެއްލުންވެ، 200 އެއްހާ މަގާއި 10 ބުރިޖު ވަނީ ހަލާކުވެފައެވެ.
ލަންކާގެ ޚާރިޖީ ވުޒާރާއިން ވަނީ މި ކާރިސާއިން އަރައިގަތުމަށް ބައިނަލްއަޤްވާމީ މުޖުތަމަޢުގެ އެހީތެރިކަމަށް އެދިފައެވެ.
ކޮމެންޓު ފޮނުވާ